சுபாவின், பயணங்கள் தொடர்கின்றன...!

கிருஷ்ணகிரிக்கு போகலாம் வாங்க...! - 10

2012-03-11T19:09:00.002+01:00

கிரிஷ்ணகிரியில் புலியட்டைக்குட்டை என்ற சிற்றூரில் பாறை ஓவியங்களை நாங்கள் பார்க்கச் சென்ற போதும் மிக ரம்மியமான மலைப் பகுதியைக் கடந்து செல்லும் வாய்ப்பு அமைந்தது. மிக மிக உறுதியான பெரிய பாறைகள் நிறைந்த மலைப்பகுதி அது. இப்பகுதி ஆந்திர மானிலத்திற்கு அருகாமையில் இருக்கின்றது.

இந்தப் புலியட்டைக் குட்டை பகுதியில் இருக்கும் பாறை ஓவியங்கள் இங்கிருப்பதை முதன் முதலில் கண்டு பிடித்தவர் ஆசிரியர் திரு.முருகானந்தம். இவர் தமிழ்ப்பல்கலைக்கழக தொல்லியல் துறை ஆய்வாளர் டாக்டர் ராஜவேலு அவர்களிடம் 7 நாட்கள் கல்வெட்டு தொல்லியல் ஆய்வு பயிற்சி ஒன்றினை மேற்கொண்டிருந்த போது கள ஆய்வுக்காக இப்பகுதியைத் தேர்ந்தெடுத்து இங்கு ஏதேனும் தொல்லியல் சான்றுகள் இருக்குமா என்று தேடியிருக்கின்றார். அப்போது இவருக்கு இந்த கற்பாறை தென்பட்டிருக்கின்றது.

ஆசிரியர் முருகானந்தம்

உடனே இவர் டாக்டர் ராஜவேலு அவர்களுக்குத் தெரிவித்து அவரும் மற்றும் சிலரும் வந்து பார்த்து இவை பெருங்கற்கால ஓவியங்கள் தாம் என்பதை உறுதி செய்திருக்கின்றனர்.

இந்தப் பகுதிக்கு எங்களை திரு.முருகானந்தம் உடன் வந்திருந்து அழைத்துச் சென்று காட்டினார்.

கற்பாறைகள் நிறைந்த மலை. உறுதியான மிகப் பெரிய பாறைகள். ஆங்காங்கே பனை மரங்கள். இயற்கையின் அழகை வர்ணிக்க வார்த்தைகள் இல்லை. இந்தப் பகுதிக்கு உள்ளே செல்ல பாதை இல்லை. பாறைகளின் மேல் ஏறித்தான் சென்று பார்க்க வேண்டும். ஆக புதர்களைக் கடந்து சென்று ஒரு வழியாக இந்தப் பாறை இருக்கும் பகுதிக்கு வந்து சேர்ந்தோம். அங்கு நாங்கள் பார்த்த காட்சி எங்கள் அனைவரையும் ஆச்சரியப்படுத்தியது. பாறை முழுதும் அவ்வளவு ஓவியங்கள். மிக நேர்த்தியான குறியீடுகள் அவை.

நா.கண்ணன், சுபா, ப்ரகாஷ்

இவற்றைப் பார்த்து நிறைய படங்கள் எடுத்துக் கொண்டோம். அவற்றை விரைவில் ஒரு பிரத்தியேகப் பதிப்பாக வெளியிட நினைத்திருக்கின்றேன். இவை தொடர்ந்து ஆய்வு செய்யப்பட வேண்டியவை.

தொடரும்..

அன்புடன்
சுபா

கிருஷ்ணகிரிக்கு போகலாம் வாங்க...! - 9

2012-03-05T19:06:00.000+01:00

தமிழகத்திலே இம்முறை சிவகங்கை மாவட்டத்தின் பல பகுதிகளிலும் கிருஷ்ணகிரியிலும் நிறைய புளிய மரங்களைப் பார்த்தேன். மரங்கள் நிறைய புளி (காய்கள்). பறித்து உடைத்துப் பார்த்தால் பச்சையாக இருக்கின்றன. இன்னமும் காய்ந்து போக சில மாதங்கள் ஆகலாம் போல.

மிகப் பெரிய உறுதியான மரங்கள். ஒவ்வொரு மரங்களிலும் ஏராளமான புளி. இவை சாலையோரத்தில் நிழலுக்காக வைக்கப்பட்டுள்ள மரங்கள் என்றே நினைக்கிறேன்.

பினாங்கிலே முன்னர் நான் சிறுமியாக இருந்த சமயத்தில் எங்கள் வீட்டிற்கு பக்கத்தில் நிறைய மரங்கள் இருக்கும். ஒரு சிறிய ஆறு. அதைத் தாண்டினால் இடது பக்கத்தில் மங்குஸ்தீன் மரத்தோப்பு. வலது பக்கத்தில் சிறுவர்கள் விளையாட்டு மையமும் காற்பந்து திடலும் இருக்கும். இங்கே சில பெரிய புளிய மரங்களிருந்தன. இப்போதும் இருக்கும் என்றே நினைக்கின்றேன்.

அப்போதெல்லாம் அந்த புளியமரத்தின் கொடியைப் பிடித்துக் கொண்டு ஊஞ்சல் ஆடுவோம். கொடியைப் பிடித்துக் கொண்டு மேலிருந்து கீழே குதிப்போம். இவையெல்லாம் சந்தோஷமான விளையாட்டுக்கள். இப்போது நினைத்தால் கூட அந்த கணத்திற்கு மனம் சென்று விடுகின்றது. அந்தப் பசுமை, கொடியின் கரகரப்பு, கைவலிக்க அந்தக் கொடியை பிடித்துக் கொண்டு குதித்து மகிழ்ந்தவையெல்லாம் மனக் கண் முன் வந்து போகின்றன.

தொடரும்..
சுபா

கிருஷ்ணகிரிக்கு போகலாம் வாங்க...! - 8

2012-03-04T19:03:00.000+01:00

எங்கள் கிருஷ்ணகிரி பயணத்தில் விருந்து சாப்பிட்டிற்கும் ஒரு அழைப்பு வந்திருந்தது. அன்பான அழைப்பு.

கல்விக்கோயில் கவி.செங்குட்டுவன் நம் மின்தமிழ் நண்பர். கிருஷ்ணகிரிக்கு அருகாமையில் உள்ள ஊத்தங்கரை எனும் ஊரில் இருந்து கொண்டு அவர் ஆற்றிவரும் கல்விப்பணி பற்றி இங்கு அவ்வப்போது செய்திகள் வாசிக்கின்றோம்.

இவரது இல்லத்தில் காலை உணவிற்கு விருந்தழைப்பு எங்களுக்கு வந்திருந்தது. அவர் இல்லத்தில் விருந்தை முடித்து விட்டு அங்கிருந்து அருகாமையில் இருக்கும் அவர் ஆசிரியராக பணியாற்றிய பள்ளிக்கும் சென்று வர யோசித்திருந்தோம். ஆக முதலில் விருந்து என்று முடிவாகியிருந்தது.

நாங்கள் ஊத்தங்கரை வந்து சேர தாமதமாகிவிட்டது. ஆனாலும் திரு.திருமதி கவி.செங்குட்டுவன் இருவரும் சங்கடப்படாமல் எங்களுக்கு காத்திருந்து சுவையான காலை உணவை பரிமாறி மனம் குளிற வைத்தனர்.

திருமதி. கவி.செங்குட்டுவன் அவர்களும் ஒரு பள்ளி தலைமை ஆசிரியை. அழகும் அறிவும் அன்பும் மிக்க நல்லாசிரியர். திரு.திருமதி கவி.செங்குட்டுவன் அவர்கள் குடும்பத்தினரில் பெரும்பாலோர் ஆசிரியர்களாகவும் தலைமை ஆசிரியர்களாகவும் இருக்கின்றனர் என்று கேள்விப்பட்டு ஆச்சரியப்பட்டோம். குடும்பமே ஆசிரியர் குடும்பம்.

இனிய வரவேற்பு. முதலில் இடியாப்பமும் அதில் போட்டுக் கொள்ள கடலை மாவும் அதன் மேல் தேங்காய்பாலும் விட்டு ஒரு உணவு. கடலை மாவு சேர்த்து இடியாப்பம் இதுவரை நான் சாப்பிட்டதில்லை. இது புதிதான வகை. இடியாப்பத்தில் இப்படியும் ஒரு வகை உண்டு என்று அன்று தெரிந்து கொண்டேன்.

பின்னர் இட்லி, தோசை என விருந்து மிக பலமாக இருந்தது. மிளகாய் சட்னியும் தேங்காய் சட்னியும் சாம்பாரும் அபாரச் சுவை. ரசித்து ருசித்து சாப்பிட்டோம்.

இவர்கள் இல்லத்தில் கேட்டு வாங்கி என் சுவைக்கேற்ப ஒரு காபியும் சாப்பிட்டேன். சுவையாக இருந்தது காபி. மிக திருப்தியான ஒரு காலை உணவு விருந்து சாப்பிட்ட திருப்தி. சரி பள்ளிக்கு கிளம்பலாம் என்று புறப்படுவதற்கு முன்னர் திரு.கவிசெங்குட்டுவன் விருந்தினர்களான் எங்களுக்கு ஆளுக்கு ஒரு நூலும் பரிசளித்து மகிழ்வித்தார்.

திரு.திருமதி.கவி.செங்குட்டுவன் டாக்டர்.நா.கண்ணனுக்கு நூல் பரிசளிக்கின்றனர்.

திரு.திருமதி.கவி.செங்குட்டுவன் எனக்கு நூல் பரிசளிக்கின்றனர்.

திரு.திருமதி.கவி.செங்குட்டுவன் ஸ்வர்ணாவுக்கு நூல் பரிசளிக்கின்றனர்.

திரு.திருமதி.கவி.செங்குட்டுவன் செல்வமுரளிக்கு நூல் பரிசளிக்கின்றனர்.

இவர்கள் அன்பான கனிவான விருந்துபசாரத்தில் மனம் நெகிழ்ந்து போனோம்.

சுபா

கிருஷ்ணகிரிக்கு போகலாம் வாங்க...! - 7

2012-03-01T18:58:00.001+01:00

செவிக்கு உணவில்லாத போது தான் பசிக்கு உணவு என்று சொல்லிக் கொண்டு நாங்கள் நடுகல் நடுகல்களாக தேடித்தேடி சென்று பதிவு செய்து கொண்டிருந்தோம். காலையில் ஆரம்பித்த பணி.. மதியமாகி விட்டது. ஆனாலும் ம்திய உணவுக்குச் செல்ல வேண்டும் என்று நாங்கள் யாருமே யோசிக்கவில்லை. அதிலும் கூடவே திரு. சுகவன முருகன் அவர்கள் தொடர்ந்து பல விஷயங்களைக் காட்டிக் கொண்டும் பேசிக் கொண்டும் வந்ததால் மதிய உணவு என்ற ஒரு விஷயத்தை மறந்து போய்விட்டோம்.

ஆனாலும் எங்களை வழி நடத்திக் கொண்டிருக்கும் இறைவனின் கருணையே கருணை!

ஐகொந்தம் கோயில் எங்கள் பட்டியலில் இருந்தது. அங்கே பக்கத்தில் ஒரு குகையில் இருக்கும் குகைப் பாறை ஓவியங்களைப் பார்க்கச் செல்வது பட்டியலில் இருந்தது. ஆக நேராக ஐகொந்தம் சென்றோம். சரி வைகுந்தம் கேள்விப்பட்டிருக்கின்றோம். ஐகொந்தம்.. கேள்விப்பட்டதில்லையே. அதோடு ஐகொந்தம் என்ற பெயரே முதலில் எனக்கு மனதில் நிலைக்கவில்லை. ஒருவகையாக இந்தப் பெயரை ஓரிரு முறைச் சொல்லிப் பழகிக் கொண்டு மனதில் நிலைப்படுத்திக் கொண்ட போது ஐகொந்தம் கோயில் வந்து சேர்ந்து விட்டோம்.

கோயிலில் அன்று சிறப்பு வழிபாடு போல.. வைகுந்த ஏகாதசி தினத்திற்கு மறு நாள் அது. பெருமாள் கோயில் வேறு .. சொல்ல வேண்டுமா? கொஞ்சம் மக்கள் நடமாட்டம் இருந்தது. மிகப் புதிதான கோயில். அழகான படிக்கட்டுகள்.. பளிங்குக் கற்கள் கொண்டு செய்யப்பட்ட தரை.. அழகான இயற்கைச் சூழல். ரம்மியமான சுற்றுப் புறக் காட்சி.

பாறைச் சித்திரங்களைப் பார்ப்பதற்கு முன்னர் கோயிலுக்குச் சென்று வழிபாடு செய்து விட்டு செல்வோம் என்று நினைத்துக் கொண்டு சென்றோம்.

இந்தக் கோயிலில் கருவறைக்குள் சென்று நாம் நம் தலையை பெருமாள் பாதங்களில் வைத்து வணங்கிக் கொள்ளலாம். பெரிய நாராயணப் பெருமாள் சிலை. மாலைகளாலும் ஆபரணங்களாலும் அலங்கரிக்கபப்ட்டிருந்தது. நாங்கள் ஒவ்வொருவரும் சுவாமி பாதத்தில் தலை வைத்து வேண்டிக் கொண்டு வெளியே வந்தோம். இங்கே புகைப்படம் பிடிக்கவும் தடையில்லை. அதோடு வருவோர் போவோர் கேட்கும் கேள்விகளுக்கும் கோயில் நிர்வாகத்தினரும் குருக்களும் சில தத்துவங்களும் தகவல்களும் சொல்லிக் கொண்டும் இருந்தனர். கோயிலில் இருந்த அந்த நேரம் மிகவும் மகிழ்ச்சியான தருணம். ஏதோ நம் வீட்டுக் கோயில் போன்றதொரு உணர்வு.

வெளியில் வந்தோம். வரிசையாக நான்கு பெண்கள் ஒவ்வொருவரும் தயிர்சாதம் புளியஞ்சாதம், பொங்கல், தேங்காய்சாதம் வைத்துக் கொண்டு பக்தர்களை அழைத்து உபசரித்து ப்ரசாதத்தை வழங்கினர். ப்ரசாதம் மதிய உணவு அளவு. நான்கு வகை சாதம். கேட்க வேண்டுமா. சலிக்காமல் வரிசையில் நின்று நான்கு வகை சாதத்தையும் தயங்காமல் பெற்றுக் கொண்டு அழகான ஒரு இடத்தில் உட்கார்ந்து சுற்றுச் சூழலை ரசித்துக் கொண்டே சுவைத்து சாப்பிட்டோம்.

பெருமாள் அணுக்கிரகம் .. அன்றைய மதிய உணவு விருந்தாகிப் போனது.

ஐகொந்தம் ஸ்ரீ ஸ்ரீனிவாசப் பெருமாள் கோயில்

ஸ்ரீ ஸ்ரீனிவாசப் பெருமாள்

கோயிலின் பின்னால் உள்ள மலைகள்

சுவையான ப்ரசாதம்

தொடரும்...

சுபா

கிருஷ்ணகிரிக்கு போகலாம் வாங்க...! - 6

2012-02-20T18:55:00.000+01:00

கிராமப்புரம் என்றாலே மனதைக் கவர்வது பச்சை பசுமையான சூழல்தான். சென்னையில் இரண்டு நாட்கள் இருந்து சாலை நெரிசல், புகை, குப்பை, மக்கள் கூட்டம் என இருந்து விட்டு கிருஷ்ணகிரிக்கு வந்தால் அலைச்சலின் அலுப்பு எல்லாம் ஒரு நொடியில் தொலைந்து விடும் என்பதை இங்கு வருபவர்கள் நிச்சயம் உணரமுடியும்.

பெண்ணேஸ்வர மடத்திலிருந்து புறப்பட்டு ஐகுந்தம் செல்ல பயணித்தோம். அங்கே சற்று வாகனத்தை நிறுத்தி விட்டு வழியில் தென்பட்ட ஒரு சில நடுகல்கள் பற்றிய விபரங்கள் சேகரித்துக் கொண்டு நடக்கும் போது வயல் வெளி தொடங்கியது. அங்கே ஒரு மிக அழகிய காட்சி. இந்தக் காட்சிய படம் பிடித்தஎன் காமெராவுக்கு எப்படி நன்றி சொல்லாமல் இருப்பது?

சிறிய ஓடை.. இருபுறங்களிலும் நெல்வயல். ஓடையைச் சார்ந்தவாறு தென்னை மரங்கள். கொள்ளை அழகான காட்சி. பார்த்துக் கொண்டே சில நிமிடங்கள் அங்கிருந்தேன்.

மலேசியாவில் ஓடைகளில் மீன் பிடித்து விளையாடிய ஞாபகம் உடனே வந்து விட்டது. பள்ளி விட்டு வந்ததும் பெரும்பாலும் கடற்கரையில் விளையாடச் செல்வோம். நான் பினாங்குத் தீவில் இருந்ததால். வீட்டிற்கு பக்கத்திலேயே கெர்னி ட்ரைவ் கடற்கரை இருந்தது. கடற்கரை அலுத்துப் போனால் வீட்டிற்கு சற்றுத் தள்ளி உள்ள ஓடைக்குச் செல்வோம். என் பக்கத்து விட்டு மலாய் சீன தோழிகளுடன் சென்று அங்கே குட்டி மீன்களைப் பிடித்து பாட்டலில் போட்டு வைத்து பார்ப்பது பின்னர் அதனை ஓடையிலேயே விடுவது என அப்போது நாட்கள் கழிந்தன. ஒரு சில முறை நீளமான விலாங்கு மீனையும் பிடித்து அப்படி பாட்டலில் போட்டு வைத்து பார்த்து விளையாடுவோம். இவை எல்லாம் பல வருடங்களாகியும் மனதை விட்டு அகலவில்லை.

இந்தப் பசுமையைப் பார்த்து மனதைப் பறிகொடுத்து லயித்து இருக்கவாவது இத்தொடரை வாசிப்பவர்கள் கிருஷ்ணகிரிக்கு போய்வரத்தான் வேண்டும்.

சுபா

கிருஷ்ணகிரிக்கு போகலாம் வாங்க...! - 6

2012-02-18T18:49:00.000+01:00

சில விஷயங்கள் முதல் முறையே நன்றாக அமைந்து விட்டால் அதில் ஒரு பிடிப்பு வந்து விடுகின்றது. அப்படித்தான் எனக்கு.. கத்தரிக்காய் வாங்கி பாத் செய்து பார்த்து முதல் முறையே என் உள்ளம் கவர்ந்த வகையில் சுவை அமைந்ததால் அந்த ரெசிப்பியை இன்னமும் மறக்கவில்லை. அதோடு அவ்வப்போது நினைத்தால் உடனே செய்து சாப்பிடவும் இந்த ரெசிப்பி சுலபமானதாக எனக்கு அமைந்து விட்டது.

ஆனால் இந்தப் பாயாசம் செய்வது மட்டும் எனக்கு ஏனோ இது வரை கை வராத கலையாகவே இருக்கின்றது. அதிலும் பால் பாயாசம்.

கடந்த சில ஆண்டுகளில் ஓரிரு முறை பால் பாயசம் செய்து அந்த முயற்சி பலனளிக்காது என்று சொல்லி கை விட்டு விட்டேன். எனக்கு ஞாபகம் இருப்பது ஒரு முறை நான் செய்த கடலை பருப்பு பாயசம்.. அது மட்டுமே நானே விரும்பி சாப்பிடும் வகையில் அமைந்தது. ஆனால் மீண்டும் செய்யவில்லை. ஏனோ.. அதற்கு நேரம் காலம் சரியாக அமைய வேண்டும் போல..!

சென்னையில் அன்னலக்‌ஷ்மி ரெஸ்டாரெண்டில் நல்ல சுவையான பாயசம் சாப்பிட்டிருக்கின்றேன். மெதுவாக ரசித்து ருசித்து சாப்பிட்ட அந்தப் பாயசத்தின் சுவை இன்னமும் மறக்கமுடியாது.

கிருஷ்ணகிரிக்குச் சென்றிருந்த போது ஒரு பாயசம் இப்படி கிடைத்தது. நம் செல்வமுரளியின் அம்மா ஒரு பாசிப்பயிறு தேங்காய் கலந்த ஒரு பாயசம் செய்திருந்தார். நான் மட்டுமில்லை. எங்களுடன் வந்திருந்த ஸ்வர்ணாவிற்கும் இந்தப் பாயசம் மிகப் பிடித்து விட்டது. நான் கொஞ்சம் கொஞ்சமாக ரசித்துச் சாப்பிட்டேன். அப்படி ஒரு சுவை. நன்றாக வெந்த பருப்பு அதில் தேங்காய் சர்க்கரையோ அல்லது வெல்லமோ.. வேறு என்னென்ன கலந்திருந்தார்கள் என்று தெரியவில்லை.. நினைத்தாலே மீண்டும் சாப்பிடத் தோன்றும் பாயசம்..!

செல்வமுரளியின் பெற்றோர்கள்

சுபா

கிருஷ்ணகிரிக்கு போகலாம் வாங்க...! - 5

2012-02-17T18:39:00.001+01:00

கிருஷ்ணகிரி பயணத்தில் பாறை ஓவியங்களைப் பார்க்கச் செல்வது என்று முடிவாகியிருந்தது. எங்கள் குழுவில் நான் நா.கண்ணன், செல்வமுரளி, சக்தி, ப்ரகாஷ் தவிர்த்து எங்களுடன் திரு.சுகவன முருகனும், ரவியும், திரு.முருகானந்தம் வந்திருந்தனர்.

வாகனத்தை ஓரிடத்தில் நிறுத்திவிட்டு மலைப்பகுதியில் இறங்கி நடந்தோம். இங்கே கற்கால மனிதர்கள் வரைந்த பாறை ஓவியங்களைப் பார்ப்பதற்காக எங்களை திரு.சுகவன முருகனும், திரு.முருகானந்தமும் அழைத்துச் சென்றனர். இது பற்றிய தனிப்பதிவை பின்னர் வெளியிடுவேன்.

அங்கே நான் சந்தித்த ஒரு மனிதர் பற்றித்தான் இந்தப் பதிவு.

அந்த மலைப்பகுதியில் புலியட்டைக் குட்டை என்ற பகுதியில் ஒரு குடிசை கட்டிக் கொண்டு அங்கே தனது குடும்பத்தாருடன் வாழ்கின்றார். அவரது வாழ்க்கை முறை ஆதி வாசிகள் வாழ்க்கை முறை போன்றது. மக்கள் குடியிருப்பிலிருந்து தள்ளி தனியாக அமைந்திருந்த அவர் குடிசையையும் பார்க்க முடிந்தது.

ஆடுகள் வளர்ப்பதும் சிறு பயிரிட்டு சீவனம் செய்து வாழ்கின்றார். ஆடு மேய்த்துக் கொண்டிருந்த அந்த மனிதர் நாங்கள் வந்த போது எங்கள் பின்னாலேயே வந்து சேர்ந்து நடந்து வந்து இணைந்து கொண்டார். எங்களுடனேயே பாறை ஓவியம் இருக்கும் இடம் வரை வந்து நாங்கள் பதிவு செய்வதையெல்லாம் பார்த்து அவருக்கு தெரிந்த விஷயங்களையும் கொஞ்சம் கற்பனை கதை சேர்த்து எங்களுக்குச் சொல்லிக் கொண்டே வந்தார். வரும் போதே அங்கிருந்த ஆவாரம் பூச்செடியிலிருந்து சில இதழ்களைப் பறித்து சாப்பிட்டதை நான் கவனிக்க மறக்கவில்லை.

பின்னர் பாறை ஓவியங்களைப் பார்த்து விட்டு வரும்போது எங்களுடன் பேசிக் கொண்டே ஒரு கொத்து ஆவாரம் பூவை கையில் பறித்து வைத்துக் கொண்டார்.

இந்த ஆவாரம் பூவை தினமும் காலையில் முதலில் சாப்பிடுவது வழக்கமாம். இது தனது அன்றாட வாழ்க்கை உணவில் அங்கம் வகிக்கும் ஒரு விஷயமாகி விட்டது என்று சந்தோஷமாக் சொல்லிக் கொண்டார்.

கிராமத்து வாழ்க்கையில் இப்படி பல மூலிகைகள் அன்றாட உணவில் அங்கம் வகிக்கின்றன. முருங்கை, பொன்னாங்கண்ணி, வேப்பம்பூ போன்றவை முக்கிய மூலிகைகள் என்று பரவலாகக் கேள்விப்பட்டிருக்கும் எனக்கு ஆவரம்பூவையும் தினம் சிலர் சாப்பிட்டு வருகின்றனர் என்பது புது விஷயமாகிப் போனது.

சுபா

கிருஷ்ணகிரிக்கு போகலாம் வாங்க...! - 4

2012-02-11T08:42:00.001+01:00

கிருஷ்ணகிரிக்குச் செல்வது என்று மனதில் திட்டமிட ஆரம்பித்த போதே ஒரு வித கற்பனை செய்து வைத்திருந்தேன். கற்பாறைகள், பசுமை குறைந்த மலைகள், இப்படி சற்றேரக் குறைய பாலைவனம் போன்ற ஒரு ஊர்தான் என் கற்பனையில் இருந்தது.

என்ன ஆச்சரியம்? என் எதிர்பார்ப்பை ஏமாற்றி அசர வைத்து விட்டது கிருஷ்ணகிரியின் அழகு. பார்க்கும் இடமெல்லாம் வயல் வெளி.. அங்கே இளம் பச்சை நிறத்தில் சிறு நெல் செடிகள்... தென்னை மரங்கள்.. பனை மரங்கள்..

பாரதி ராஜா தமிழ் படத்தில் வருவது போன்று அங்கே இங்கே என்று ஒரு சில ஆண்களும் பெண்களும் வயலில் வேலை செய்து கொண்டிருப்பதைப் பார்க்க முடிந்தது. அவர்களோடு எருதுகளோ.. காளையோ வயலில் நிற்பதையும் காண முடிந்த்து.

இந்த இயற்கை அழகைக் கூட்டும் வகையில் கொக்குகள் பல பறந்து வந்து வயலில் அங்கொன்றும் இங்கொன்றுமாக தென்பட்டன.

நான் மட்டுமல்ல.. என்னுடன் வந்த நா. கண்ணனுக்கும் கிருஷ்ணகிரி பிடித்துப் போய்விட்டது. இதுதான் அவருக்கும் முதல் முறை பயணம் என்பது அவரது ஆச்சரியத்திலேயே தெரிந்தது.

எதிர்பார்க்காமல் கிடைக்கும் சந்தோஷம் மிக சுவாரசியமானது இல்லையா. அதனை கிருஷ்ணகிரியில் முதல் நாளே அனுபவித்தேன்.

எம் மனம் கவர்ந்த தமிழ் நாட்டு ஊர்களின் பட்டியலில் கிருஷ்ணகிரி இப்போது இடம் பெற்று விட்டது. அடுத்த முறை செல்ல வாய்ப்பு அமைந்தால் பனங்காய்கள் காய்த்து தயாராக இருக்கும் நேரத்தில் சென்று நொங்கு சாப்பிட்டு மகிழ வேண்டும். இம்முறை இந்த வாய்ப்பு அமையவில்லை என்பது மட்டுமே ஒரு பெரும் குறையாக மனதில் இருக்கின்றது.

சுபா

கிருஷ்ணகிரிக்கு போகலாம் வாங்க...! - 3

2012-02-04T08:34:00.003+01:00

என் வாழ்க்கைத் தேவைகளில் முக்கிய அங்கம் வகிக்கும் காப்பியைப் பற்றியும் கொஞ்சம் நினைத்துப் பார்க்கிறேன்.

தமிழகத்துக்கு வந்து இறங்கியவுடன் நான் என மனதை சில விஷயங்களில் மாற்றி அமைத்துக் கொள்வேன். இது சூழலுக்கேற்ற வகையில் என்னை நான் தயார் செய்து கொள்வதற்காக. அதில் காப்பியும் ஒன்ற!

இங்கே கசப்பான காப்பி.. அதிலும் என் வீட்டில் சிறு காப்பி கொட்டை அறைக்கும் மெஷின் ஒன்று வைத்த்திருக்கிறோம். அதில் தேவைக்கேற்ப காபி போடுவதற்கு முன்னர் எத்தனை கப் தேவையோ அத்தனை கப் காப்பிக்கென்று கொட்டைகளை அறைத்துக் கொள்வோம். இங்கே குவாட்டமாலா, ஆப்பிரிக்கா, கொலம்பியா காப்பிக் கொட்டைகள் கொஞ்சம் பிரபலம். இப்படி அறைப்பதை பில்ட்டர் செய்தி அதில் கொஞ்சம் பால் சேர்த்து.. (~3 தேக்கரண்டி அளவு) சீனி சேர்க்காமல் குடிப்பது எனக்கு கடந்த 13 ஆண்டுகளாகப் பழகி விட்டது.

அதிலும் காலையில் இரண்டு பெரிய கப் காப்பியாவது கொஞ்சம் கொஞ்சமாகச் சாப்பிட்டுக் கொண்டே வேலைகளைச் செய்வது என்பதும் பழகிப் போன விஷயம். அதில் தான் எனக்கு பெரும்பாலும் சிக்கல் வரும் தமிழகத்தில்.

இங்கே சிறிய கப்பில் ..பாலில் காப்பி கலந்து சீனியும் சேர்த்து கறைத்த "காபி ப்ளேவர் பால் கோவா பானம்" அருந்துவது போல பல இடங்களில் எனக்கு நேர்ந்து விடுகின்றது. இந்தத் தமிழ் நாடு ஹோட்டலிலும் அதே நிலை.

முதலில் வாங்கிக் கொண்ட சிறிய காப்பி என்னால் சுவைத்து அருந்தவே முடியவில்லை. இரண்டாவது முறை காப்பி ஆர்டர் செய்யும் போது சர்க்கரை இல்லாமல் சற்று கூடுதல் டிக்காக்‌ஷன் சேர்த்து காப்பி தாருங்கள் எனறு கேட்டுக் கொண்டேன். காப்பி வந்தது. முன்னிருந்த காப்பியிலிருந்து எந்த வித மாறுபாடும் இல்லாத அதே காபி ப்ளேவர் பால் கோவா பானம். வெறுத்துப் போய் விட்டது எனக்கு. சரி வேறு வழியில்லையே..!

மூன்றாவது முறை மாலையில் இரவு உணவுக்குப் பின்னர் காபி கேட்டேன். இப்போது சற்று அழுத்தி சீனி சேர்க்காத சற்று கூடுதல் டிக்காக்‌ஷன் சேர்த்து காப்பி தாருங்கள் என்று கூறி விட்டு .. அப்பாடா.. ஓரளவு குடிக்கக் கூடிய அளவிலான காப்பி வரும் என்று ஆவலுடன் காத்திருந்தேன். காப்பியும் வந்தது! அதே காபி ப்ளேவர் பால் கோவா பானம் . இப்போது காபி பரிமாறியவரை அழைத்துக் கேட்டேன். உங்களிடம் சொல்லித்தானே காப்பி ஆர்டர் செய்தேன். ஏன் சர்க்கரை போட்டு தருகின்றீர்கள் என்று. அவருக்கு இப்போது சற்று புரிந்து விட்டது. இல்லை மேடம். அது காபி மெஷின். அதில் டிக்காக்‌ஷன் அளவை மாற்ற முடியாது. பால் காப்பி எல்லம் சேர்ந்தே வரும் என்றார். சரி சீனியாவது சேர்க்காமல் தரலாம் இல்லையா என்றேன். சாரி மேடம். என்று சொல்லி விட்டு நழுவி விட்டார். ஆனால் மறு நாள் காலை நான் விடவில்லை. சீனி மட்டுமாவது சேர்க்காமல் காப்பி தாருங்கள் என்று சொல்லி ஒரு காப்பி வாங்கிக் கொண்டேன்.

நான் போகும் இடங்களிலெல்லாம்.. சீனி காப்பிக்கு வேண்டாம் என்றால் உடனே .. ஐய்யோ .. பாவம். சர்க்கரை ப்ராப்ளம் இருக்கா.. என்பது சகஜமாக நான் கேட்கும் பதில்கள். எனக்கு சர்க்கரை வியாதி இல்லை.. காப்பியை அதன் கசப்புத் தன்மையோடு குடித்துப் பழகி விட்டது. என்று சொன்னால் சிலருக்கு கொஞ்சம் ஆச்சரியம் ஏற்படுகின்றது. என்ன செய்வது. எல்லாம் பழக்க தோஷம் தானே..!

கிருஷ்ணகிரி தமிழ் நாடு ஹோட்டல்

கண்ணன் ஸ்வர்ணா குழந்தையுடன்

ஸ்வர்ணாவும் சுபாவும்..

ஸ்வர்ணாவின் மாமனார், தினமணி நிருபர் ரவி, ப்ரகாஷ், ஸ்வர்ணா, சுபா.

தொடரும்...!

சுபா

கிருஷ்ணகிரிக்கு போகலாம் வாங்க...! - 2

2012-01-29T08:33:00.000+01:00

தமிழ்நாடு ஹோட்டல் சாலை ஓரத்திலேயே இருந்ததால் எங்களுக்குச் சிரமம் இல்லாமல் போனது. சாலையில் இறங்கியதும் சுற்றும் முற்றும் பார்த்தால் என்னையும் கண்ணனையும் தவிர வேறு யாரும் இல்லை. ஹோட்டல் வெளிக்கதவு சாத்தியிருந்தது. இந்த ஹோட்டலாகத் தான் இருக்கும் என்று மனதில் நினைத்துக் கொண்டு இரும்பு கதவைத் திறந்து உள்ளே சென்று வரவேற்பு பகுதிக்குச் சென்று மெதுவாக யாரும் இருக்கின்றார்களா எனக் கூப்பிட்டு பார்த்தேன்.

படுத்திருந்திருப்பார் போல.. ஒருவர் உடனே எழுந்து வந்து ..நான் ஏதும் சொல்வதற்கு முன்னரே.. நீங்கள் ரெண்டு பேர் தானே. உங்களுக்கான அறைகள் ஒதுக்கி வைத்து விட்டோம். நீங்கள் வந்ததும் ப்ரகாஷ் கூப்பிடச் சொன்னார். கூப்பிடட்டுமா.. என்று கேட்டுக் கொண்டு எனக்கும் கண்ணனுக்கும் அறைச் சாவிகளை வழங்கினார்.

வேண்டாம் .. காலையில் பேசுவோம்.. ப்ரகாஷ் இப்போது தூங்கட்டும் என்று சொல்லிவிட்டு நாங்கள் எங்கள் அறைகள் இருந்த பகுதிக்கு வெளியே பெட்டியை இழுத்துக் கொண்டு நடந்தோம். அறை மிக நன்றாக அமைந்திருந்தது. விசாலமான அறையும் குளியல் அறையும் கூட.

செல்வ முரளியும் நண்பர் சக்தியுடன் வந்து சேர்ந்து விட்டார். காலை 7 மணிக்கு பூங்காவில் நம் நண்பர்கள் ப்ரகாஷ், செல்வா அவர் நண்பர் சக்தி எல்லோரும் சந்தித்தோம். பல மாதங்களுக்குப் பிறகு மீணுட்ம் சந்திப்பது மகிழ்ச்சி தரும் விஷயமல்லவா. பேசிக்கொண்டிருந்தால் மட்டும் போதுமா. காலையில் காப்பி சாப்பிடாமல் எப்படி?

காபி ஆர்டர் செய்து வாங்கி வெளியில் இயற்கையை ரசித்துக் கொண்டே சாப்பிடலாம் என்றால் எங்களுக்கு போட்டி போட்டுக் கொண்டு குரங்குகள் வந்து சேர்ந்து விட்டன. எங்கள் கையில் இருந்த பேப்பர் கப் காபி அவற்றிற்குப் பிடித்து விட்டது. எங்கள் முகத்தையும் கையையும் மாறி மாறி பார்த்துக் கொண்டு அவை அருகிலேயே உட்கார்ந்து விட்டன.

கொஞ்சம் காபியுடன் ஒரு பேப்பர்கப்பை நாங்கள் வைத்தோம். பாவம் பார்த்துக் கொண்டே இருக்கின்றனவே என்று. அவையும் காபி குடித்து பழகியிருக்குமோ என்ற சந்தேகத்தில். அதில் ஒரு குரங்கு அதை ஓடி வந்து எடுத்துக் கொண்டு ரெண்டு கைகளாலும் அந்தக் கப்பை எடுத்து, அதில் மீதம் இருந்த காபியைக் கொட்டி விட்டு அந்தக் கப்பை கிழி கிழி என்று கிழித்து போட்டு விட்டது.
அதேபோல அடுத்த கப்பையும்.. குரங்கு கையில் கிடைத்த பூமாலைப் போல என்று எப்போதோ படித்த பழமொழி தான் ஞாபகம் வந்தது.

மனிதர்களோடு சேர்ந்து குப்பை போடுவதில் குரங்குகளும் போட்டி போடுகின்றன. நாம் அதற்கு உதாரணமா அல்லது அவை நமக்கு உதாரணமா என்று யோசிக்கத்தான் வேண்டும்..

கிருஷ்ணகிரிக்கு போகலாம் வாங்க...! - 1

2012-01-28T08:20:00.001+01:00

தலைப்பைப் பார்த்ததுமே கிருஷ்ணகிரிக்குச் செல்ல ஆசை வருகிறதா? இரண்டு நாள் பயணத்தில் நான் நமது நண்பர்கள் குழுவினருடன் கிருஷ்ணகிரிக்குச் சென்று வந்த விஷயத்தை இங்கே பகிர்ந்து கொள்ளலாம் என நினைக்கிறேன். பதிவுகள் வேறொரு இழையில் பதிய நினைத்திருக்கிறேன். இந்த இழையில் கிருஷ்ணகிரியில் எங்கள் அனுபவம் என்பதாக மட்டுமே பதிய விரும்புகிறேன். இந்தப் பயணத்தில் கலந்து கொண்ட நா.கண்ணன், செல்வா, ஸ்வர்ணா, கவி.செங்குட்டுவன், ப்ரகாஷ் சுகுமாரன் ஆகியோரும் இங்கே உங்கள் கருத்துக்களை இணைத்துக் கொள்ளுங்கள்.

சரி முதலில் பயணத்தில் கலந்து கொண்டவர்களின் முகங்களை அறிமுகப்படுத்துவது அவசியம் இல்லையா... இந்தப் பதிவில் முகங்களும் பெயர்களும் மட்டும்..!

திரு.சுகவனம் முருகன்

பாலகன் முரளி

சுபா + கண்ணன்

ரவி

ஸ்வர்ணா குழந்தையுடன்

சக்தி

திரு.திருமதி கவி.செங்குட்டுவன்

ப்ரகாஷ்

தொடரும்...

அன்புடன்
சுபா

அயர்லாந்தின் அழகில்... பகுதி 5

2011-12-30T15:47:00.003+01:00

டப்ளின் நகர சாலைகளில்

அயர்லாந்தின் மிக முக்கிய நகரம், தலை நகரம், வர்த்தக நகரம் என்ற சிறப்புக்களோடு கலைத்துவமும் பரிமளிக்கும் ஒரு நகரம் டப்ளின். எங்கள் பயணத்தின் இரண்டாம் நாள் ஒரு நாள் முழுதும் இந்த நகரத்தை நாங்கள் சுற்றிப் பார்க்க எங்களுக்கு வாய்ப்பு அமைந்தது. காலையில் தங்கும் விடுதியிலேயே ஐரிஷ் வகை காலை உணவு. இதில் பிரத்தியேகமாக ஏதும் காணப்படவில்லை. லண்டனில் காலை உணவு சாப்பிட்டவர்களுக்கு இதற்கும் அயர்லாந்தில் தங்கும் விடுதிகளில் கிடைக்கும் உணவிற்கு வித்தியாசம் இல்லாமல் இருப்பதை உணரலாம். இங்கிலீஷ் உணவு வகைகள் போலவே டோஸ்ட் ரொட்டி, முட்டை, சாசேஜ், தேனீர், காப்பி, பழங்கள் என அமைந்திருக்கும். சற்று அலுப்பைத் தரக்கூடிய ஒரு காலை உணவு. எனக்கு பிடிக்காத காலை உணவு வகை. பிடிக்கவில்லையென்றாலும் காப்பியும் ஜேம் தடவிய ரொட்டியும் சாப்பிட்டு நாங்கள் புறப்பட்டோம்.

டப்ளினில் பார்ப்பதற்கு பல இடங்கள் உள்ளன. அவை எல்லாவற்றையும் எங்களுக்குள்ள நேரத்தில் பார்த்து முடிக்க முடியாது என்ற காரணத்தால் பகலில் சாலையில் நடந்து சென்று எந்த இடங்களைப் பார்த்து வரலாம் என திட்டமிட்டோம். எங்கள் பயண திட்டத்தில் மேலும் ஒரு நாள் இறுதியாக டப்ளினில் இருக்கும் வகையில் பயண நிறுவனம் ஏற்பாடு செய்திருந்தது. ஆக அவசரப் பட்டுக் கொண்டு செல்லாமல் நிதானமாக முக்கிய இடங்களைப் பார்த்து தகவல்கள் சேகரித்து வருவதோடு டப்ளின் சாலைகளில் நடந்து மக்களையும் சாலை காட்சிகளையும் கண்டு களிக்க வேண்டும் என்றும் ஆவல் இருந்தது. ஆக இரண்டு இடங்களை மட்டும் பார்ப்போம் என முடிவு செய்து கொண்டோம்.

டப்ளினுக்கு சிறப்பு சேர்க்கும் சுற்றுலா தளங்களில் முக்கிய இடங்களாக கீழ்க்கண்பவற்றை குறிப்பிடலாம்.
-ட்ரினிடி காலேஜ், நூலகம்
-கெல்ஸ் புத்தகம்
-டப்ளின் கோட்டை
-டப்ளின் துறைமுகம்
-ஃபீனிக்ஸ் பார்க்
-செயிண்ட் பேட்ரிக் கேத்தீட்ரல்
-க்ரிஸ்ட் சர்ச் கெத்தீட்ரல்
-டெம்பல் பார்
-கின்னஸ் ஸ்டோர்
-டப்ளின் மிருகக்காட்சி சாலை

இதில் ஏற்கனவே வந்திறங்கிய முதல் நாளே ட்ரினிடி காலேஜ், நூலகம், கெல்ஸ் புத்தகம் ஆகிய இரண்டையும் பார்த்து விட்டமையால் இரண்டாம் நாள் டப்ளின் கோட்டையையும், கின்னஸ் ஸ்டோர் தொழிற்சாலையையும் பார்த்து விட்டு சர்ச் கெத்தீட்ரல் பார்த்து வருவோம் என முடிவு செய்து கொண்டோம். இவை மூன்றுமே டப்ளின் நகர மையத்திலேயே இருப்பதால் நடந்தே சென்று வருவோம் என்று முடிவு செய்து கொண்டோம். முதல் நாள் டப்ளின் வந்திருந்தமையால் ஏறக்குறைய இவை இருக்கின்ற இடங்களை அறிந்திருந்தோம். ஆக இவற்றைத் தேடித் திரிய வேண்டிய அவசியமிருக்கவில்லை. அத்தோடு எங்கள் பயண வழிகாட்டி எங்களுக்கு டப்ளின் நகர சாலை வரைபடம் ஒன்றையும் அளித்திருந்தார் அதில் மிகத் தெளிவாக சாலை வரைபடங்கள் சுற்றுப்பயணிகள் பார்க்க வேண்டிய முக்கிய இடங்கள் ஆகியவை பெயர்களோடும் குறியீடுகளோடும் வழங்கப்பட்டிருந்தன.

காலை 10 மணி அளவில் எங்களைச் சுற்றுலா பஸ் அழைத்து வந்து ட்ரினிட்டி காலேஜ் வளாகத்தின் மேற்கு புறக் கதவின் அருகில் இறக்கி விட்டுச் சென்று விட்டது. சுதந்திரமாக ஒரு நாள் டப்ளினில் கூட்டமாக இல்லாமல் தனியாகச் சென்று நமக்குப் பிடித்த வகையில் நேரம் எடுத்துக் கொண்டு பார்க்க விரும்பும் விஷயங்களைப் பார்த்து வரலாம் என்ற நினைப்பே ஒரு விதத்தில் மகிழ்ச்சியளிப்பதாக இருந்தது. சில வேளைகளில் குழுவாக பயணிப்பது சுவாரசியமளிக்கும் ஒன்று தான். ஆனால் சில வேளைகளில் அது நச்சரிப்பாகவும் அமைந்து விட வாய்ப்புண்டு. அப்படிப்பட்ட அனுபவமும் 2 முறை எங்களுக்கு நிகழ்ந்தது. அதனைப் பிறகு குறிப்பிடுகிறேன்.

அன்று காலை சற்று மேக மூட்டமாகவும் சீதோஷ்ணம் ஏறக்குறைய 17 டிகிரி வாக்கிலும் அமைந்திருந்தது. காலையில் பயணம் ஆரம்பித்த சமயம் சிறு தூரலும் இருந்தது. அயர்லாந்தின் சீதோஷ்ணம் பற்றி தனியாக ஒரு பதிவிட வேண்டும். இங்கே குடையில்லாமல் செல்லக்கூடாது என்பதை முன்னரே தெரிந்திருந்ததால் நான் எனது பேக்பேக்கில் ஒரு குடையும் வைத்திருந்தது மிகவும் பயணளித்தது என்றே சொல்ல வேண்டும். ஆனால் சற்று நேரத்தில் தூரல் நின்று சூரியன் இன்முகத்தைக் காட்டி பிரகாசமாக சிரிக்க, சாலையில் நடந்தே வேடிக்கைப் பார்த்துக் கொண்டே பயணம் செல்வது சுவாரசியமாக அமைந்தது.

ட்ரினிடி காலேஜ் வாசலிலிருந்து இறங்கி நேராக நடந்து டேம் (Dame Street) சாலைக்குச் செல்ல வேண்டியிருந்தது. டப்ளின் கோட்டை இப்பகுதியில் தான் அமைந்துள்ளது. கூகள் வரைபடத்தைக் காண்க.

டப்ளின் கோட்டைக்குச் செல்லும் வழியில் சாலையின் இரண்டு பகுதிகளில் உள்ள கடைகளையும் மக்கள் கூட்டத்தையும் பார்த்துக் கொண்டே சென்றோம். ஏறக்குறைய 525,000 மக்கள் தொகை கொண்ட நகரம். இங்கு பெரும்பாலானோர் ஐரிஷ் இனத்தவர்களே. டப்ளினில் மட்டுமல்ல (Republic of Ireland) அயர்லாந்து முழுதும் கேலிக் கத்தோலிக்க வகை பண்பாட்டு சமயத்தைச் சார்ந்தவர்களே மிகப் பெறும்பாண்மையினர். ஒரு குறைவான அளவில் ஐரோப்பாவின் பிற பகுதிகளான இத்தாலியர்கள், ஜெர்மானியர்கள், ஸ்பேனீஷ்காரர்கள் இருக்கின்றார்கள். மிகக் குறைந்த எண்ணிக்கையிலான இங்கிலாந்து மக்களும் இருக்கின்றனர். ஆசிய மக்களையும் ஆங்காங்கே காண முடிந்தது. இந்தியர்கள், ஜப்பானியர்கள், சீனர்கள், வியட்னாமியர்கள், தாய் மக்கள் சிலர் டப்ளின் நகரில் வசிக்கின்றனர் என்பதை சாலையில் செல்வோரைப் பார்த்தே தெரிந்து கொள்ள முடிந்தது. ஆங்காங்கே சீன உணவகங்கள், தாய் உணவகங்கள், இந்திய உணவகங்கள் இருக்கின்றன. ஒரு மலாய் உணவகமும் கூட ஒன்று இருப்பதைப் பார்த்து அதிசயித்தேன்.

டப்ளின் ஒரு கலாச்சார மையம் என்றால் அது மிகையில்லை. சாலையில் ஆங்காங்கே இசைக்கலைஞர்கள் வாத்தியங்களை வாசித்துக் கொண்டு இசை மணம் பறப்பிக் கொண்டிருக்கும் காட்சி இந்த நகரத்திற்கு உயிரூட்டும் ஒன்று.

டப்ளின் நகரின் மத்தியில் குறிப்பிட்ட சில பகுதிகளில் அமைந்திருக்கும் ஜியோர்ஜியன் டப்ளின் கட்டிடங்களின் (வீடுகளின்) கதவுகள் பிரத்தியேகமாக வடிவமைக்கப்பட்டவை. வெள்ளை நிற தொடர் வீடுகளுக்குக் கண்களைப் பளிச்செனக் கவரும் கவர்ச்சியான வர்ணத்தில் அமைக்கப்பட்ட கதவுகளும் அதற்கு எழில் சேர்க்கும் கருப்பு நிற கைப்பிடிகளும் பார்ப்பதற்கே மிக அழகு. இவை ஜியோர்ஜியன் (Georgian) வகை கட்டிடக் கலையின் எச்சங்களாக இன்றும் டப்ளின் நகரத்தை அலங்கரிப்பவை. ஜியோர்ஜியன் டப்ளின் பற்றி மேலும் பிறகு தொடர்கிறேன்.

நகர மையம்

இங்கே 10 யூரோவுக்கு ஆண்கள் தலை முடி வெட்டிக் கொள்ளலாம்.. இன்றைய ஆபர்..!

களிமண்ணில் உருவாகும் நாய்குட்டி வடிவங்கள்.. கலைத்திறன் நாய் குட்டியின் கண்களில் தெரிகின்றது.

சாலையோர இசைக் கலைஞர்கள்

ஜியோர்ஜியன் வகை வீடுகள்

இந்திய உணவகம் ஒன்று .. டப்ளின் நகரில்

பெண்கள் சிகை அலங்காரம் செது கொள்ள பல வர்ணங்களில் வல வகைகளில் தலை முடி.

சாலையைச் சுற்றிப் பார்க்க் ரிக்‌ஷா வண்டி.

தொடரும்..

அன்புடன்
சுபா

அயர்லாந்தின் அழகில் - பகுதி 4

2011-12-16T13:47:00.001+01:00

டப்ளினில் முதல் நாள்

ப்ராங்க்பெர்ட் விமான நிலையத்திலிருந்து ஏறக்குறைய 2 மணி நேர விமானப் பயணத்திற்குப் பின்னர் டப்ளினை வந்தடைந்தோம். ஏர் லிங்குஸ் அயர்லாந்தின் விமான நிறுவனம். நாங்கள் பயணித்த விமானத்தில் பணி நிமித்தம் பயணிப்பவர்களும் குடும்பத்தினரைக் காணச் செல்பவர்களும் என ஏறக்குறைய விமானம் நிரம்பி இருந்தது.

டப்ளினை வந்திறங்கியவுடன் எங்கள் பயண வழிகாட்டி நிச்சயமாகக் காத்திருப்பார் என்ற எண்ணம் மனதில் இருந்தது. பணம் மாற்றிக் கொள்ளத் தேவையில்லை என்று உறுதியானவுடன் அவரைத் தேடிக் கொண்டு வந்து சேர்ந்தோம். நாங்கள் பதிவு செய்திருந்த சுற்றுலா நிறுவனத்தின் பெயர் பலகையை கையில் ஏந்திக் கொண்டு ஜொஅன்னா நின்று கொண்டிருந்தார். எங்களுக்கு முன்னரே எங்களுடன் பயணித்து வந்திருந்த 4 ஜோடிகள் அவர்கள் பயணப் பெட்டிகளுடன் நின்று கொண்டிருந்தனர். நானும் என் கணவரும் தான் சற்று தாமதமாக வந்து சேர்ந்திருக்கிறோம். எங்களைப் பார்த்த மகிழ்ச்சியில் தன்னை அறிமுகப்படுத்திக் கொண்டு எங்கள் பெயரைக் கேட்டு பதிவு அட்டையை சரிபார்த்துக் கொண்டு எங்களை அழைத்துக் கொண்டு பேருந்து இருக்கும் இடத்திற்கு அழைத்துச் சென்றார்.

பேருந்தில் எங்களை ஏற்றி விட்டு வாகனமோட்டியிடம் நாங்கள் செல்ல வேண்டிய தங்கும் விடுதி இருக்கும் இடம் பற்றிய விளக்கம் சொல்லி விட்டு நாங்கள் இன்று நாள் முழுதும் எங்களுக்குப் பிடித்த வகையில் பொழுதை போக்கலாம் என்று சுதந்திரத்தையும் வழங்கி விட்டு விடைபெற்றுக் கொண்டார். முப்பது நிமிட நேர பயணத்தில் டப்ளின் நகரின் தொழிற்சாலை பகுதி நிறைந்த இடங்களில் பயணிப்பது ஒரு வித அலுப்பாக இருந்தது.

எங்களுக்கு 2 நாட்கள் தங்க வழக்கப்பட்டிருந்த தங்கும் விடுதி அமைந்திருந்தது ஒரு தொழிற்பேட்டை அமைந்த பகுதி. சற்று ஏமாற்றமாகிப் போனது எனக்கு. சுற்று முற்றும் கட்டிடங்களும் நிறுவனங்களும். சரி. அதிகம் வறுத்தப்பட வேண்டாம் என சமாதானம் செய்து கொண்டு தங்கும் விடுதிக்குள் சென்று பெயர் பதிவுகளைச் சரியாக செய்து அறைக்கான சாவியைப் பெற்றுக் கொண்டோம். எங்களுடன் சேர்ந்து வந்திருந்த ஏனைய ஜோடிகளுக்கும் எங்களுக்கும் தங்கும் விடுதியினர் வரவேற்கும் முகமாக ஐரீஷ் காப்பி வழங்கினர். இது வரை இதனை அருந்த வாய்ப்பமைந்ததில்லை. நானும் தேடிப்போய் வாங்கி அருந்தியதில்லை. சுவை கசப்பும் இனிப்பும் கலந்த ஒரு கலவையாக இருந்தது. அடிப்படையில் ஐரீஷ் காப்பி என்பது நன்கு தயாரிக்கப்பட்ட காப்பி, சர்க்கரை, ஐரிஷ் விஸ்கி ஆகியவை கலந்து செய்யப்பட்ட ஒரு பானம்.

அறைக்குச் சென்று எங்களைத் தயார்படுத்திக் கொண்டு ஏற்கனவே கொண்டு வந்திருந்த அயர்லாந்து சுற்றுப்பயண வழிகாட்டு புத்தகத்த்தில் டப்ளின் சென்று என்னென்ன பார்த்து வரலாம் என்று தேடி சிறு பட்டியல் போட்டுக் கொண்டோம்.ஜொஅன்னா எங்களிடம் தந்திருந்த தகவலின் படி 79a பேருந்தில் ஏறி ட்ரினிடி காலோஜ் நிறுத்ததில் இறங்கிக் கொண்டால் எல்லா முக்கிய இடங்களையும் கட்டிடங்களையும் பார்த்து வரலாம். ஆக, உடனே தயாராகி தங்கும் விடுதியிலிருந்து புறப்பட்டு 79a பேருந்து எடுத்து டப்ளின் நகருக்குப் பயணித்தோம். எங்களுடன் முதலில் விமான நிலையத்தில் சந்தித்த மற்றொரு ஜோடியும் இணைந்து கொண்டனர். இரண்டு அடுக்கு பஸ். மேலே ஏறி அமர்ந்து கொண்டதால் சாலைகளையும் வீடுகளையும் வீடுகளின் தோற்றத்தையும் பார்த்துக் கொண்டு செல்ல முடிந்தது. மேலும் பழைய வரலாற்றுச் சிறப்பு மிக்க கட்டிடங்களை ஆங்காங்கே காண முடிந்தது. நகருக்கு சற்று அருகாமையில் செல்லும் வழியிலேயே கண்ணில் ஒபிலிஸ்க் ஒன்றும் தென்பட்டது.

Trinity College நிறுத்ததில் இறங்கிக் கொண்டோம். 1579ல் கட்டப்பட்டதாக குறிப்பிடப்படும் இந்த ட்ரினிட்டி கோலேஜ் மிகப் பழமை வாய்ந்ததும் உலகப் பிரசித்தி பெற்ற ஒரு பல்கலைக்கழகமுமாகும். உள்ளே நுழைந்தபோது வாசலில் இங்கே 10யூரோவுக்கு ட்ரினிட்டி கோலேஜ் பற்றிய வழிகாட்டலும் விளக்கமும் வழங்கப்படும் என்ற ஒரு பலகையை வைத்துக் கொண்டு ஒரு மாணவி நின்று கொண்டிருந்தார். அவரிடம் இரண்டு டிக்கெட்டுகளைப் பெற்றுக் கொண்டு சில நிமிடங்கள் காத்திருந்தோம். டிக்கெட் பெற்றுக் கொண்ட எங்கள் அனைவரையும் வரவேற்று தன்னையும் அறிமுகப்படுத்திக் கொண்டு அந்த மாணவி எங்களுக்கு ட்ரினிடி கோலேஜ் பற்றி விளக்கம் கொடுக்கலானார். இப்படி பணியாற்றும் வாய்ப்பு இங்கு வரலாற்றுத் துறையில் இறுதி ஆண்டில் கல்வி பயிலும் மாணவர்களுக்கு வழங்கப்படுகின்றது. இந்த மாணவி ஜெர்மானிய வரலாறு, பொது வரலாறு ஆகிய துறைகளில் படித்துக் கொண்டிருப்பவர்.

அயர்லாந்தின் மிகப் பழமையான பல்கலைக்கழகம் என்ற சிறப்புப் பெற்றது மட்டுமல்லாமல் அயர்லாந்தின் அரசியல் மாற்றங்களிலும் பங்கு வகித்த பெருமை இந்தப் பல்கலைக்கழகத்திற்கு உண்டு. 16ம் நூற்றாண்டில், டப்ளினில் வாழ்ந்த மக்கள் எலிஸபெத் மகாராணியிடம் அனுமதி பெற்று தங்களுக்கு டப்ளின் நகரில் பல்கலைக்கழகத்தை 1592ம் ஆண்டில் உருவாக்கினர். 18ம் நூற்றாண்டு வாக்கில் இது ப்ரோட்டெஸ்டண்ட் சமயத்தை அடிப்படையாகக் கொண்டு இயங்கிக் கொண்டிருந்தது. இக்கால கட்டத்தில் நாட்டில் சற்று அமைதியும் நிலவி வந்ததால் அயர்லாந்தின் அரசியல் பிரமுககர்கள் பலரது குழந்தைகள் தங்கள் கல்வியை இங்கு மேற்கொண்டிருந்தனர் என்பதும் குறிப்பிடத்தக்கது.

இந்தப் பல்கலைக்கழகத்தில் முதல் பெண் மாணவி 1904ம் ஆண்டில் இணைக்கப்பட்டிருக்கின்றார். அடுத்த பத்து ஆண்டுகளில் பெண் மாணவியர்களின் எண்ணிக்கை 16% க்கு உயர்ந்திருக்கின்றது. முதலில் பெண்கள் இப்பல்கலைக்கழக்த்தில் க்ல்வி பயில பெறும் எதிர்ப்பு இருந்திருக்கின்றது. இதனை மாற்றி தற்சமயம் பல பெண்கள் இங்கே கல்வி பயில்கின்றார்கள் என்று சிரித்துக் கொண்டே எங்களுக்கு விளக்கமளித்துக் கொண்டு சென்ற மாணவி குறிப்பிட்டார்.

ட்ரினிடி காலேஜ் 40 ஏக்கர் நிலப்பரப்பில் அமைக்கப்பட்டுள்ள ஒரு பல்கலைக்கழகம். இங்கே மருத்துவம், வரலாறு, உளவியல், தியோலொஜி. சட்டம் ஆகியவை முக்கிய துறைகளாக விளங்குகின்றன. மாணவர்களின் தங்கும் விடுதி. உணவு விடுதி, கடைகள் ஆகியவையும் வளாகத்தின் உள்ளேயே அமைந்துள்ளன.

இப்போது இருக்கும் இந்தக் கல்லூரியின் நூலகம் 1712ம் ஆண்டு கட்டப்பட்டது. 200,000 பழம் நூல்கள் இந்தநூலகத்தில் பாதுகாப்பில் வைக்கப்பட்டுள்ளன. உள்ளே புகைப்படங்கள் எடுக்க அனுமதி வழங்கப்படவில்லை. நூல்களில் இத்தனை விதமா என வியக்க வைக்கும் அளவு மிகப்பெரிய நூல்களின் வகைகள், நடுத்தர அளவிலானவை சிறிவமை மிகச் சிறியன என பல்வேறு வகையில் நூல்கள் பகுதி பகுதியாகத் தொகுத்து வைக்கபப்ட்டிருக்கின்றன. இந்த நூலகத்தின் நடுவே மருத்துவ ஆய்வுகளை வெளிப்படுத்தும் ஆய்வுக் குறிப்புக்கள், கண்டுபிடிப்புக்கள் அனைத்தும் விளக்கங்களுடன் பார்வைக்கு வைக்கப்பட்டுள்ளன.

நூலகத்தின் உள்ளே செல்லும் போது வலது புறம் அமைந்துள்ள பகுதிக்குச் சென்றால் அங்கே புக் ஆஃப் கெல்ஸ் வைக்கப்பட்டிருக்கும் பகுதியைப் பார்த்து, அதன் விளக்கங்களையும் வாசித்து பின்னர் நூலையும் பார்க்கலாம். அதே கட்டிடத்தின் வழியாகவே நூலகத்தின் Long Room (நீண்ட அறை) சென்று அங்கு வைக்கப்பட்டிருக்கும் இந்த பிரமிப்பூட்டும் அனுபவத்தைப் பெறலாம். இந்த 200,000 நூல்கள் உள்ள அறையின் உள்ளே செல்வதே பிரமிப்பாக இருந்த்து. அந்த வேளை அந்த அறைக்குள் நுழையும் அனைவருக்க்மே ஒரு வித வித்தியாசமான ஏதோ ஒரு வகையில் நிறைவளிக்கும் ஒரு நிலை தோன்றும் என்றே எனக்கு அப்போது மனதில் தோன்றியதை எனது குறிப்பில் குறித்து வைத்திருக்கிறேன். அங்கிருந்தவர்களின் முகத்திலும் நான் அனுபவித்த அந்த பிரமிப்பு தெரிந்தது. ஒரு வேளை என் மனம் அப்படி நினைத்திருக்கலாம். ஆனாலும் அது ஒரு வித்தியாசமான ஒரு அனுபவம் என்பதில் மறுப்பில்லை.

213 அடி நீளமும் 42 அடி உயரமும் உள்ள இந்தக் கட்டிடத்தில் 200,00 நூல்கள் உள்ளன. ட்ரினிடி பல்கலைக்கழகத்தில் மொத்தம் மூன்று மில்லியன் நூல்கள் உள்ளன. அதில் இந்த நீளமான அறையில் மட்டுமே 200,000 நூல்கள் அடங்கியிருக்கின்றன.

இங்கே சென்றால் இணையத்திலேயே 3டி பனோராமா காட்சியாக இந்த நீண்ட அறையை கண்டு ரசிக்கலாம். பார்க்க மறக்க வேண்டாம். http://www.panoramicireland.com/arch/trinity.html

தொடரும்....!

அன்புடன்
சுபா

அயர்லாந்தின் அழகில் - பகுதி 3

2011-12-11T13:29:00.004+01:00

கெல்ஸ் நூல் (The book of Kells)

கெல்ஸ் நூல் (The book of Kells) எனப்படும் கிறிஸ்துவ கோஸ்பல் பாடல்கள் கொண்ட நூல் பற்றி ஒரு சிலர் அறிந்திருக்கலாம். இது 9ம் நூற்றாண்டில் முழுதாக வடிவமைக்கப்பட்ட ஒரு நூல். எழுதிய நூல் என்று சொல்வதை விட வடிவமைக்கப்பட்ட அல்லது தயாரிக்கப்பட்ட நூல் என்று சொல்வது மிகப் பொருந்தும். இன்னூலில் லத்தின் மொழியில் புதிய டெஸ்டமனில் உள்ள நான்கு கோஸ்பல்கள் அடங்கியுள்ளன. இவற்றுடன் பல வாசகங்கள் ஓவியங்கள் நிறைந்துள்ள ஒரு கலை நயம் மிக்க நூல் இது.

நூலில் உள்ள ஒரு பக்கம்

இந்த நூல் செல்ட்டிக் பாரம்பரியத்தில் ஊறிய கிறிஸ்துவ பாதிரிமார்களால் உருவாக்கப்பட்டது. இந்த நூலின் காலம் ஏறக்குறை கி.பி 800 அல்லது அதற்கும் முந்தைய ஆண்டுகளாக இருக்கலாம் என வரலாற்றாசிரியர்கள் நம்புகின்றனர்.

இந்த நூலின் சிறப்பு என்று சொன்னால் கோஸ்பல் பாடல்களையும் விளக்கங்களையும் வாசகங்களையும் சுற்றிலும் தீட்டப்பட்டுள்ள கவின்மிகு ஓவியங்கள் எனலாம். இவை செல்ட்டிக் பாரம்பரியத்தின் தாக்கத்தை மிகத் தெளிவாக எடுத்துக் காட்டுவனவாக உள்ளமையே இதன் சிறப்பு.

செல்ட்டிக் குறியீடுகளோடு கலந்து வடிக்கப்பட்ட எழுத்துக்கள்

புக் ஆஃப் கெல்ஸில் அடங்கியுள்ள ஓவியங்கள் கிறிஸ்துவ பாரம்பரிய சின்னங்களை உள்ளடக்கியதாகவும் அதே வேளை செல்ட்டிக் பாரம்பரியத்தின் மிக முக்கிய சின்னங்களான மனித உருவங்கள், மிருகங்கள், சுற்றி வளைத்து சூழும் பாம்பு, மாய உருவங்கள் ஆகியவற்றைக் கொண்டிருக்கின்றது. அதோடு செல்ட்டிக் பாரம்பரியத்தின் அடிப்படை சின்னமான செல்ட்டிக் முடிச்சு மிகத் தெளிவான கவர்ச்சியான வர்ணங்களில் நூல் முழுதும் இடம் பெறுகின்றது. இந்த நூல் எந்த அளவிற்கு புதிதாக அயர்லாந்துக்கு ஆறாம் நூற்றாண்டில் நுழைந்த கிறிஸ்துவ சமயம் அயர்லாந்தின் பாரம்பரிய செல்ட்டிக் வழக்கங்களை உட்கொண்டு வளம் பெறுகின்றது என்பதற்கு சான்றாகவும் அமைகின்றது.

செல்ட்டிக் குறியீடுகள்

நான்கு பகுதிகளாக பிரிக்கப்பட்டு இந்த நூல் தற்சமயம் டப்ளினில் உள்ள ட்ரினிட்டி கோலேஜ் நூலகத்தில் (Trinity College Library) பாதுகாக்கப்படு வருகின்றது.

அயர்லாந்தின் மிகப் பெரிய பொக்கிஷமாக இந்த நூல் இன்று கருதப்படுகின்றது. புக் ஆஃப் கெல்ஸ் நூல் மிகப் பிரபலமானதாகவும், மிக நுணுக்கமாகவும் தயாரிக்கப்பட்ட ஒரு நூல் என்பதும் முக்கிய குறிப்பாகும். ஐயோனா தீவு, மற்றும் அயர்லாந்தின் கெல்ஸ் நகரில் மடம் அமைத்து இங்கு கிற்ஸ்துவ மதத்தைப் பரவச் செய்த பாதிரிமார்களின் அரிய ஒரு கலைப்படைப்பு இந்த நூல்.

செல்ட்டிக் குறியீடுகளில் ஒன்று

இந்த நூலின் அசல், ட்ரினிட்டி கோலேஜ் நூலகத்தில் உள்ளது என மேலே குறிப்பிட்டேன். இதனை அச்சு வடிவத்தில் பதிப்பித்திருக்கின்றனர். மிகக் குறிப்பிடத்தக்க எண்ணிக்கையில் மட்டுமே இவை பதிப்பிக்கப்பட்டிருக்கின்றன. 1990ஆம் ஆண்டின் ஒரு கட்டுரையின் படி ஒரு நூலின் 1990 ஆம் விலை $18,000 என குறிப்பிடப்பட்டுள்ளது. இப்போது இன்னூலின் விலை மேலும் அதிகரித்திருக்கலாம் என நம்பலாம்.

செல்ட்டிக் குறியீடுகளில் ஒன்று

இந்த நூல் எப்படி ட்ரினிட்டி கோலேஜ்க்கு வந்தது என பார்ப்போம்.

அடிப்படையில் இது கையால் வர்ணம் தீட்டி எழுத்துக்களைக் கோர்த்து வடிக்கப்பட்ட ஒரு நூல். இதன் பக்கங்கள் அனைத்திலும் இருக்கும் வர்ண ஓவிய வேலைப்பாடுகளை மூன்று பாதிரிமார்கள் செய்திருக்கின்றனர். எழுத்துக்களை நான்கு பாதிரிமார்கள் வடித்திருக்கின்றனர். கி.பி 800ம் ஆண்டு வாக்கில் முடிக்கப்பட்ட இந்த நூல் அயர்லாந்தின் கெல்ஸ் நகரில் உள்ள கிறிஸ்துவ மடத்தில் நிறைவு செய்யப்பட்டதால் அந்த நகரின் பெயரிலே வழங்கப்படுகிறது. அயர்லாந்துக்கும் ஸ்கோட்லண்டுக்கும் இடையில் உள்ள ஐயோனா (Iona) தீவில் உள்ள கிறிஸ்துவ மடத்தில் இதன் ஆரம்ப கட்ட உருவாக்கப்பணிகள் தொடங்கியிருக்கலாம் என நம்பப்படுகின்றது.

A எனக் குறிபிடப்பட்டுள்ள பகுதியில் கெல்ஸ் நகரம் உள்ளது. கெல்ஸுக்கும் டப்ளினுக்கும் உள்ள தூரத்தை இவ்வரைப்படத்தில் காணலாம்.

A எனக் குறிபிடப்பட்டுள்ள பகுதியில் ஐயோனா தீவு உள்ளது. ஐயோனாவிற்கும் டப்ளினுக்கும் உள்ள தூரத்தை இவ்வரைப்படத்தில் காணலாம்.

தீவின் பெரிதாக்கப்பட்ட படம்

ஐயோனா (Iona) வில் கொள்ளையர்கள் மடத்தில் நுழைந்து தாக்கி அங்கிருந்த பொருட்களை சூறையாடிச் சென்று மடத்தையும் தீவைத்து கொளுத்தி நாசப்படுத்திய போது பாதிரிமார்கள் அங்கிருந்து சில முக்கிய பொருட்களை மட்டும் எடுத்துக் கொண்டு கடல் வழி பயணித்து அயர்லாந்தின் கெல்ஸ் நகருக்கு வந்திருக்கின்றனர். அங்கு கெல்ஸ் மடத்தில் இப்பணியத் தொடர்ந்து செய்து நிறைவேற்றி முழு நூலையும் முடித்திருக்கின்றனர்.

தற்சமயம் ஐயோனாவில் உள்ள ஐயோனா அபேய் (Iona Abbey). அழிவிற்குப் பின்னர் மீண்டும் சீரமைக்கப்பட்ட மடம்.

இந்த நூலில் ஆக மொத்தம் 680 பக்கங்கள் உள்ளன. அதில் இரண்டு பக்கங்களில் மட்டும் தான் வர்ணம் இல்லை. ஏனையவை முழுக்க முழுக்க செல்ட்டிக் கலாச்சார ஓவியங்களை பிரதிபலிக்கும் சின்னங்களை கொண்டு அலங்கரிக்கப்பட்டுள்ளது.

நூலில் உள்ள ஒரு பக்கம்

1661ம் ஆண்டு தொடங்கி இந்த நூல் ட்ரினிடி கோலேஜில் (Library of Trinity College - Dublin) ல் பாதுகாக்கப்பட்டு வருகின்றது.

இடைப்பட்ட காலத்தில் இந்த நூல் நூலகத்தில் பாதுகாக்கப்பட்டாலும் பாதுகாப்பு முறைகள் சரியாக அமைந்திருக்கவில்லை. ஆக 1953ம் ஆண்டில் இந்த நூல் முறையாக தூய்மை செய்யப்பட்டு அசல் நூல் நான்கு பாகங்களாகப் பிரிக்கப்பட்டு சிறிதாக்கப்பட்டு வைக்கப்பட்டது. இந்த நூலின் அசலின் 2 பாகங்கள் ட்ரினிடி கோலேஜின் நூலகத்தில் பொதுமக்கள் பார்வைக்கு காட்சிக்கு வைக்கப்படுகின்றது. இதன் மேலும் இரண்டு பாகங்கள் காட்சிக்கு வைக்கப்படுவதில்லையென்றாலும் அவை முக்கிய ஆய்வாளர்களுக்காக மட்டும் பார்வைக்கு அனுமதி வழங்கப்படுகின்றது. ட்ரினிடி கோலேஜில் உள்ள 2 பாகங்கள் ஒவ்வொரு நாளும் ஒரு பக்கம் திருப்பப்பட்டு காட்சிக்கு வைக்கப்படுகின்றது. இதனால் தினம் நூலகத்துக்கு வந்து இந்த நூலை ஒவ்வொரு நாளும் ஒவ்வொரு பக்கத்தை வாசித்துச் செல்லலாம்.

இந்த நூலை மறுபதிப்பு செய்ய தேர்ந்தெடுக்கப்பட்ட சுவிஸர்லாந்தின் Faksimile Verlag (Fine Art Facsimile Publishers) நிறுவனத்தினர் இந்த நூலை கையில் தொடாமல் ட்ரினிடி காலேஜிலிருந்து வெளியே எடுக்காமல் ஒரு சிறப்பு கருவியை பயன்படுத்தி இதன் பக்கங்களைத் தொடாமலேயே காமெராவில் பதிவு செய்து இந்த நூலினை பதிவாக்கி முழுமைபடுத்தினர். ட்ரினிடி காலேஜ் சிறு எண்ணிக்கையில் இந்த நூலை சிறப்பு வெளியீடு செய்தனர். இந்தப் பதிப்பு நிறுவனத்துக்கு இந்தக் கருவியை உருவாக்க கால் மில்லியன் சுவிஸ் ப்ராங்க் தேவைப்பட்டதாம். இந்தக் கருவி கொண்டு 1986ம் ஆண்டில் சில நாட்கள் தொடர்ந்து இப்பணி செய்து முடிக்கப்பட்டிருக்கின்றது.

இவ்வளவு சிறப்புக்கள் வாய்ந்த நூலை என் கண்களால் காணப்போகின்றேன் என நான் எதிர்பார்த்திருக்கவில்லை. டப்ளினில் வந்து இறங்கிய தினத்தில் மதியம் நண்பர்கள் சிலரோடு இணைந்து தனியாக ட்ப்ளின் சுற்றிப் பார்க்கலாமே என்று சென்ற நாங்கள் ட்ரினிட்டி காலேஜில் ஏதேச்சையாக நுழைய அங்கே இந்தப் பொக்கிஷத்தைக் கண்டு ரசிக்கும் பெரும் பேற்றினைப் பெற்றோம் என்று சொன்னால் மிகையாகாது.

தொடரும்..!

அன்புடன்
சுபா

படங்கள்: இப்பதிவில் உள்ள படங்கள் அனைத்தும் இணையத்தில் எடுக்கப்பட்டவை (நூலைப் படமாக்க அனுமதியில்லையென்பதால்)

உசாத்துணை
http://en.wikipedia.org/wiki/Book_of_Kells
http://homepage.mac.com/mseffie/assignments/beowulf/book%20of%20kells/kells.html

அயர்லாந்தின் அழகில்... பகுதி 2

2011-12-11T09:15:00.004+01:00

இன்றைய அயர்லாந்து - ஓர் அறிமுகம்

அயர்லாந்து எனக் குறிப்பிடும் போது வடக்குப் பகுதியான வட அயர்லாந்து நீங்கிய பகுதியே அயர்லாந்து என்று அழைக்கப்படுவது. இத்தீவில் வட கிழக்குப் பகுதி இங்கிலாந்தின் ஆட்சிக்குட்படுத்தப்பட்ட பகுதி. இது நீங்கலாக உள்ள ஏனைய பகுதிகளே அயர்லாந்து என்பதாகும்.

அயர்லாந்து சாம்பல் நிறமான வட அயர்லாந்து தவிர்த்த பகுதி மட்டுமே.

அயர்லாந்து கொடியின் வர்ணம் மூன்று நேர் கோடுகளாக அமைந்தது. முதல் பகுதி பச்சை நிறத்திலும், நடுப்பகுதி வெள்ளை நிறத்திலும் கடைசிப்பகுதி ஆரஞ்சு நிறத்திலும் என அமைந்திருக்கும். அயர்லாந்து அரசின் விளக்கப்படி இந்தக் கொடியில் முதலில் உள்ள பச்சை நிறம் கேலிக் பாரம்பரியத்தை விளக்குவதாகவும், வெள்ளை நிறம் அமைதியை உணர்த்துவதாகவும், இதன் ஆரஞ்சு நிறம் வில்லியம் ஆஃப் ஓரஞ் (William of Orange) அரசரைப் பின் தொடர்பவர்களைக் குறிப்பதாகவும் உள்ளது.

வில்லியம் III & II

மேரி II

வில்லியம் III & II (1650 - 1702) ஓரஞ் நாசவ் (House of Orange-Nassau) பாரம்பரியத்தின் அரச பரம்பரையைச் சேர்ந்தவர். 1689ம் ஆண்டு முதல் இவர் வில்லியம் III என்ற பெயருடன் இங்கிலாந்து அயர்லாந்து ஆகிய இரண்டு நாடுகளையும் ஆட்சி செய்தவர். ஸ்கோட்லாந்தின் அரசராக இவரது பெயர் வில்லியம் II என வழங்கபடுவதால் இவருக்கு வில்லியம் III & II என்ற இரண்டு பெயர் குறிப்புக்களுமே உள்ளன. வட அயர்லாந்திலும் ஸ்கோட்லண்ட் நாட்டிலும் இவர் பில்லி அரசர் (King Billy) என அழைக்கப்பட்டார். வரலாற்று முக்கியத்துவம் வாய்ந்த 5.11.1688ல் வில்லியம் இங்கிலாந்தை முற்றுகையிட்டு ஜேம்ஸ் அரசர் II & VII இடம் இருந்து நாட்டைக் கைப்பற்றி இங்கிலாந்து, ஸ்கோட்லாந்து அயர்லாந்து ஆகிய மூன்று நாடுகளையும் ஆட்சி செய்தார். இவர் மனைவி மேரி II (Mary II) இவருடன் இணைந்து தான் இறக்கும் வரை ஆட்சி நடத்தினார். இவர்கள் இணைந்து நடத்திய ஆட்சி பொதுவாக வில்லியம் மேரி (William and Mary) ஆட்சி என குறிப்பிடப்படுகின்றது.

அயர்லாந்து ஒரு தீவு. ஐரோப்பாவிலேயே மூன்றாவது பெரிய தீவு என்பதும் உலகிலேயே இருபதாவது பெரிய தீவு என்பதும் குறிப்பிடத்தக்கது. அரசியல் ரீதியாக இத்தீவு இரண்டு மாபெரும் பகுதிகளாகப் பிரிக்கப்பட்டுள்ளது. வடக்குப் பகுதி (Northern Ireland) இங்கிலாந்தின் ஒரு பகுதியாகவும் தெற்கும் ஏனைய பகுதியும் அயர்லாந்து குடியரசு (Republic of Ireland) எனவும் அழைக்கப்படுகின்றது. இந்தத் தீவின் மொத்த மக்கள் தொகை ஏறக்குறைய 6.4 மில்லியன் ஆகும். இதில் ஏறக்குறைய 4.6 மில்லியன் மக்கள் தெற்குப் பகுதி அயர்லாந்தின் குடியரசிலும் மீதம் 1.8 மில்லியன் மக்கள் வடக்கு அயர்லாந்திலும் வசிக்கின்றனர்.

இதில் சுவாரசியமான விஷயம் என்னவென்றால் எங்கள் பயணத்தின் போது எல்லா இடங்களிலும் கணக்கற்ற செம்மறி ஆடுகளைப் பார்த்து அதிசயித்த நான் ஜொஅன்னாவிடம் இங்கு மக்கள் தொகையை விட செம்மறி ஆடுகளின் எண்ணிக்கை அதிகமாக இருக்கும் போலிருக்கிறதே என்று சொன்ன போது அவர் அதை ஆமோதித்து தெற்கு பகுதி நாடான அயர்லாந்து குடியரசில் 5.0 மில்லியனுக்கும் மேற்பட்ட செம்மறி ஆடுகள் உள்ளன எனத் தெரியப்படுத்தினார். மக்கள் தொகையை விட செம்மறி ஆடுகளின் எண்ணிக்கை இங்கு அதிகம் என்பது ஆச்சரியம் தரும் விஷயமல்லவா?

அயர்லாந்தின் தலைநகரம் டப்ளின். 2000ம் ஆண்டுகளின் வாக்கில் மிகத் துரிதமாக கணினி தொழில்நுட்பம் வளர்ச்சி கண்ட சமையத்தில் ஐரோப்பாவிலேயே மிக அதிகமாக கால் செண்டர்கள் உருவாகிய இடம் டப்ளின் தான். உலகின் பல முக்கிய வர்த்தக நிறுவனங்கள், குறிப்பாக கணினி தொழில்நுட்ப வர்த்தக நிறுவனங்கள் டப்ளின் நகரில் தங்கள் கால் செண்டர், கஸ்டமர் செர்வீஸ் செண்டர் ஆகியவற்றை இங்கு தொடங்கின. மிகப் பிரபலமாக 2000ஆம் ஆண்டு முதல் 2006 ம் ஆண்டு வரை இங்கே கால்செண்டர்களின் ஆதிக்கம் மிகவும் வலுவாக இருந்தது என்று சொல்லலாம். டப்ளின் நகரின் வளர்ச்சியிலேயே கடந்த பத்து ஆண்டுகளில் மிகப் பெரிய மாற்றம் நடந்துள்ளது என்பதையும் எங்கள் சுற்றுலா வழிகாட்டியின் விளக்கங்கள் மூலமாகத் தெரிந்து கொண்டேன்.

அயர்லாந்தின் மக்கள் தொகையில் 87%க்கு மேற்பட்டோர் கத்தோலிக்க கிற்ஸ்துவ சமயத்தைப் பின்பற்றுபவர்கள். ஏறக்குறைய 3% ப்ராடஸ்டண்ட் கிறிஸ்துவர்களும் சிறிய எண்ணிக்கியிலான முஸ்லீம்களும் ஏனைய மத்த்தினரும் இங்கு உள்ளனர்.

விமான நிலையத்தில் வந்து இறங்கியவுடன் உடனே ஒரு சந்தேகம் வந்தது எங்கள் இருவருக்கும். இங்கு எந்த வகை பணம் புழக்கத்தில் உள்ளது? உடனேயே பணம் மாற்றிக் கொள்ள வேண்டுமா ? என்று. விமான நிலையத்தில் பணம் மாற்றிக் கொள்ளும் இடத்தில் வந்து விசாரித்ததில் அயர்லாந்தில் யூரோ பணமே புழக்கத்தில் உள்ளது என்றும் வடக்கு அயர்லாந்து செல்ல வேண்டுமென்றால் மட்டுமே அதற்கு பணம் மாற்றிக் கொள்ள வேண்டும் என்றும் அறிந்து கொண்டோம். எங்கள் பயணம் முழுதுமே வடக்குப் பகுதி தவிர்த்து அயர்லாந்து நாட்டில் மட்டுமே என்பதால் பணம் மாற்ற வேண்டுமே என்ற அந்தக் கவலையை விட்டு எங்கள் சுற்றுலா வழிகாட்டி எங்கிருக்கின்றார் என்று தேடிக் கொண்டு புறப்பட்டோம்.

தொடரும்..!

அன்புடன்
சுபா

உசாத்துணை
http://en.wikipedia.org/wiki/William_III_of_England
Atlas of Irish History - Editor: Sean Duffy

அயர்லாந்தின் அழகில்... பகுதி 1

2011-12-10T14:08:00.004+01:00

அயர்லாந்துக்குப் பயணம்

என்றாவது ஒரு நாள் சுற்றிப் பார்க்கச் செல்ல வேண்டும் என நான் மனதில் வைத்திருக்கும் பட்டியலில் உண்மையிலேயே அயர்லாந்து இடம்பெறவில்லை. ஆனாலும் கடந்த இரண்டு ஆண்டுகளில் என் மாமியார் அவ்வப்போது தனது முந்தைய அயர்லாந்து பயணத்தைப் பற்றியும் இரண்டு வாரங்கள் தாம் சைக்கிளில் பயணம் செய்து மக்களையும் ஊர்களையும் சுற்றிப் பார்த்ததையும் கூறிக் கொண்டிருந்தது மனதில் சிறிய அளவில் ஒரு ஆசையை உருவாக்கி விட்டது என்று தான் சொல்வேன். அவருக்கு நாங்களும் அங்கு சென்று வர வேண்டும்.. குறிப்பாக ரிங் ஆஃப் கேரி பகுதிக்குச் சென்று பார்த்து வர வேண்டும் என ஆசை. ஏறக்குறைய பத்து வருடங்களுக்கு முன்னர் அவர்களுக்கு இருந்த அனுபவம் நிச்சயம் இப்போது சற்று மாறுபட்டதாகத் தான் இருக்கும் என்பதில் சந்தேகம் இருந்தாலும் "ஏன்.. ஒரு முறை விடுமுறையை இங்கே கழித்தால் என்ன" என்ற எண்ணம் இந்த ஆண்டு ஆரம்பத்தில் மனதில் வலுவாக பதிந்து விட்டது. அப்புறம் என்ன.. பயணத்திற்கான தேதியை உறுதி செய்து பயண டிக்கெட்களையும் வருட ஆரம்பத்திலேயே முன்பதிவு செய்து வாங்கி வைத்து விட்டோம்.

கோடை காலத்தில் செல்வது இங்கு உகந்ததாக இருக்கும். ஜெர்மனிக்கும் மேலே அமைந்திருப்பதால் நிச்சயமாக குளிர் நிறைந்த நாடாகத் தான் இருக்கும் என்பது என் எண்ணம். அதனால் அதிகமாக பெரிய ஜாக்கெட்டுகளைப் போட்டுக் கொண்டு செல்வதை விட கோடை காலம் சுற்றுப் பயணத்தை எளிமையாக்கும் என்ற எண்ணம் மனதில் எங்கள் இருவருக்குமே இருந்தது.

எனது நீண்ட நாள் அலுவலக நண்பரும் என் நெருங்கிய நண்பர்களில் ஒருவருமான ஆண்ட்ரியாஸ் அயர்லாந்தின் பிரியர். ஜெர்மானியரான இந்த நண்பர் 2000ம் ஆண்டுகளின் ஆரம்பத்தில் ஓராண்டு அயர்லாந்தின் ஷானென் (Shannon) நகரில் தனியாக ஒரு கம்பெனி நடத்திய அனுபவம் உள்ளவர். அவருக்கு நெருங்கிய நண்பர் ஒருவர் இன்னமும் ஷேனென் நகரிலேயே இருக்கின்றார். வருடத்திற்கு இரண்டு முறையாவது ரைன் ஏர் (Ryan Air) விமானச் சேவையில் ஷானென் சென்று வருவது ஆண்டிரியாஸின் வழக்கம். திரும்பி வந்து என்னிடம் தனது படத்தொகுப்புக்களைக் காட்ட அவர் மறப்பதில்லை. அப்போதெல்லாம் கூட என்னை அயர்லாந்து ஈர்க்கவில்லை. இதற்கு முக்கிய காரணம் மிகக் குளிரான நாடாக இருக்குமோ என்ற ஒரு வித உண்மையற்ற அச்சம் தான். பல வேளைகளில் நாம் நேராகச் சென்று பார்த்து தான் ஐயங்களைத் தெளிவு செய்து கொள்ள முடிகிறது. அதிலும் ஏதோ ஒரு அனுமானத்திலேயே வாழ்த்து விடுகின்ற போக்கினால் பல வேளைகளில் நாம் இழப்பது அதிகம் என்பதை அனுபத்தின் மூலம் நான் அறிவேன். ஆக அயர்லாந்துக்கானப் பயணம் மாமியார் தூண்டுதலால் ஒரு வழியாக முடிவானது.

ஆகஸ்டு மாதம் ஜெர்மனியில் கோடை காலத்தின் உச்ச சமையம். எனது தோட்டத்துச் செடிகளைப் பற்றிய கவலையே அதிகமாக இருந்தது. அண்டை வீட்டு நண்பர் தோட்டத்துச் செடிகளுக்கு நீர் விடுவதற்கு சம்மதம் தெரிவித்தாலும் மனம் அவ்வளவாக எனக்கு திருப்தியில்லை. உதவி செய்கிறேன் பேர்வழி என்று சொல்லி நிறைய நீறைக் கொட்டி வைத்து சில செடிகளை முன்னர் இழந்திருக்கிறேன். அல்லது வெயிலில் காய்ந்து செத்துப் போனால் என்ன செய்வது. சரி. உதவி செய்வதற்காவது யாராவது இருக்கின்றார்களே. அதிகம் மனச் சஞ்சலம் வேண்டாம் என நானே என்னை சமாதனப் படுத்திக் கொண்டு பயணத்தின் தயாரிப்பு வேலைகளில் எனது மனதை செலுத்தினேன்.

இது பத்து நாட்கள் Package Deal. அதாவது விமான டிக்கெட், தங்கும் இடம் ஒவ்வொரு இடங்களுக்கும் சென்று பார்த்து வரும் பேருந்து ஏற்பாடு, காலை மாலை உணவு என அனைத்தும் இந்த ஏற்பாட்டில் அடங்கும். அதிலும் இது ஜெர்மானிய சுற்றுலா குழுவினரால் நடத்தப்படுவதால் நிச்சயம் எங்களுடன் குறைந்தது 15 ஜெர்மானியர்களாவது இருப்பார்கள் என்பது எனக்குத் தெரியும். புதிய நண்பர்களையும் அறிந்து கொள்ளலாம். புதிய செய்திகளைப் பரிமாறிக்கொள்ளலாம் என்பதும் கூட கூடுதல் குதூகலமாக அமைந்தது.

அயர்லாந்து இங்கிலாந்தின் மேற்குப் பகுதியில் அமைந்திருக்கும் ஒரு தீவு. இது ஒரு ஆங்கிலேய நாடு என யாரும் நினைத்தால் அது முற்றிலும் தவறு. 19ம் நூற்றாண்டில் ஆங்கில மொழி இந்நாட்டின் ஆதிக்கம் மிக்க முதல் மொழியாக முக்கியத்துவத்தை அடைந்தாலும் கூட இந்த நாட்டின் முக்கிய மொழி ஐரிஷ் மொழி தான். ஐரிஷ் மொழி இம்மக்களின் தாய் மொழி. அயர்லாந்தின் சாசனத்தின் படி ஆங்கிலமும் ஐரீஷ் மொழியும் அதிகாரப் பூர்வமான மொழிகள் என அமைக்கப்பட்டிருந்தாலும் ஐரீஷ் மொழியே நாட்டின் முதன் மொழி என்ற அந்தஸ்தையும் பெறுகின்றது.

பண்டைய காலத்தில் செல்ட்டிக் தாக்கத்தால் ஐரிஷ் மொழி அயர்லாந்தில் ஆதிக்கம் பெற்றது. இம்மொழி 10ம் நூற்றாண்டு வாக்கில் அயர்லாந்து, ஸ்கோட்லண்ட் (Scotland), ஐல் ஆஃப் மேன்(Isle of Man) ஆகிய பகுதிகளில் ஆதிக்கம் செலுத்திய மொழி இது. தற்சமயம் இம்மொழி ஐரோப்பிய ஒன்றியத்தால் அங்கீகரிக்கப்பட்ட ஒரு மொழி என்பதோடு ரிப்பப்ளிக் ஆஃப் அயர்லான் (Republic of Ireland), வட அயர்லாந்து (Northern Ireland) ஆகியவற்றின் அதிகாரப்பூர்வ மொழியாகவும் உள்ளது. இம்மொழியின் பெயர் கேலிக் (Gaelic) என்பதாகும்.

சாலைகளின் பெயர்கள், கட்டிடங்கள் அனைத்திலும் கேலிக் மொழியில் குறியீடுகள் அமைந்திருக்கின்றன. வழக்கத்தில் இன்று இம்மொழி குறைந்து வருகின்றது என்பது எனது நேரடியான அனுபவத்தில் பார்த்து தெரிந்து கொண்டேன்.

எங்கள் பயணம் ப்ராங்பெர்ட் விமான நிலையத்திலிருந்து அயர்லாந்தின் தலைநகரமான டப்ளின் சென்று பின்னர் அங்கிருந்து பட்டியலிடப்பட்டிருந்த இடங்களுக்குச் செல்வது என அமைக்கப்பட்டிருந்தது.

அதாவது டப்ளினில் (Dublin) முதலில் இரண்டு நாட்கள் இருந்து பின்னர் மூன்றாம் நாள் கால்வே(Galway Region) சென்று பின்னர் கோன்னிமாரா (Connemara) பகுதிக்குச் சென்று அங்கு இரண்டு நாட்கள் தங்கி பின்னர் அங்கிருந்து லிமெரிக் (Limerick) பகுதிக்கு வந்து அங்கு ஒரு நள் இருந்து பின்னர் கேரி (Kerry) பகுதிக்குச் சென்று ரிங் ஆஃப் கேரியில் (Ringof Kerry)இரண்டு நாட்கள் தங்கி அப்பகுதியின் எழிலை ரசித்து பின்னர் அங்கிருந்து காஷல் (Cashel) பகுதிக்குச் சென்று ஒரு நாள் தங்கி பின்னர் அங்கிருந்து விக்லோவ் (Wicklow) பகுதிக்குச் சென்று அன்றே டப்ளின் (Dublin) வந்து இறுதி நாள் டப்ளினில் இருந்து மாலை நேரத்து சிறப்புக்களை ரசித்து பின்னர் 10ம் நாள் இல்லம் திரும்புவது என அமைக்கப்பட்டிருந்தது.

இந்தப் பயணத்தில் எங்களுக்கு சுற்றுலா வழிகாட்டியாக அமைந்தவர் ஜொஅன்னா (Joanna). இவர் ஜெர்மானியப் பெண். அயர்லாந்துக் காரரை மணந்து கொண்டு கடந்த ஐந்தாண்டுகளாக விக்லோவ் பகுதியில் வசிப்பவர். இவர் எங்கள் பயணத்தின் போது பல வரலாற்றுத் தகவல்களை சலிக்காமல் வழங்கினார். இவருடன் எங்களின் பஸ்ஸை ஓட்டி வந்த டேரன் பழக இனிமையானவராக இருந்தார். பொதுவாக பெரும்பாலும் அமைதியாக இருந்தாலும் அவ்வப்போது எங்கள் உரையாடலில் கலந்து கொண்டார். இந்த இனிய பயணத்தில் எங்களுடன் 9 ஜோடிகள் இணைந்து கொண்டனர். மொத்தம் இருபது பேர்கள் அனைவரும் ஜெர்மானியர்கள். ஜெர்மனியின் பல பகுதிகளிலிருந்து வந்தவர்கள். அனைவருமே நாற்பது வயதுக்கும் மேற்பட்டவர்கள். புதிய நண்பர்கள் என்பதால் ஆரம்பத்தில் சற்று விலகியே இருந்தாலும் அடுத்தடுத்த நாட்களில் நன்றாக உரையாடிக் கொண்டு மிக சுவாரசியமாக எங்கள் பயணம் அமைந்தது.

அடுத்தடுத்த பகுதிகளில் நான் சென்று பார்த்த இடங்கள் நான் அறிந்து கொண்ட அயர்லாந்தின் வரலாற்றுத் தகவல்கள், எங்கள் பயண அனுபவம் ஆகியவற்றை நேரம் கிடைக்கும் போது தொடர்ந்து வழங்குகிறேன். இப்பயணத்தில் எனது டிஜிட்டல் கேமராவில் ஏறக்குறைய இரண்டாயிரத்துக்கும் மேற்பட்ட புகைப்படங்களை எடுத்தேன். அதில் சரி பார்த்து தேவையற்றவைகளை நீக்கி சிறப்பாக வந்த ஏறக்குறைய நானூறு படங்களை மட்டும் தேர்ந்தெடுத்து வைத்திருக்கிறேன். அதில் ஒரு சில காட்சிகளை உங்களுடன் நிச்சயம் இங்கு மின்தமிழில் பகிர்ந்து கொள்வேன்.

சரி இப்போது ப்ராங்பர்ட் விமான நிலையத்தில் புறப்படக் காத்திருக்கும் ஆர் லிங்குஸ் (Air Lingus) க்கு செல்வோமா..?

டப்ளின் விமான நிலையத்தின் வாசலில்.. வந்தி இறங்கிய நாளில்.

டப்ளின் கடலுக்கு அருகில் அமைந்துள்ள ஒரு நகரம். விமானத்திலிருந்து எடுக்கப்பட்ட புகைப்படம்.

விமானத்திலிருந்து எடுக்கப்பட்ட புகைப்படம்.

அன்புடன்
சுபா

திருவண்ணாமலை நினைவுகள்

2011-12-03T16:15:00.008+01:00

திருவண்ணாலைக்குப் பயணம் செய்த போது அங்கு பதிவு செய்த சில காட்சிகள் - சிறு விளக்கங்களுடன்.

சென்னையிலிருந்து புறப்படும் போது சாலையில் இடையே நடந்து செல்லும் மாடுகளும் கன்றுக் குட்டிகளும். இவை சாலை நெரிசலைப் பற்றிய கவலையின்றி, மெதுவாக செல்வது வாகனமோட்டுபவருக்கு சிரமத்தைத் தந்தாலும் இவையும் மக்களோடு சேர்ந்து அவற்றின் வேலைகளை மட்டும் மனதில் நினைத்துக் கொண்டு சாலையை மறைத்துக் கொண்டு நடப்பது என்னைப் போன்ட் சுற்றுப் பயணிகளுக்கு கண்களுக்கு விருந்து.

செங்கல்பட்டு செல்லும் வழியில் அமைந்திருக்கும் விருந்தினர் ஓய்வு விடுதி. இங்கு காலை உணவு சாப்பிட்டு பயணித்தோம்.

மூன்று பெண்களும் காலை உணவை ஆர்டர் செய்து விட்டு காத்திருக்கிறோம்.. பொங்கல் இட்டலி காப்பி.. வடை.. நல்ல காலை உணவு விருந்து.

செல்லும் வழியில்.. செஞ்சிக் கோட்டைக்கு முன்னே..நான்!

நாங்கள் இரண்டு நாட்கள் தங்கியிருந்த விருந்தினர் மாளிகை. நேர்த்தியான தூய்மையான கட்டிடம். ரமணாஸ்ரமத்திற்கு அருகிலேயே அமைந்துள்ளது.

சீதாம்மா கொடுத்த நூலை வாசித்து திருவண்ணாமலை சிறப்புக்களை தெரிந்து கொள்கிறேன்.

திட்டம் போட வேண்டாமா..? எங்கு முதலில் செல்வது..? எப்போது புறப்படுவோம் என ஆலோசனை நடக்கின்றது.

செங்கம், செல்லும் சாலையில்.. இருவர் ஒரு மாட்டை மோட்டார் சைக்கிளில் வைத்து ஏற்றிக் கொண்டு செல்கின்றனர். எதற்காக .. தெரியவில்லை!

புரிசைக்கு செல்லும் வழியில் வரிசையாக மகளிர் அணிவகுத்து சென்று கொண்டிருந்தனர்.. ஏதாவது மகளிர் மாநாடாக இருக்குமோ ?

வண்ண வண்ண சேலையில் பெண்கள்.

புரிசை கிராமத்து ஆண்கள்.. ஓய்வு நேரத்தில் தாயம் விளையாடிக் கொண்டிருக்கின்றனர். அருகில் நெல்லை கொட்டி காய வைத்திருக்கின்றனர்.

மகளிர் புரிசை கிராமத்து சிவன் கோயிலின் வாசலை கோலம் போட்டு அழகு செய்கின்றனர் அந்த மாலை வேளையில்.

இந்தப் பெண் குழந்தைகள் தங்களுக்குத் தெரிந்த கோலத்தை போட்டு மகிழ்கின்றனர்.

புரிசை கிராமத்து தேனீர் கடை.

புரிசை கிராமத்து இளம் சிறார்கள்.. காலில் மண்.. முகமெல்லாம் புன்னகை.. தங்களை நான் புகைப்படம் எடுக்க வேண்டும் என்ற அவர்களின் கோரிக்கையை நான் மறுக்காமல் எடுத்துக் காட்டினேன். படத்தைப் பார்த்து அவர்களுக்கு அளவில்லா மகிழ்ச்சி.

புகைப்படம் எடுக்கனும்னா இப்படியா வெட்கப்படுவது சீத்தாம்மா..? :-)

திருவண்ணாமலை பதிவுகள்

2011-12-03T15:49:00.004+01:00

திருவண்ணாமலை பதிவுகள் அனைத்தும் தமிழ் மரபு அறக்கட்டளை வலைப்பக்கத்தில் இங்கே உள்ளன.

[மின்தமிழ் மடலாடற் குழுவில் இப்பதிவுகளையும் கேள்விகள் இவை தொடர்பான கலந்துரையாடல்களை இங்கே காணலாம். ]

திருவண்ணாமலை பதிவுகள் வெளியீடுகளின் வழி எனது 2011 மார்ச் மாத தமிழக பயணத்தின் போது நான் பதிந்து வந்த தகவல்களை தயாரித்து தமிழ் மரபு அறக்கட்டளை வலைப்பக்த்தில் இணைத்து வைத்துள்ளதோடு உங்களிடமும் பகிர்ந்து கொண்டேன். உங்களின் பின்னூட்டங்களும் கேள்விகளும் பதில்களும் ஊக்கமளிப்பவையாக இருந்தன. நமது வலைத்தளத்திலும் திருவண்ணாமலைப் பற்றிய வரலாற்றுச் செய்திகள் சில இடம்பெற இந்த முயற்சி உதவி உள்ளது.

இந்தப் பதிவின் தொடரை இத்துடன் நிறைவு செய்ய விரும்புகிறேன். திருவண்ணாமலை மாவட்டத்தில் இவ்வளவு தானா என நினைத்து விட வேண்டாம். எனது பதிவுகள் நிறைவு பெற்றாலும் தொடர்ந்து சில பதிவுகளையும் குறிப்புக்களை அவ்வப்போது நாம் இணைத்து வரலாம்.

எனது பயணத்துக்கு சில மாதங்களுக்கு முன்னர் இப்பகுதிக்குச் சென்று சில பதிவுகளை ஸ்ரீமதி சீதாலட்சுமி அவர்களுடன் திரு.உதயன், திரு.துரை திரு.ப்ரகாஷ் ஆகியோர் சென்று கேட்டு தகவல் பெற்று வந்துள்ளனர். அந்தத் தகவல்களையும் பதிய வேண்டும். அதுமட்டுமல்லாது மின் தமிழ் வாசகர்கள் நீங்கள் உங்களுக்குக் கிடைக்கும் நேரத்தில் திருவண்ணாமலை மாவட்டம் செல்லும் வாய்ப்பு அமைந்தால் அங்கு நீங்கள் காணும் வரலாற்று விஷயங்களைப் பதிந்து வந்து இங்கே பகிர்ந்து கொள்ளுங்கள்.

இப்பயணத்தின் போது என்னுடன் உடனிருந்து உதவிய நண்பர்களின் அன்பையும் ஆதரவையும் மறக்க முடியாது. அவர்களுக்கு எனது மனமார்ந்த நன்றிகள். தமிழ் மரபு அறக்கட்டளையின் மின்தமிழ் குடும்பத்தினரின் இணைந்த பணி இது என்றாலும் எனக்கு மன நிறைவளிக்கும் வகையில் பயணத்திலும் உதவிய இவர்களை மீண்டும் நினைத்துப் பார்த்து நன்றி கூற விரும்புகிறேன்.

எங்களை சென்னையிலிருந்து திருவண்ணாமலை அழைத்துச் சென்று பயணத்தில் கூடவே இருந்து வாகனமோட்டி உதவி செய்தவர் இவர். ஒரு முன்னாள் ராணுவ வீரர்.

அவ்வப்போது ஏதாவது வித்தியாசமான விஷயங்களை நான் பார்த்து விட்டால் வாகனத்தை நிறுத்தச் சொல்லி கேட்டுக் கொள்வேன். சலிக்காமல் வாகனத்தை நிறுத்தி நான் புகைப்படங்கள் எடுத்து முடித்து வரும் வரை காத்திருந்து அழைத்துச் சென்றார்.

ஒரு சமயம் சாலையில் வந்து கொண்டிருக்கும் போது வாகனத்தை நிறுத்தி என்னிடம் தன்னை ஒரு படம் எடுக்க முடியுமா எனக் கேட்டார். அந்தப் படம் தான் நீங்கள் இங்கே பார்ப்பது.

இந்திய பாக்கிஸ்தான் எல்லையில் கார்கில் போரில் வீரமரணம் அடைந்த திருவண்ணாமலை மாவட்டத்தைச் சேர்ந்த ப.கிருஷ்ணன் அவர்களின் உருவச்சிலை. இங்கே வாகனத்தை நிறுத்தி விட்டு அவருக்கு இராணுவ முறையில் வணக்கம் தெரிவித்தார். பின்னர் ஒரு புகைப்படம் எடுக்கச் சொல்லி கேட்டுக் கொண்டார். அவரது நாட்டுப் பற்று மனதை நெகிழ வைத்தது.

திருவண்ணாமலை மாவட்டக் கலெக்டர் டாக்டர்.ம.ராஜேந்திரன் (மார்ச் 2011). எங்கள் பயணத்தின் பதிவுகளுக்கான எல்லா உதவிகளையும் ஏற்படுத்திக் கொடுத்ததோடு மட்டுமல்லாது எங்களை வீட்டிற்கு அழைத்து அருமையான விருந்தும் பரிமாறினார். இவரது அன்பான துணைவியாரின் மதுரை நகர சமையலின் காரத்தை ரசித்து ருசித்து சாப்பிட்டேன். இவரது மகள் வரலாற்றில் மிகுந்த ஆர்வம் கொண்ட குழந்தை. திறமை மிக்கவள். இவர்கள் இனிதே பல்லாண்டுகள் வாழ்ந்து நாட்டுக்கும் மக்களுக்கும் சேவை செய்ய இறைவனை வேண்டிக் கொள்கிறேன்.

திருமதி.புனிதவதி இளங்கோவன். எங்களுடன் பயணத்தில் இணைந்து கொண்டவர். எனது பேட்டிகளின் போது பல்வேறு கோணங்களில் கேள்விகளை எழுப்பி பதிவுகள் சிறப்பாக வந்திட துணை புரிந்தார். இவர் ஒரு தகவல் பொக்கிஷம். சைவ சித்தாந்தம் தேவாரத் திருமுறைகள், வரலாறு, பெண்ணியம் என பல துறை வல்லுனர். முன்னாள் தமிழ்நாடு ஆல் இந்தியா ரேடியோ இயக்குனராகப் பணிபுரிந்து ஓய்வு பெற்றவர். இவரது நட்பு கிடைத்ததில் நான் மனம் மகிழ்கிறேன்.

அட்வகேட் ஷங்கர். நான் எதிர்பார்க்காத நேரத்தில் எங்களுடன் இணைந்து கொண்டு திருவண்ணாமலை கோயிலைப் பற்றிய நல்ல அறிமுகத்தை எனக்கு வழங்கினார். இவரை அறிமுகம் செய்து கொண்டதில் மிகவும் மகிழ்கிறேன்.

ப்ரகாஷ் சுகுமாரன். மின்தமிழில் எனக்கு அறிமுகமாகி சீத்தாம்மா வழியாக நல்ல நட்பாக உறுவாகி இருப்பவர். என்னை சென்னையிலிருந்து அழைத்துச் சென்று கூடவே இருந்து எல்லா உதவிகளையும் செய்து கொடுத்து பல செய்திகளை அவ்வப்போது வழங்கிக் கொண்டும் இருப்பவர். நன்றி ப்ரகாஷ்.

ஸ்ரீமதி சீதாலட்சுமி அவர்கள். திருவண்ணாமலை மாவட்டத்திற்கு நான் செல்ல காரணமாக இருந்தவர். இவரது ஆக்கமும் ஊக்கமும் எனது இயற்கையான வேகத்தை மேலும் அதிகப் படுத்தும் தன்மை கொண்டது. இவரது துணையுடன் மேலும் பல பதிவுகள் இன்னமும் செய்வோம்.

சீதாம்மா - மீண்டும் தமிழகம் வரும் போது மீண்டும் இணைந்து சில காரியங்களை நாம் செய்ய வேண்டும். செய்வோம். உங்களுக்கு இறைவன் திடமான உடல் ஆரோக்கியத்தையும், நீண்ட ஆயுளையும் வழங்க வேண்டும் என்று ப்ரார்த்தித்துக் கொள்கிறேன்.

அன்புடன்
சுபா

மீண்டும் தமிழகம் 25.02 - 14.03.2011

2011-03-24T19:24:00.004+01:00

தமிழகத்துக்கு எனது 8-வது பயணம் இது. முழுதும் தமிழ் மரபு அறக்கட்டளையின் திட்டங்களுக்காக நான் ஏற்பாடு செய்திருந்த பயணம் இது. இந்தப் பயணத்தில் தமிழ் மரபு அறக்கட்டளை நண்பர்களைச் சந்திப்பது ஒரு முக்கிய அங்கம் என்ற போதிலும், தமிழ்ப் பல்கலைக்கழகத்துடன் தமிழ் மரபு அறக்கட்டளை புரிந்துணர்வு ஒப்பந்தம் செய்து கொண்டு நிகழ்த்திய ஓலைச்சுவடி தேடல் நடவடிக்கை தொடர்பான விஷயங்கள் தொடர்பாகவும், சில களப்பணிகளுக்காகவும் இந்த 16 நாள் பயணத்தைத் திட்டமிட்டிருந்தேன்.

எனது கடந்த சில பயணங்களில் நான் பிரிட்டிஷ் ஏர்வேய்ஸ் நிறுவனத்தின் வழி பயணிப்பது வழக்கம். ஏறக்குறைய 12-14 மணி நேரத்தில் தமிழகத்தில் இருக்கலாம். ஆனால் இந்த முறை கொஞ்சம் மாறறம் செய்கிறேன் என்று எடுத்த முயற்சி அலுப்பு தரும் அனுபவத்தை ஏற்படுத்தி விட்டது. ஸ்டுட்கார்ட்டிலிருந்து லண்டன் ஹீத்ரோ சென்று அங்கிருந்து பின்னர் மும்பாய் சென்று பின்னர் அங்கிருந்து சென்னை. ஏறக்குறைய ஒன்றரை நாள் பயணத்திலேயே வீணாகிப் போனது.

மும்பாயில் 6 மணி நேரங்கள் எனக்கு இருந்ததால் விமான நிலையத்தை விட்டு வெளியேறி ஓரளவு அருகாமையில் உள்ள இடங்களைப் பார்க்கலாம் என நடக்கத் தொடங்கினேன். விமான நிலையம் பெரிதாக்கப்படுகின்றது. ஆனாலும் விமானத்தை விட்டு வெளியே வந்ததும் முதலில் தென்படுவது வரிசை வரிசையான சேரியும் கொட்டிக் கிடக்கும் குப்பை மூட்டைகளும் தான். குடிசை வீடுகள், தண்ணீர் தேங்கிக் கிடக்கும் சேற்றுப் பகுதி, குப்பை மலைகள். இவை மாறவே மாறாதா என நினைத்து அலுப்புத் தான் தோன்றுகிறது.

மும்பை விமான நிலையம் (விமானத்துக்கு முன்னால் சேரி)

மும்பாயில் சாலைகளில் நடந்து பின்னர் அங்கேயே பக்கத்தில் இருந்த பாலாஜி உணவகத்தில் மதிய உணவு சாப்பிட்டேன். ஜீரா ரைஸ்,வெண்டைக்காய் வருவல். நல்ல ருசி. உணவகம் நேர்த்தியாக வடிவமைக்கப்பட்டிருக்கின்றது. ஆனால் மேசையில் இருந்த விரிப்பை பார்த்த போது சாப்பிட சற்று தயக்கம் தான் ஏற்பட்டது. கொஞ்சம் இதிலும் கவனம் எடுத்தால் திருப்தியான ஒரு உணவகம் இது என்று நிச்சயம் சொல்வேன். அன்று உணவகத்தில் சாப்பிட வந்தவர்களை விட ஊழியர்கள் அதிகமாக இருந்தனர். சிறிய உணவகம் தான். ஏறக்குறைய 40 பேர் அமரக்கூடிய ஒன்று. பரிமாறும் பணியாட்கள் மட்டும் 20 பேர் இருப்பார்கள்.

பாலாஜி உணவகத்தில்

மாலை 6:30க்கு சென்னை செல்ல வேண்டிய விமானம். பல்வேறு பிரச்சனைகளைக் காரணம் காட்டி இரவு 9 மணிக்குத்தான் புறப்பட்டது. நான் பயனித்த விமானத்தில் தமிழக சினிமா நடிகை ஒருவரும் பயனித்தார். அதனால் விமானத்தில் வந்தவர்கள் பலரது முகத்தில் தாமதம் ஏற்படுத்திய களைப்பு சற்று குறைந்து புன்னகை தவழ்ந்து கொண்டிருந்தது.

மும்பை விமான நிலையத்தில் பயணிகள் காத்திருக்கும் இடம்

ஒரு வழியாக சென்னை அடைய இரவு 10:45 மணி ஆகிவிட்டது.

சென்னையில் எனது இரண்டாம் நாள் அதாவது 27.02. 2011 தமிழ் மரபு அறக்கட்டளை சென்னை நண்பர்களை பார்ப்பதாக அமைத்திருந்தேன். அது முடித்து மாலை திருமதி சீத்தாலட்சுமியுடன் ஞானியின் நாடகம் பார்க்கச் சென்றிருந்தேன். வியக்க வைத்த நடிப்புத் திறனுடன் பலர் இவ்வகை கலைகளில் இன்னமும் ஈடுபட்டு வருவது மகிழ்ச்சியளித்தது.

28.02.2011 - இன்று சில சந்திப்புக்கள். மாலை தஞ்சாவூருக்கு ரதி மீனா பஸ் வழியாகப் பயணம். என்னுடன் முனைவர்.பத்மாவதியும் இனைந்து கொண்டார்.
01.03 -02.03.2011 - தஞ்சையில் - தாராசுரம் பயணம், நாகப்பட்டினம் பயணம், தஞ்சை சரஸ்வதி மஹால் நூலகம் பார்வையிடல்.
03.03.2011 - தமிழ்ப் பல்க்லைக்கழகத்தில் தமிழ் மரபு அறக்கட்டளைக்குப் பாராட்டு, ஓலைச்சுவடிகள் அன்றும் இன்றும் கருத்தரங்கம். எனது சிறப்பு சொற்பொழிவு அறைய திறப்பு விழாவில் ஏற்பாடாகியிருந்தது.
04.03.2011- திருச்சி விமான நிலையத்திலிருந்து சென்னை பயணம். மாலை நண்பர்கள் சந்திப்பு.
05.- 06.03.2011 - சென்னையில் தமிழ் மரபு அறக்கட்டளை பணிகள்
07.03.2011 - திருவண்ணாமலை பயணம் (திருமதி. சீதாலட்சுமி, திருமதி.புனிதவதி ஆகியோருடன்). காலை 7 மணி வாக்கில் பிரகாஷ் வாகனத்துடன் சென்னை வந்து எங்களை அழைத்துச் செல்வதாகத் திட்டம்.
07-08.03.2011 - திருவண்ணாமலை, புரிசை, செங்கம் ஒஅகுதிகளுக்குப் பயணம்.
09.03.2011 - சென்னையில். மாலை ராஜபாளையம் பயணம்.
10.03.2011 - ராஜபாளையம், கோவில்பட்டி, தூத்துக்குடி
11.03.2011 - தூத்துக்குடி, மாலை சென்னை திரும்புதல்
12.03.2011 - சென்னையில் (ஜெயா தொலைக்காட்சி பேட்டி)
13.03.2011 - தமிழ் மரபு அறக்கட்டளை 10ம் ஆண்டு விழா
14.03.2011 - காலை சென்னையிலிருந்து மீண்டும் ஜெர்மனி பயணம்.. சென்னையிலிருந்து மும்பாய்.. மும்பாயிலிருந்து லண்டன் ஹீத்ரோ, லண்டனிலிருந்து ஸ்டுகார்ட். ..

இந்த பயணத்தின் குறிப்புக்களை தமிழ் மரபு அறக்கட்டளை வலைப்பக்கத்திலும் சில குறிப்புக்களை எனது வலைப்பூக்களிலும் இணைக்க நினைத்துள்ளேன்.

பாரிஸ் சாலைகளில்.. (Dec 14 -17) - 6

2011-02-06T21:02:00.003+01:00

அரண்மனை சிறையாக மாற்றப்பட்ட நிகழ்வுகள் அபூர்வம். அவ்வகை நிகழ்வு பாரீஸிலும் நிகழ்ந்திருக்கின்றது. Conciergerie இதற்கு ஒரு சான்று. 1284-1314 வரை ஆட்சி செய்த அரசர் நான்காம் பிலிப்பின் (King Philip IV) (1284-1314) அரண்மணையாக இக்கோட்டை திகழ்ந்துள்ளது. குழந்தை கதைகளில் (fairy tales) வருவது போன்ற அமைப்பு இந்த கோட்டைக்கு. சென் ஆற்றினை சார்ந்தவாறு இக்கோட்டை அமைந்திருக்கின்றது.

நோத்ர டாம் இருக்கும் பகுதியில் தான் இந்தக் கோட்டையும். ஆனால் சற்று தள்ளியே இருக்கின்றது. இங்கு செல்ல மெட்ரோ எண் 4 எடுத்து Cite மெட்ரோ நிலையத்தில் இறங்கிக் கொள்ள வேண்டும்.Ile de la Cite பகுதியில் இக்கோட்டை அமைந்திருக்கின்றது.

இக்கோட்டையின் அடித்தளம் வித்தியாசமானது. 209 அடி நீளமும் 90 அடி அகலமும் 28 அடி உயரமும் கொண்ட நீளமான ஒரு பகுதி. இப்பகுதி தான் நான்காம் பிலிப்ஸின் காலத்தில் அவரது 2000 வேலையாட்களுக்கு உணவு பரிமாரப்படும் இடமாக இருந்திருக்கின்றது. ஏதோ காரணத்திற்காக அரச குடும்பத்தினர் இக்கோட்டையை விட்டு விட்டு லூவ்ரெவிற்கு பெயர்ந்து சென்றிருக்கின்றனர்.இது 1358ம் ஆண்டில் நிகழ்ந்திருக்கின்றது.

1391ம் ஆண்டில் இக்கோட்டை ஒரு சிறையாக மாற்றம் கண்டது. இங்கே பலவகையான சிறைக் கைதிகள் இருந்திருக்கின்றனர். திருடர்கள், கொள்ளையர்களிலிருந்து, அரசியல் கைதிகள் வரை பலர் வந்து இருந்து செத்துப் போன இடமாக இது மாற்றம் கண்டிருக்கின்றது.

சிறை அறைகளில் கூட வித்தியாசம் இருந்திருக்கின்றது.அரசியல் கைதிகளுக்கும் பணக்கார கைதிகளுக்கும் வசதியான அறைகள் இருந்திருக்கின்றன. தனி அறைகள், அதில் படுக்கை, மேசை, மற்றும் தேவையான பொருட்கள் அனுமதிக்கப்பட்டிருக்கின்றன. சற்று நடுத்தர வர்க்கத்து சிறைக் கைதிகளுக்குப் படுக்கையும் மேசையும் உள்ள பகுதிகள் வழங்கப்பட்டிருக்கின்றன. இப்பகுதி பிஸ்டோல் "pistoles" என அழைக்கபப்டுகின்றது. மிக ஏழ்மையான கைதிக்கு அதோ கதிதான். இருண்ட பகுதியில் இவர்கள் வாசம். ஏழைக் கைதிகள் வாசம் செய்யும் இடம் ஒபிலிட்சஸ் (oubliettes) என்று அழைக்கப்படுகின்றது. oubliettes என்றால் மறக்கப்பட்ட பகுதி என்று பொருள். ஒருவகையில் இப்பகுதிக்கு வருபவர்கள் கதி இப்படிப்பட்டதுதான்!.

இந்த கோட்டையின் முன் இருக்கும் இரண்டு கோபுரங்களும் மிக அழகு. இதில் ஒன்றான square towerல் தான் 1370ம் ஆண்டில் ப்ரான்ஸின் முதல் பொது கடிகாரம் பதிக்கப்பட்டதாம். இப்போது இருக்கும் கடிகாரம் 1370ல் பதிக்கபப்ட்டதன்று. இது 1535ம் ஆண்டில் இங்கு பதிக்கப்பட்டது. ஆக ஏறக்குறைய 500 ஆண்டு பழமை இந்தக் கடிகாரத்துக்கு!

ப்ரென்ச் புரட்சி ஏற்பட்ட சமயத்தில் இங்கு பலர் கைது செய்யப்பட்டு அடைக்கப்பட்டிருக்கின்றனர். அந்த சமயத்தில் இந்தக் கோட்டையில் 1793லிருந்து 1795வரை பல வழக்குகள் நடந்து ஏறக்குறைய 2600 பேர் தலை துண்டிக்கப்பட்டு தண்டனை வழங்கப்பட்டிருக்கின்றனர். நினைத்தாலே சிலிர்க்க வைக்கும் ஒரு கொலைக்களம் இந்த கோட்டை, இல்லையா?

1800ம் ஆண்டின் மத்தியில் இந்தக் கோட்டையை சற்று புணரமைத்திருக்கின்றனர். அதற்குப் பின்னர் ப்ரான்ஸில் பற்பல மாற்றங்கள் நிகழ்ந்திருக்கின்றன. 1914ம் ஆண்டில் இந்தக் கோட்டையை பொது மக்கள் பார்வைக்குத் திறந்து வைக்க அரசாங்கம் முடிவெடுத்தது. அதிலிருந்து மக்கள் சென்று பார்வையிட வாய்ப்பு அமைந்தது. இக்கோட்டையைக் காண 6.50யூரோ கட்டணம் வசூலிக்கப்படுகின்றது. தினமும் திறந்திருக்கின்றது. பாரீஸ் செல்பவர்கள் பார்க்க வேண்டிய இடங்களில் இதுவும் ஒன்று.

பாரிஸ் சாலைகளில்.. (Dec 14 -17) - 5

2011-01-22T08:34:00.004+01:00

பொதுவாகவே கட்டிடக் கலை என்பது என்னை மிகவும் கவரும் ஒன்று. எப்போது எங்கே சென்றாலும் சற்று தனித்து வேறுபாட்டுடன் காட்சியளிக்கும் கட்டிடங்கள் என் பார்வையிலிருந்து தவறுவதில்லை. ஏதோ ஓர் காரணம். வித்தியாசமான கட்டிடங்களின் அமைப்புக்கள் என்னை எப்போதும் கவர்ந்து விடுகின்றன. சில கட்டிடங்களை நான் பல நிமிடங்கள் நின்று பார்த்து ரசிப்பதுண்டு. அதிலும் வெகுவாக என்னைப் பண்டைய நாகரிகத்தின் சான்றுகளாகத் திகழும் பழம் கட்டிடங்கள் வெகுவாக ஈர்த்து விடும். எந்த நாடாக இருந்தாலும் சரி, எந்த சமயத்தினரது கட்டிடமாக இருந்தாலும் சரி கட்டிடங்கள் என்னைப் பொறுத்த வரை ஏதோ ஒரு வகையில் உயிருள்ள பொருள் போன்றதொரு உணர்வு எனக்குள் எழுவதுண்டு.

சாதாரன கட்டிடங்களே பல சந்ததியினரையும் பல மனிதர்களையும் பார்த்துள்ளன. மிகப் பிரமாண்டமான சரித்திரப் புகழ்பெற்ற கட்டிடங்கள் என வரும் போது அங்கு எத்தனையோ வரலாற்று நிகழ்வுகள் நடைபெற்றிருப்பதற்கான வாய்ப்புக்கள் உள்ளன அல்லவா?

பாரீஸுக்கு புகழ் சேர்க்கும் மேலும் ஒரு அம்சத்தைப் பற்றிய தகவலை இன்று பகிர்ந்து கொள்கின்றேன்.

நோர்த்தர டாம் (Notre Dame)

பாரீஸில் உள்ள வேறு எந்த ஒரு கட்டிடமும் பார்த்திராத அளவு வரலாற்று பின்னனி நிறைந்த ஒரு இடம் நோர்த்தர டாம். வெறும் தேவாலயம் தானே என்று பார்ப்பவர்களுக்கு இது வெறும் கட்டிடம் தான். ஆனால் இந்த தேவாலயம் அமைந்திருக்கும் இடத்தின் பின்னனி, அமைப்பு, வடிவமைப்பு, அதிலுள்ள சிலைகள், அதிலுள்ள ஓவியங்கள், அங்கு நிகழ்ந்துள்ள நிகழ்வுகள் அனைத்தையும் அறிந்து பார்ப்பவர்களுக்கு நோர்த்தர டாம் வரலாற்று சின்னமாக வியாபித்து நிற்பது தெரியும்.

நோர்த்தர டாம் செல்ல மெட்ரோ எண் 4 எடுத்து Cite மெட்ரோ நிலையத்தில் இறங்கிக் கொள்ள வேண்டும். இந்த தேவாலயம் பாரிஸுக்குள் ஒரு சிறு தீவுக்குள் அமைந்திருக்கின்றது. தீவு என்றால் பெரிய தீவு அல்ல. சென் (Seine) ஆறு இரண்டாகப் பிரியும் இடத்தில் உள்ள ஒரு நிலப்பரப்பு தீவு போல அமைந்துள்ளது. அந்தத் தீவுப்பகுதியில் உள்ள பல கட்டிடங்களில் நோர்த்தர டாமும் ஒன்று. பாரிஸ் நகரின் மிகப் பழமை வாய்ந்த மக்கள் குடியிருப்புப் பகுதியாகவும் இப்பகுதி குறிப்பிடப்படுகின்றது.

இன்று நோர்த்தர டாம் பிரமாண்டமாக எழுப்பப்பட்டுள்ள இவ்விடத்தில் பல நூற்றாண்டுகளுக்கு முன்னர் ரோமானியர்கள் தங்கள் கடவுள் ஜூபிடருக்கு கோயில் கட்டியுள்ளனர். பின்னர் கி.பி 28ம் ஆண்டு வாக்கில் இங்கு செயிண்ட் எடின் கத்திடரல் (St.Etienne Cathedral) கட்டப்பட்டது. பின்னர் பாரிஸ் நகரின் பிஷப் Maurice de Sully புனித மேரிக்காக ஒரு புதிய தேவாலயத்தை அதே இடத்தில் நிர்மாணிக்க நினைத்து இப்பணிகள் 1163ல் தொடங்கியிருக்கின்றன. இப்பணி 1345 வாக்கில் நிறைவு பெற்றது.

இந்த தேவாலயத்தின் முகப்பு பகுதி மாத்திரம் சிறப்புடையதல்ல. கிழக்கு, மேற்கு, வடக்கு தெற்கு ஆகிய நான்கு வாசல்களும் தனித்துவம் வாய்ந்ததாக அமைக்கப்பட்டுள்ளன. நுணுக்கமான கலை வேலைபாடுகள் சுவற்றின் அழகையும் பிரமாண்டத்தையும் பெருக்கும் வகையில் உள்ளன.

இந்த தேவாலயத்தின் சிறப்பு என்னெவெனில் சுவர்களில் உள்ள ஓவியங்கள், வைக்கப்பட்டுள்ள சிலைகள் ஆகியவை பைபிளில் உள்ள கதைகளை விவரிப்பவை. மிகப் பிரமாண்டமான ஓவியங்கள் தேவாலயத்தின் எல்லா சுவர்களையும் அழகு செய்கின்றன.

இந்த தேவாலயம் கோத்திக் (Gothic Architecture) வகை கட்டிட அமைப்பில் வடிவமைக்கப்பட்டது. தேவாலயத்தின் உள்ளே உள்ள தூண்கள் மிக ஸ்திரமானவை. நீண்டு வியாபித்திருக்கும் இந்த தூண்கள் தரையிலிருந்து மேல் நோக்கி கூரைப்பகுதி வரை செல்லும் படி கட்டப்பட்டுள்ளன.

மாமன்னர் நெப்போலியன் கூட இந்தத் தேவாலயத்தில் முடிசூடிக்கொண்டார் என்பதோடு தனது மனைவியருள் ஒருவரான ஜோஸபினை தனது பேரரசியாகவும் ஏற்றார் என்பதும் ஒரு கூடுதல் தகவல்.

வரலாற்றில் முக்கியமான நிகழ்வாகக் கருதப்படும் ப்ரெஞ்ச் ரெவலூஷனின் (French Revolution) போது பொது மக்கள் பல தேவாலயங்களுக்குள் புகுந்து அங்குள்ள பல சமைய சின்னங்களை அப்புறப்படுத்திய நிகழ்வுகள் நடந்திருக்கின்றன. இந்தப் பாதிப்புக்கு நோர்த்தர டாமும் விதிவிலக்கல்ல. பொது மக்கள் பலர் இங்குள்ள சிலைகளை அப்புறப்படுத்தியும் சிதைத்தும் உள்ளனர். ஆனாலும் சில சிலைகள் 1970ல் மீண்டும் கிடைக்கப்பெற்று அவை இங்கு மீண்டும் சேர்க்கப்பட்டுள்ளன.

தேவாலயத்தின் மேற்கு வாசல் பகுதி வித்தியாசமான ஒன்று. இங்கு மேல் பகுதியில் 28 கற் சிலைகள் ஒவ்வொன்றாக நிற்கும் படி அமைக்கப்பட்டுள்ளன. இந்த 28 கற்சிலைகளும் பண்டைய இஸ்ரேல் நாட்டு ஜூடா மன்னர்களைப் பிரதிபலிப்பவை.

அதே போல வாசல் பகுதியில் உள்ள மூன்று அமைப்புக்களும் மூன்று சரித்திர நிகழ்வுகளைப் பிரதிபலிப்பவை.
1. இறுதிக்கட்டளை (The last judgement)
2. மடோனாவும் தெய்வக் குழந்தையும் (The Madonna and Child)
3. புனித அன்னையார் (St Anne, the Virgin Mother)

மேலும் சிறப்பு மிக்க ஒரு செய்தி என்ன தெரியுமா? 1768ம் ஆண்டில் நில வரையாளர்கள் நோர்த்தர டாம் தேவாலயத்தைப் ப்ரான்ஸ் நாடு முழுமைக்குமான தூர அளவை கணக்கிடும் மையப் புள்ளியாக நிர்ணயித்தினர். ஆக இன்றும் ப்ரான்ஸ் நகரின் எல்லா இடங்களின் தூரமும் நோர்த்தர டாமை மையமாக வைத்தே அளக்கப்படுகின்றன.

நோர்த்தர டாம் தேவாலயத்திற்கு உள்ளே செல்ல நுழைவுக் கட்டணம் தேவையில்லை. ஆனால் பக்கத்திலேயே அடித்தளத்தில் ஒரு அருங்காட்சியகம் இருக்கின்றது. அதற்கு கட்டணம் 5 யூரோ. நேரம் போதாமையால் நான் இந்த அருங்காட்சியகம் சென்று வர இயலவில்லை. அடுத்த முறை பாரீஸ் பயனிக்கும் போது இங்கு செல்வது உறுதி.

பாரிஸ் சாலைகளில்.. (Dec 14 -17) - 4

2011-01-21T09:25:00.001+01:00

லூவ்ரே எனும் பிரம்மாண்டமான இந்தப் பொருட்காட்சி சாலைக்கு சிறப்பு சேர்ப்பவை அதன் உள்ளிருக்கும் கலைப் பொருட்கள் மட்டுமன்று. இந்தக் கட்டிடத்தின் சுவர்கள் கூட கவிதை பாடும் கலைக்கூடம். அதன் வெளிக்கோட்டை சுவரை பல வீரர்கள், மன்னர்களின் சிலை அலங்கரிப்பதைப் போன்று உள்ளிருக்கும் கோட்டையின் சுவர்களைப் பெண் சிலைகள் அலங்கரிக்கின்றன. ஒவ்வொன்றும் ஒரு விதம். அதில் சில இங்கே...

லூவ்ரேவின் சுவர்களை அலங்கரிக்கும் பல்வேறு காட்சிகள் ...

பாரிஸ் சாலைகளில்.. (Dec 14 -17) - 3

2011-01-20T11:01:00.003+01:00

இன்று பாரீஸுக்கு புகழ் சேர்க்கும் லூவ்ரெ பொருட்காட்சியகத்தைப் பற்றிய தகவல்களைப் பகிர்ந்து கொள்கின்றேன்.

The Musee du Louvre என்ற பெயர் கொண்ட இந்தப் பொருட்காட்சியகம் உலகப் புகழ்பெற்ற ஒன்று. உலகின் தலை சிறந்த பல முக்கிய கலைப்பொருட்களைக் இது காட்சிக்கு வைத்துள்ளது.

இந்தப் பொருட்காட்சியகத்தின் முதல் வடிவம் முதன் முதலில் 1190ல் மன்னர் பிலிப் ஆகுஸ்ட் அவர்களால் ஒரு பாதுகாப்பு கோட்டையாக கட்டப்பட்டது. பின்னர் இந்தக் கட்டிடத்தில் பெரும் அளவு மாற்றம் ஒவ்வொரு மன்னர் காலத்திலும் கொண்டுவரப்பட்டு விஸ்தாரமாக்கப்பட்டது. இங்கு ஐரோப்பிய கலைப்பொருட்கள் மட்டுமின்றி ஆப்பிரிக்க, ஆசிய, அமெரிக்க, நாடுகளிலிருந்தும் சேகரிக்கபப்ட்ட பல வரலாற்றுச் சான்றுகள், கலைப் பொக்கிஷங்கள் பாதுகாக்கப்பட்டு வருகின்றன.

லூவ்ரெ செல்வதற்கு மெட்ரோ 1 அல்லது 7 மூலம் பயணிக்கலாம். எனது தங்குமிடத்திலிருந்து 1ம் எண் மெட்ரோ எடுத்து பயணித்து ஒபிலிஸ்க் இருக்கும் concorde மெட்ரோ நிலையத்தில் இறங்கி அங்கிருந்தே நடந்து சென்றேன். இதை விட உடனே லூவ்ரெ செல்ல நினைப்பவர்கள் Palais Royal Musee du Louvre நிலையத்தில் இறங்கிக் கொள்வது நன்று. மெட்ரோ நிலையத்திலிருந்து வெளி வந்த உடனேயே நேராக லூவ்ரே கட்டிடத்தைப் பார்க்கலாம்.

நான் concorde மெட்ரோ நிலையத்தில் இறங்கி ஒபிலிஸ்க் பார்த்து முடித்தபின் இடது பக்கத்தில் அமைந்துள்ள பூந்தோட்டத்தில் நடக்கத் தொடங்கினேன். இந்தப் பூந்தோட்டம் கலை அழகு மிக்கது. ஆங்காங்கே வெள்ளை நிறத்திலான உயர்ந்த கலைச் சிற்பங்கள் உள்ளன. ஆனாலும் டிசம்பர் மாதக் குளிர் என்பதால் பூக்களையும் பசுமையையும் காணவில்லை. வசந்தஹ் காலத்திலும் கோடை காலத்திலும் இப்பகுதி நிச்சயம் மிக ரம்மியமாக இருக்கும் என்பதில் சந்தேகமில்லை.

பூந்தோட்டத்தைக் கடந்து மேலும் நடந்து வரும் போதே லூவ்ரெ வாசலில் நிர்மாணிக்கப்பட்டுள்ள கண்ணாடி பிரமிட்டை பார்க்கலாம். இந்தப் பிரமிட்டையும் லூவ்ரேவையும் டான் ப்ரவுனின் (Dan Brown) நாவல் டாவின்சி கோட் (Da Vinci Code) படித்தவர்களும் இப்படத்தைப் பார்த்தவர்களும் மறந்திருக்க முடியாது. உலகப் பிரசித்தி பெற்ற லியோனார்டோ டா வின்சியின் (Leonardo da Vinci) மோனாலிசா ஓவியம் இங்கு தான் உள்ளது!

இந்தக் கண்ணாடி பிரமிட் லூவ்ரேவிற்கு மிகப் புதிய சேர்க்கை என்றே சொல்ல வேண்டும். 1989ம் ஆண்டு இம் பெய் என்ற ஒரு ஆர்க்கிடெக்ட் இந்த பிரமிட்டை வடிமைத்தார். இந்தp பிரமிட்டின் சிறப்பு என்னவென்றால் இது முழுமைக்கும் இரும்பினாலும் கண்ணாடியாலும் மட்டுமே கட்டப்பட்டது.

லூவ்ரே மண்டபத்தின் சுவர்களை மிகுந்த கலை நயத்தோடு அமைத்திருக்கின்றனர். சுவற்றில் வரிசை வரிசையாக சிலைகள். ஒன்றிலிருந்து ஒன்று மாறுபட்டது. இவை பெறும் பாலும் 16ம் 17ம் நூற்றாண்டில் உருவாக்கப்பட்டவை.

லூவ்ரெ உலகப் பிரசித்தி பெற்ற பல கலைப் பொருட்களைக் காட்சிக்கு வைத்துள்ளது. மோனாலிசா ஓவியத்தைப் பற்றி முதலில் குறிப்பிட்டேன். இது தவிர்த்து,
- 1435ம் ஆண்டின்ன் பிரசித்தி பெற்ற Madonna of the Chancellor Rolin, 15ம் நூற்றாண்டின் ப்ளெமிஷ், டச்சு, ஜெர்மானிய, ஆங்கிலேய ஓவியர்களின் பல பிரசித்தி பெற்ற ஓவியங்கள் இங்குள்ளன.
- பிரமிக்க வைக்கும் இத்தாலிய ஓவியங்கள் , கி.பி 1200 முதல் 1800 வரையிலான, பற்பல ஓவியங்கள் இங்கு தேதி வாரியாக குறிப்பிடப்பட்டு வைக்கப்பட்டுள்ளன.
ஓவியங்கள் மட்டுமல்ல- கலைச் சிற்பங்கள், அதிலும் பண்டைய ப்ளெமிஷ், ஜெர்மானிய, ப்ரென்ச்சு கலைவடிவங்கள் பல இந்த லூவ்ரெவில் உள்ளன.
- லூவ்ரேவின் சிறப்பை மேலும் உயர்த்துவது இங்குள்ள கிரேக்க, எகிப்திய கலை வடிவங்கள். இதில் குறிப்பிடத்தக்கதாக அமைந்துள்ளது உலகின் மிகப் பழமையான மெசப்பொட்டாமியன் நாகரிகத்தின் அதிகாரப்பூர்வ கட்டளைகள் அடங்கிய நூலான
ஹம்முரபி கட்டளைகள் (Code of the Babylonian King Hammurabi). இது கி.மு 1700 என குறிப்பிடப்படுகின்றது.

இப்படி பலப் பல கலைப் பொருட்கள், பழம் நூல்கள், வரலாற்றுச் சான்றுகள் இங்கு வைக்கபப்ட்டுள்ளன.

இங்குள்ள கலைப் பொருட்களை பார்த்து முடிக்க ஒரு நாள் நிச்சயம் போதாது. பண்டைய வரலாற்று தகவல்களில் ஆர்வம் உள்ளவர்களுக்கு லூவ்ரெ ஒரு பொக்கிஷம்.

பாரிஸ் சாலைகளில்.. (Dec 14 -17) - 2

2010-12-19T11:32:00.002+01:00

பாரீஸ் நகரின் உள்ளே பயணிப்பவர்கள் வாகனத்தில் செல்வதை முற்றிலும் தவிர்த்து விடுவது நல்லது. எல்லா இடங்களிலும் போக்குவரத்து நெரிசலை தவிர்க்க முடியாது. ஆனால் மெட்ரோ நம்பகரமான பொது போக்குவரத்து சாதனம். கையில் மெட்ரோ தொடர்பு வரைபடம் வைத்திருத்தல் மிக அவசியம். பாரீஸ் மெட்ரோ வரைபடம் இங்கே காணலாம். http://www.aparisguide.com/maps/metro.htm

எனது தங்கும் விடுதி Le Meridien Montparnasse அமைந்திருந்த இடம் Montparnasse பகுதியில். ஹோட்டலிற்கு அருகிலேயே ஒரு மெட்ரோ ஷ்டேஷனும் இருப்பதால் எனது பயனம் வெகு சுலபமாகவே அமைந்திருந்தது. மெட்ரோ எண் 13ல் Gaite ஷ்டேஷனில் இறங்கினால் 3 நிமிடத்தில் ஹோட்டலை அடைந்து விடலாம். எனது அலுவலக பணி அமைந்திருந்த இடமான Saint-Denis Porte de Paris க்கு மெட்ரோ 13 லியே பயணித்து 35 நிமிடத்தில் அடைந்து விடலாம். ஆக தினமும் பயணிக்க மெட்ரோ மிகச் சுலபமாகவும் வசதியாகவும் அமைந்திருந்தது.

பாரீஸிலுள்ள முக்கிய இடங்களில் சிலவற்றை பற்றிய தகவல்களை இங்கு பகிர்ந்து கொள்ள நினைத்திருக்கின்றேன். முதலில் Place de la Concorde எனப்படும் பகுதி. இப்பகுதியை அடைய Gaite ஷ்டேஷனிலிருந்து பயணித்து 1ம் எண் மெட்ரோ எடுத்து Concorde ஷ்டேஷனில் இறங்க வேண்டும். இப்பகுதி மிகப் பிரமாண்டமான வரலாற்று சிறப்பு மிக்க நிகழ்வுகளைச் சந்தித்த ஒரு பகுதி. முதலில் இங்கே நம்மை வரவேற்பது இங்கு வானை நோக்கி நிமிர்ந்து நிற்க்கும் எகிப்திய ஒபிலிஸ்க்.

இந்த ஒபிலிஸ் 3200 ஆண்டுகள் பழமை வாய்ந்தது. பண்டைய எகிப்தின் வரலாற்றுச் சின்னம். எகிப்து நாட்டின் லுக்ஸோர் (Luxor) நகரிலிருந்து இங்கு கொண்டு வரப்பட்டது.

அப்போதைய மன்னர் லூயிஸ் பிலிப் அவர்களுக்கு எகிப்திய வைசராய் முகம்மது அலி 1836ல் அளித்த பரிசுப் பொருள் இது. அப்போது இவர் எகிப்து மற்றும் சூடான் ஆகிய நாடுகளுக்கு வைசராயாக பதவி ஏற்றிருந்தவர். இதே எகிப்திய வைசராய் தான் பிரித்தானிய மியூஸியத்தில் உள்ள கிளியோபாத்ராவின் ஊக்கு ஒன்றினையும் பரிசாக அளித்தவர். எகிப்து போன்ற பழமை வாய்ந்த வரலற்று நாகரிகத்தை உடைய நாடுகளுக்கு இவ்வகையான் இழப்புக்கள் பல முறை நிகழ்ந்துள்ளன என்பது வேதனை தரும் விஷயம் தான்.

சரி. இந்த ஒபிலிஸ்க்கை பார்ப்போம். நான்கு புறமும் எகிப்திய ஹிரோகிலிப்ஸ் (hieroglyphics) எழுத்துக்கள் பொறிக்கப்பட்ட பண்டைய எகிப்திய கலாச்சாரத்தின் சின்னம் இது.

இந்த 250 டன் எடையுள்ள ஒபிலிஸ்க்கை இங்கே கொண்டு வந்து சேர்த்து அதனை இப்பகுதியில் பதித்த வேலை பற்றிய விளக்கம் இந்த ஒபிலிஸ்க்கின் கீழ் பகுதியிலேயே பொறிக்கப்பட்டிருக்கின்றது.

இந்த ஒபிலிஸ்க்கின் கூர்மையான மேல் பகுதி பிரமிட் போன்ற அமைப்பு 6ம் நூற்றாண்டு வாக்கில் எகிப்திலேயே திருடப்பட்டு காணாமல் போய்விட்டதாம். பல ஆண்டுகள் இந்த மேல் பகுதி இன்றியே காணப்பட்ட இந்த ஒபிலிஸ்க்கின் மேல் பிரமிட் பகுதியை 1998ல் தங்கத்தால் வடிவமைத்து மாற்றம் செய்துள்ளது ஃப்ரான்ஸ் அரசாங்கம்.

ஒபிலிஸ்க் என்பது எகிப்திய தேவ பாஷையில் தேஜேன் (Tejen) எனக் குறிப்பிடப்படுகின்றது. இது தீய சக்திகளிடமிருந்து காக்கும் தன்மை வாய்ந்ததாக பண்டைய எகிப்திய மக்களால் நம்பப்பட்டது. பண்டைய எகிப்திய கலாச்சாரத்தில் ஒபிலிஸ்க்குகள் ஆலயத்தில் வைப்பதற்காக உருவாக்கபப்ட்டவை. ஒபிலிஸ்க்குகள் எப்போதும் இரண்டாகவே தயாரிக்கப்படுமாம். இரண்டு ஒபிலிஸ்க்குகளை ஆலயத்தில் நட்டு வைப்பதுவே வழக்கமாக இருந்திருக்கின்றது. ஒபிலிஸ்க் சூரியக் கதிர்களை பிரதிபலிக்கும் ஒன்றும் கூட. சூரியக் கடவுள் RA பொறிக்கப்பட்ட ஒப்லிஸ்க் பாரிஸிலும் இருந்து அங்கு பிரகாசித்துக் கொண்டிருக்கின்றது.

அன்புடன்
சுபா

பாரிஸ் சாலைகளில்.. (Dec 14 -17) - 1

2010-12-18T11:31:00.000+01:00

நண்பர் ஆண்டோ பீட்டரின் துணைவியார் ஸ்டெல்லாவின் அண்ணன் ஸ்டெபி பாரிஸில் சில ஆண்டுகளாக இருக்கின்றார். இதுவரை அவரைப் பார்க்கும் வாய்ப்பு எனக்கு கிட்டவில்லை. எப்போது பாரீஸ் சென்றாலும் அலுவலக வேலைகளை முடித்து சற்று பக்கத்திலேயே ஏதும் சுற்றிப் பார்த்து விட்டு வந்து விடுவது தான் வழக்கம். ஸ்டெபியிடம் தொலைபேசியில் பேசும் போதெல்லாம் வந்தால் கட்டாயமாக பார்க்க வேண்டுமென்று அடிக்கடி சொல்வார். ஆக, இந்த முறை பாரீஸ் செல்லும் போது எப்படியும் நேரம் ஒதுக்கி அவரை பார்த்து வர வேண்டும் என்று முடிவெடுத்திருந்தேன். முதல் நாள் செவ்வாய்கிழமை வேலை அதிக நேரம் எடுத்துக் கொண்டதால் ஸ்டெபியைக் காணும் வாய்ப்பு அமையவில்லை. மறுநாள் மாலை ஏழு மணி அளவில் வேலையை முடித்துக் கொண்டு அவரைச் சந்திக்கலாம என் ஏற்பாடு செய்து அழைத்தேன். எனது வேலை அமைந்திருந்த இடம் Saint-Denis Porte de Paris மெட்ரோ ஸ்டேஷனுக்கு அருகில். ஆக அங்கேயே சந்திப்பதாக முடிவாகியது. என்னுடன் பணியில் ஈடுபட்டிருந்த ஸ்பெயினிலிருந்து வந்திருந்த மற்றொரு நண்பரும் வருவதாக குறிப்பிட்டதால் இருவரும் மெட்ரோ ஸ்டேஷனுக்கு விரைந்தோம்.

அறிமுகப்படுத்தி பேசிக் கொண்டபின்னர் எங்கே போகலாம் என்று யோசித்தோம். பாரீஸில் தமிழர்கள் குழுமியுள்ள லா சப்பெல் (La Chappele )சென்று அதிக நாட்களாக இருக்கும். அதனால் இங்கே செல்லலாமே என்று கேட்க அவருக்கும் அதில் சந்தோஷம்.

பாரிஸில் இப்பகுதி தமிழர்களின் வியாபார தலம் என்றால் அதனை மறுக்க முடியாது. நிறைய தமிழர்கள் நடத்தும் கடைகளும், ஹிந்து ஆலயங்களும் இங்கு உள்ளன. ஆறு ஆண்டுகளுக்கு முன்னர் நா.கண்ணனும் நானும் இங்குள்ள ஒரு விநாயகர் ஆலயத்தில் சமைய சொற்பொழிவு செய்வதற்காகச் சென்றிருந்தோம். ஒரு கட்டிடத்தின் உள்ளே அமைந்திருக்கும் ஆலயம் இது. முறையாக பூஜைகள் வழிபாடுகள், திருவிழாக்கள் எல்லாம் நடைபெற்று வருகின்றன. கோடை காலத்தில் அதிலும் விநாயகர் சதுர்த்தி இங்கு விமரிசையாகக் கொண்டாடப்பட்டும் வருகின்றது.

சாலையின் இரு பக்கங்களிலும் இலங்கைத் தமிழர்களின் அபார முயற்சியில் பல கடைகள் உறுவாகியிருக்கின்றன. சேலை துணி மணி வகைககள், மளிகைப் பொருட்கள், உணவு விடுதிகள், தொலைபேசி அட்டை விற்பனை கடைகள், இறைச்சிக் கடைகள் என ப்ரெஞ்ச், தமிழ் ஆங்கிலத்தில் பெயர் அட்டைகளோடு கடைகளை சாலையில் பார்க்கலாம்.

ஸ்டெபியின் நண்பர் ஒருவர் இந்திய திரைப்பட வீடியோ படங்களின் கடை ஒன்றினை வைத்திருக்கின்றார். அவரது கடைக்கு என்னை அழைதுச் சென்றிருந்தார் ஸ்டெபி. எந்த படம் வேண்டுமோ எடுத்துக் கொள்ளுங்கள் என்று கட்டளை வேறு. எனக்கு எதனைத் தேர்ந்தெடுப்பது என்றே தெரியவில்லை. வேண்டாம் என்று மறுத்தாலும் ஏதாவது ஒரு வீடியோ படமாவது நான் பெற்றுக் கொள்ள வேண்டும் என்று கூறி விட்டனர். நீங்களே தேர்ந்தெடுத்துத் தாருங்கள் என்று சொல்ல 2 வீடியோ - ஒரு டிவிடியில் என்றவாறு நான்கு தமிழ் திரைப்படங்கள் கொண்ட டிவிடி - களவாணி, அகங்காடித் தெரு, பாண்டவர் பூமி,பசங்க என்று நான்கு படங்கள் எனக்கு கிடைத்தன.

இந்தக் கடைக்கு ப்ரெஞ்ச் மக்களும் வந்து டிவிடி வாங்கிச் செல்கின்றனர். ஒரு பகுதி முழுதும் ப்ரெஞ்ச் சப் டைட்டில் உள்ள போலிவூட் டிவிடிக்கள் வைக்கப்பட்டிருக்கின்றன. நான் கடையில் இருந்த போதே இரண்டு ப்ரெஞ்ச் காரர்கள் டிவிடி கதையை விற்பனையாளரிடம் கேட்டு விளக்கம் பெற்றுக் கொண்டிருந்தார்.

நான்கு புதிய படங்களின் டிவிடிக்கள் கிடைத்த சந்தோஷம் எனக்கு. சரி அங்கிருந்து புறப்பட்டு சாப்பிடச் செல்லலாம் என முடிவாகியது. அங்கிருந்து சற்று தூரம் சென்றால் தமிழ் நாட்டின் புகழ் மிக்க உணவகமான சரவணபவன் எங்களை வரவேற்றுக் கொண்டிருந்தது. சரவணபவன் உணவகத்தில் உணவருந்தும் வாய்ப்பை நழுவ விடலாமா..?

சாதம் இட்லி வடை என தமிழ் நாட்டு ஸ்பெஷல் உணவை சுவைத்து சாப்பிட்டோம். எனது அலுவலக நண்பருக்கும் தமிழ் உணவின் இது முதல் அனுபவம். அவருக்கு மெது வடையும் தேங்காய் சட்னியும் மிகவும் பிடித்து விட்டது.

நல்ல உணவருந்தி பிறகு சற்று லா சாப்பல் பகுதி கடைகளை பார்த்து விட்டு புறப்பட்டோம். குளிர் மிக அதிகமாகிக் கொடிருந்தாலும் சாலையில் மக்கள் போக்குவரத்து கொஞ்சமும் குறையவில்லை. பாரீஸ் மெட்ரோவின் சேவை பிரமாதம் ஒவ்வொரு 3 நிமிடத்திற்கும் ஒரு மெட்ரோ என நமது பயணத்தை சுலபமாக்குகின்றது.

அடுத்து தொடர்ந்து Notre-Dame, conciergie, concorde, Pyramid, Musee de louvre ஆகியவற்றின் படங்களையும் நேரம் கிடைக்கும் போது பகிர்ந்து கொள்கின்றேன்.

அன்புடன்
சுபா

மலாகா(ஸ்பெயின்) சுற்றுலா - செப்ட்-அக்டோபர் 2009 - 13

2009-11-24T21:47:00.000+01:00

14 நாட்கள் எங்கள் பயணம். மலாகாவிலிருந்து இப்போது எங்கள் விமானம் மயோர்க்கா சென்று பின்னர் அங்கிருந்து ஸ்டுட்கார்ட் வந்து சேர்ந்தோம்.

ஸ்பெயின் நகரின் தீவுகளான க்ரான் கனேரியா, டெனரிபா, லா கொமேரா ஆகியவற்றிற்கு நான் முன்னரே பயணித்திருக்கிறேன். இருந்த போதிலும் அண்டலூசிய பயணம் மிக முக்கியமான, மறக்க முடியாத ஒரு பயணம் என்றே நான் நினைக்கிறேன். எனக்கு அடிப்படையிலேயே சரித்திர வரலாற்று பின்னனி, தொல்பொருள் ஆய்வு, ஒரு இனத்தின் மரபு பற்றிய விஷயங்கள் போன்றவற்றில் மிகுந்த ஆர்வம் இருப்பதால் மிகப் பிரமாண்டமான சரித்திரப் பின்னனியைக் கொண்டிருக்கும் ஸ்பெயின் என் கவனத்தைக் கொள்ளை கொண்டதில் எந்த சந்தேகமுமில்லை. மீண்டும் ஒரு முறை அண்டலூசிய செல்ல எனக்கு திட்டம் இருக்கிறது. அதன் பொழுது அண்டாலூசியாவின் தலை நகரமான செவியா, மற்றும் காடிஸ் மற்றும் சரித்திரப் புகழ்பெற்ற கோர்டோபா நகரங்களுக்குச் செல்ல வேண்டும் என்று மனதில் நினைத்துக் கொண்டிருக்கிறேன். அது சாத்தியப்பட்டால் அடுத்த அண்டலூசிய பயணக் கட்டுரையும் நிச்சயம் உருவாக்கம் பெரும்.

குறிப்பு: முதல் இரண்டு ஸ்பெயின் வரைப்படங்களைத் தவிர ஏனைய படங்கள் உரிமை சுபாஷினி & பீட்டர் ட்ரெம்மல்.

மலாகா(ஸ்பெயின்) சுற்றுலா - செப்ட்-அக்டோபர் 2009 - 12

2009-11-23T21:46:00.002+01:00

அதனைத் தொடர்ந்து செல்லும் போது நுணுக்கமான கைவினைப் பொருட்கள் செய்யும் சிறிய பட்டறைகள்; அவற்றில் தொடர்ந்து வேலை நடந்து கொண்டிருப்பதையும் காணமுடிந்தது. இந்த இஸ்லாமியக் கோட்டைக்குள் முதலில் சுற்றுப் பயணிகளை வரவேற்கும் மண்டபம் அன்னா மரியா தேவாலயம். 1492ல் கிரானாடா முஸ்லிம் ஆட்சியாளர்களிடமிருந்து கத்தோலிக்க ஆட்சியாளர்கள் வசம்
வீழ்ந்திருக்கின்றது. அப்போது தொடங்கி பல இஸ்லாமிய கட்டிடங்கள் மதமாற்றம் செய்யப்பட்டுள்ளன. இதற்கு அல்ஹம்ராவும் விதிவிலக்கல்ல.

இந்த தேவாலயத்தை அடுத்து பிரமாண்டமான ஒரு மாளிகை. இது தற்போது தொல்பொருள் கண்காட்சி ஆய்வு நிலையமாக பாதுகாக்கப்பட்டு பல அரும் பொருட்கள் காட்சிக்கு வைக்கப்பட்டுள்ளன.

இந்த மளிகையை அடுத்து பூந்தோட்டத்தைக் கடந்து நடந்தால் மேலும் சில கோட்டைகள். போர் வீரர்கள் தங்குவதற்காக உருவாக்கப்பட்ட கட்டிடங்கள். இவற்றின் ஓரமாக அழகிய பூந்தோட்டம்.

இவையெல்லாவற்றையும் பார்த்த பின்னர் அடுத்ததாக அரண்மனைக்குச் செல்ல வேண்டும். அரண்மனை மட்டுமே ஒரு குட்டி நகரம் போல இருந்ததை உள்ளே நுழைந்ததும் பார்த்து வியந்தோம். பூந்தோட்டம். விதம் விதமான மலர்கள். கண்களைக் கொள்ளை கொள்ளும் காட்சி. இதனைக் கடந்து வந்தால் அரண்மனை மாளிகைகள். ஒன்றை அடுத்து ஒன்றாக.

இந்த அரண்மனை மாளிகை ஒவ்வொன்றும் கலை நயத்திற்கு ஒரு எடுத்துக் காட்டு. http://en.wikipedia.org/wiki/Alhambra

இஸ்லாமிய சமய சின்னங்கள், அராபிய எழுத்துக்கள், மலர்கள் இலைகள் என பல்வேறு சின்னங்கள் மிக நுணுக்கமாக சிற்பிகளால் வடிவமைக்கப்பட்டுள்ளன.

சுவர்கள் மட்டுமல்ல; தூண்கள், மதில்கள், நடை பாதை என எல்லா பகுதியுமே கலை வண்ணம் காட்டி பிரமிக்க வைப்பவை.

மாளிகைக்கு இடையிடையே பூந்தோட்டங்கள், அழகிய குளங்கள். பார்த்தது போதும் என நினைத்து நடந்தால் மேலும் சில பகுதிகள். மீண்டும் பெரும் தோட்டம், மேலும் மாளிகைகள் என 4 மணி நேரம் அரண்மனையைச் சுற்றுவதிலேயே கழிந்தது.

அல்ஹம்ரா கோட்டையை மட்டுமே ஒரு நாள் எங்களால் தரிசிக்க முடிந்தது. இந்தக் கோட்டை மட்டுமல்லாது கிரானாடா அதன் வெள்ளை கிராமத்திற்கும், இயற்கை அழகிற்கும், சரித்திர சுவடுகளுக்கும் மிகப் புகழ் பெற்ற ஒரு நகரம். இப்பகுதிக்கு சென்ற எங்கள் பயணம் மறக்க முடியாத ஒரு இனிய அனுபவமாகவே அமைந்தது.

கிரானாடாவிலிருந்து எஸ்டாபோனா பயணம் மீண்டும் ஏறக்குறைய 240 கிமீ பயணம். நானும் என் கணவரும் வாகனத்தை மாற்றி மாற்றி ஓட்டியதால் பயணக் களைப்பை சற்று குறைக்க முடிந்தது.

கிராணாடா பயனத்திற்குப் பின்னர் இரண்டு நாட்கள் மீண்டும் எஸ்டாபோனா நகரிலேயே எங்கள் பொழுதை கழித்து சற்று ஓய்வெடுத்துக் கொண்டோம்.

மலாகா(ஸ்பெயின்) சுற்றுலா - செப்ட்-அக்டோபர் 2009 - 11

2009-11-20T21:46:00.001+01:00

12ம் நாள் - கிரானாடா

கிப்ரால்டாவில் எங்கள் பயணம் சோர்வை ஏற்படுத்தியதால் இடையில் ஒரு நாள் ஓய்வுக்குப் பின்னர் கிரானாடா நோக்கி எங்கள் பயணத்தைத் திட்டமிட்டோம்.

எஸ்டாபோனாவிலிருந்து கிரானாடா ஏறக்குறைய 240 கி.மி தூரம். கிராணாடா அதன் பெயர் எதிரொலிப்பது போல (Grand, Granada) பிக பெரிய ஒரு நகரம். நகர் முழுதையும் சுற்றிப் பார்க்க குறைந்தது 4 நாட்கள் தேவைப்படும். ஆனால் இந்த நகரின் மிகப் பிரசித்தி பெற்ற அல்ஹம்ரா கோட்டையை மட்டும் பார்த்து வருவது என்பது தான் நோக்கமாக இருந்ததால் ஒரு நாள் பயணம் மேற்கொண்டோம். எஸ்டாபோனாவிலிருந்து வடக்கு நோக்கிய பயணம். மலைபகுதியைக் கடந்து செல்லும் போது சாலையின் இரு பகுதியிலும் ஏக்கர் ஏக்கராக ஆலிவ் மரங்கள். இப்படி ஒரு பெரும் ஆலிவ் பயிரீட்டை நான் இதுவரைப் பார்த்ததில்லை என்பதால் ஆச்சரியத்திலும் அதன் அழகிலும் என்னை மறதேன் என்றுதான் சொல்ல வேண்டும்.

கிரானாடா சரித்திர புகழ்பெற்ற ஒரு நகரம். ஸ்பெயின் வருபவர்கள் அனைவரும் கான விரும்பும் ஒரு நகரம். சியாரா நவேடா மலச்சிகரங்களின் பனிமலத்தொடரை ஒட்டி அமைந்த நகரம் இது. கிரானாடா டாரோ நதி இரண்டாகப் பிரிக்கும் இரண்டு மலைத்தொடர்களான அல்ஹம்ரா அல்பைசின் இரண்டையும் கொண்டுள்ளது. அல்பைசின் மிகப் பழமை வாய்ந்த ஒரு நகரம். 2300 ஆண்டுகளுக்கு முன்னரே எலிபிர்ஜெ (Elibyrge) எனச் சொல்லப்படும் குடியினர் இபேரியன் (Iberian) நாகரிகத்தை இங்கு தோற்றுவித்துள்ளனர். இப்பகுதி முழுவதுமே பல்பவேறு தருணங்களில் ரோமானியர்கள், அரேபியர்கள், கத்தோலிக்க ஆட்சிக்குட்படுத்தப்பட்டவை. போர், மற்றும் மதம் சார்ந்த விஷயங்கள் விட்டுச் சென்றுள்ள தடங்கள், இன்னமும் அழியாமல் பாதுகாக்கப்படுவது பெறும் சிறப்பு.

அல்ஹம்ரா - இந்த அரச நகரம் அரேபியர்கள் காலத்தில் கட்டப்பட்டது. மிகப் பிரமாண்டமான கோட்டை. சொர்ண மலை (Cerro de la Sabika) எனும் மலையில் இந்த பெறும் கோட்டை அமைந்துள்ளது. ஸ்பெயின் நாட்டின் கட்டிடக் கலை பெறுமைக்கு மிகப் பெரிய சான்றாக இந்த கோட்டை இன்று விளங்குகின்றது. இந்தக் கோட்டையின் கட்டுமான பணி முன்னூறு ஆண்டுகள் நடைபெற்றுள்ளது. அரேபிய சித்திரக் கலை கட்டுமானக் கலையை மிக நுணுக்கமான வேலைப்பாடுகளைக் கொண்ட சுவர்கள், விசாலமான தோட்டம் என ஒரு குட்டி நகருக்குள் பிரவேசிப்பது போன்ற அனுபவத்தை இந்தக் கோட்டை வழங்குகின்றது.

இந்தக் கோட்டையைச் சுற்றிப்பார்க்க 13 யூரோ கட்டணம். காலை 8 மணியிலிருந்து இங்கு சுற்றிப் பார்க்க அனுமதி வழங்கப்படுகின்றது. விடுமுறை காலங்களில் இந்த கோட்டைக்கு வருபவர்களின் எண்ணிக்கை அதிகம் என்பதால் முன்னதாகவே இணையத்தின் வழி நுழைவுச் சீட்டு எடுத்துக் கொள்வதற்கும்
வாய்ப்புள்ளது.

உள்ளே நுழையும் போது முதலில் நீளமான பச்சை பசேலென கம்பளம் விரித்தார் போன்ற புல்வெளியும் தோட்டமும்.

மலாகா(ஸ்பெயின்) சுற்றுலா - செப்ட்-அக்டோபர் 2009 - 10

2009-11-18T21:44:00.002+01:00

10ம் நாள் - கிப்ரால்டா

இடையில் இரண்டு நாட்கள் ஓய்வின் போது கடற்கரை அழகை ரசிப்பதிலும் புத்தகத்தை வாசிப்பதிலும் எங்கள் பொழுதுகள் கழிந்தன.

எங்கள் பயணப் பட்டியலில் இருந்த அடுத்த நகரம் கிப்ரால்டா. கிப்ரால்டா ஸ்பெயினின் ஒரு தீபகற்பமாக இருந்தாலும் இது இங்கிலாந்தைச் சேர்ந்த ஒரு நகரம்(நாடு). துறைமுகம் பாதுகாப்பு போன்ற முக்கிய காரணங்களுக்காக இந்த சிறிய தீபகற்ப பகுதியை இங்கிலாந்து ஸ்பெயினிற்கு விட்டுக் கொடுக்காமல் தானே வைத்திருக்கின்றது.

எஸ்டாபோனாவிலிருந்து ஏறக்குறைய 120 கிமி தூரத்தில் கிப்ரால்டா உள்ளது. உள்ளே செல்ல பாஸ்போர்ட் நிச்சயமாக வேண்டும். ஸ்பெயின் மொழியிலிருட்ந்து ஆங்கிலத்திற்கு எல்லாமே எனும் திடீர் மாற்றத்தை நன்றாக உணர முடிந்தது.

கிப்ரால்டா ஒரு மிகச் சிறிய நாடு என்று தான் சொல்ல வேண்டும். ஒரு நாளில் ஏறக்குறைய எல்லாவற்றையும் பார்த்து விடலாம். உள்ளே பாதுகாப்பு பகுதியைத் தாண்டி வாகனத்தைச் செலுத்தியதுமே குறுகிய சாலைகளைக் கடந்து கிப்ரால்டா பாறையில் அமைந்துள்ள பகுதிகளைக் காண முடிவெடுத்து பயணித்தோம்.

St.Michael's Cave - இந்த குகை பல நூற்றாண்டுகளாக மனிதர்கள் இருந்ததற்கான தடயங்களைக் கொண்ட ஒரு பகுதி.

குகையின் உள்ளே பிரமாண்டமாக இயற்கையாக உருவாகியுள்ள stalactites மற்றும் stalagmites இயற்கையின் அதிசயத்திற்கு ஒரு உதாரணம்.

இங்கு குகையின் உள்ளே கலை நிகழ்ச்சிகளும் நடத்தப்படுகின்றன என்ற கேள்வியுற்றபோது மலைப்பாக இருந்தது.

இந்தக் குகையைப் பார்த்து கீழே வரும் போது சாலையில் குரங்குகளின் பவனியையும் ரசிக்கலாம். இவை மிக அன்பான குரங்குகள் என்று தான் சொல்ல வேண்டும்.

யாரையும் தொந்தரவு செய்யாமல் கொழு கொழுவென்று மிகப் பெரிதாக குழந்தை குடும்பம் என்று கூட்டமாக சுவர்களில் சாலை ஓரத்தில் அமர்ந்து கொண்டு இவை இருப்பதை ரசிக்காமல் செல்ல முடியாது.

இதனை அடுத்து மூரிஷ் கோட்டை, போர் குகை, தேவாலயம் எனப் பார்த்து விட்டு கீழே இறங்கி மதிய உணவு சாப்பிட்டு பின்னர் சாலையில் நடந்து வருகையில் அழகான ஒரு யூத சினோகக் மற்றும் ஒரு ஹிந்து ஆலயத்தையும் பார்த்து அன்று மாலையே எஸ்டாபோனா திரும்பினோம்.

கிப்ரால்டா முதலாம் உலகப் போர், இரண்டாம் உலகப் போர் மட்டுமல்லாமல் பல முறை போர் காரணங்களுக்காக முக்கிய பாதிப்பினை எதிர்நோக்கிய ஒரு பகுதியாகவே இருந்திருக்கின்றது. தெற்கு நோக்கினால் ஆப்பிரிக்க கண்டம். துனேசியா, மரோக்கோ என ஆப்பிரிக்க நாடுகள். வடக்கில் ஸ்பெயின் மேற்கில் போர்த்துகல். இந்தப் பகுதி அமைந்துள்ள இடமும் மிக முக்கியமான ஒரு காரணமாக அமைவதால் பல நாடுகள் கிப்ரால்டாவை தங்கள் வசப்படுத்திக் கொள்வதில் ஆர்வம் காட்டியிருப்பது ஆச்சரியமளிக்கும் ஒன்றல்ல.

மலாகா(ஸ்பெயின்) சுற்றுலா - செப்ட்-அக்டோபர் 2009 - 9

2009-11-16T21:43:00.001+01:00

ரோண்டா மலைப்பகுதியில் அமைந்த ஒரு நகரம். சுற்றுப் பயனிகள் மலைகளின் அழகை ரசிக்க ஏதுவாக இந்தகரின் முக்கியப் பகுதி சாலைகளும் நடைப்பாதைகளும் வடிவமைக்கப்பட்டிருக்கின்றன. இயற்கை அழகை ரசிப்பது மட்டுமல்லாது இசையயும் ரசிக்கும் வகையில் ஆங்காங்கே தென்படும் கலைஞர்கள் வேறு. இவற்றை ரசித்துக் கொண்டு மலைச் சுவரின் அழகினைக் காண முடிகின்றது.

தொடர்ந்து நடந்து வந்தால் 'புதிய பாலம்' உள்ள பகுதியை வந்தடையலாம். 18ம் நூற்றாண்டின் இறுதியில் கட்டப்பட்ட பாலம் இது. இந்நகரின் மிக முக்கிய சின்னமாகவும் இப்பாலம் அமைகின்றது. பாலத்தின் இருபுரமும் மிகப்பிரமாண்டமான இயற்கைக் காட்சிகள். இதனைப் பார்த்துக் கொண்டே நடக்கும் போது நேரம் செல்வதே தெரிவதில்லை.

பாலத்தின் ஓரத்திலேயே உணவருந்த ஏதுவாக நல்ல உணவகங்கள்.

இந்த உனவகத்திலிருந்து கீழே நோக்கினால் தென்படும் ஆற்றை மூரிஷ் அரசரின் இல்லத்திலிருந்து அடைந்து விடலாம். அங்கு தான் எங்கள் அடுத்த பயனம்.

La Casa del Rey Moro - The Mine, the moorish King's house. - மூரிஷ் அரச இல்லத்தில் பார்ப்பதற்கு இரண்டு மிக முக்கிய அம்சங்கள் உள்ளன. முதலாவது குகை வழியாக இல்லத்திற்குச் செல்லும் பாதை. அடுத்தது ப்ரெஞ்சு கலைஞர் ஒருவர் வடிவமைத்துள்ள பூந்தோட்டம். குகைப்பாதைக்குச் செல்ல முதலில் நாம் பூந்தோட்டத்தைக் கடந்து தான் செல்ல வேண்டும்.

இந்த மூரிஷ் அரச இல்லம் 14ம் நூற்றாண்டில் கட்டப்பட்ட ஒன்று. (மூரிஷ் அரசர் அபோமெலிக் (Abomelic)). குகையின் கீழ்பகுதி அரச குடும்பத்தினர் நீராடவும் தனிமையில் இருக்கவும் தகுந்த வகையில் அமைக்கப்பட்டுள்ளது. ஏறக்குறைய 250 படிகளைத் தாண்டி கீழே வந்தால் இந்த ஆற்றினையும் அதனை ஒட்டியுள்ள மலைகளின் பிரமாண்டமான சுவர்களையும் ரசிக்கலாம்: இந்தகரின் பேரழகில் இதுவும் ஒன்று என்றால் மறுக்க முடியாது.

படிகள் பாம்பு போல வளைந்து வளைந்து வருபவை, முழுதும் இருள் வேறு. ஆனாலும் பாதுகாப்பாக வைத்திருப்பதால் பிரச்சனையின்றி கீழ் பகுதி வரை வந்து செல்ல முடிகின்றது. கீழ்பகுதியை அடைந்ததும் இளம் பச்சையிலான நீரோடையைக் கண்டு ரசிக்க முடிந்தது. இது கொள்ளை அழகு. இதனை சுற்றிப்பார்க்க இருவருக்கு 4 யூரோ கட்டணம் வசூலிக்கப்படுகின்றது.

இந்த குகையின் கீழ்ப்பகுதியில் ஒரு பாதுகாப்பு அரங்கம் ஒன்று கட்டப்பட்டுள்ளது. அதோடு sala de secretos - Room of secrets எனப்படும் பகுதியில் பக்கத்திலே போர்க்கருவிகள் வைக்கும் இடமும் உள்ளது. sala de secretos ல் சுவருக்குப் பின்னர் பேசினால் சுவருக்கு அடுத்த பகக்த்தில் உள்ளவர்களுக்கு கேட்காதாம். இதுவும் ஒரு முக்கிய ரகசிய இடமாக மூரிஷ் மன்னர் காலத்தில் பயன்பாட்டில் இருந்துள்ளது.

கீழே ஆற்றிலிருந்து மேலே செல்ல 60 மீட்டர் உயரம் நடக்க வேண்டும். ரோண்டா மட்டுமல்ல, அண்டாலூசியாவில் பார்க்க வேண்டிய முக்கிய இடங்களில் இதுவும் ஒன்று.

இப்பகுதியைக் கடந்து தொடர்ந்து நடந்து வரும் போது இடது புறத்தில் புதிய பாலம் செல்வதற்கான் வழி உள்ளது. இதன் முகப்பில் இருப்பது பிலிப் வளையம் (The Arch of phillip V).

இடது புறம் செல்லாமல் வலது பக்கமாக நடக்க ஆரம்பித்தால் மார்க்கீஸ் மாளிகையைக் (Palace of the marquis de Salvatiera) காணலாம்.

தொடர்ந்து நடந்து வரும் போது இடையிடயே சாலைகளின் இரு பக்கங்களிலும் உள்ள கடைகள், வெள்ளை வர்ணத்திலான வீடுகள் போன்றவற்றைப் பார்த்தவாறே நடந்து நகராண்மைக் கழக கட்டிடம் இருக்கும் இடம் வரைக்கும் வந்தால் இந்தகரின் மிக முக்கிய சின்னமான அன்னை சாந்த மரியா தேவாலயத்தை அடையலாம்.

இந்த தேவாலயம் இந்நகர கட்டிட கலைகளின் மையம் என்று தான் நான் சொல்வேன். இயற்கை அழகை பார்க்கின்ற நம் கண்களுக்கு கலை அழகையும் கொட்டிக் கொடுக்கும் வகையில் இந்த தேவாலயம் அமைந்துள்ளது.

தேவாலத்திற்கு நுழைவுக் கட்டனம் 4 யூரோ. உள்ளே செல்லும் போது தேவையான ஒரு ஐரோப்பிய மொழியில் விளக்கம் தரும் கருவியை எடுத்துச் சென்று ஒவ்வொரு பகுதியிலும் விளக்கப்படும் செய்திகளைக் கேட்டு தகவல் தெரிந்து கொள்ளலாம்.

உள்ளே நுழைந்ததும் முதலில் நம் கண்களில் படுவது 25 அடி உயரத்தில் அமைக்கப்பட்டுள்ள தங்க பூச்சிலான அன்னை மேரியின் மேடை. நுனுக்கமான கைவேலைப்பாடு, இலைகள் பூக்கள், கனிகள் என பல சின்னங்கள் பொறிக்கப்பட்ட தங்கப் பூச்சிலான மேடையின் நடுவே சாந்தா மரியா (Santa Maria) காட்சியளிக்கும் தோற்றம்.

இந்து ஆலயங்களைப் போல ஒவ்வொரு பக்கத்திலும் பல விக்கிரகங்கள்.

பிரமாண்டமான ஓவியங்கள் சுவர்களில். ஒவ்வொரு ஓவியங்களும் கிற்ஸ்துவ கத்தோலிக்க சமயத்தின் கதைகளைப் பிரதிபலிப்பனவாக உள்ளன.

மலாகா(ஸ்பெயின்) சுற்றுலா - செப்ட்-அக்டோபர் 2009 - 8

2009-11-14T21:42:00.000+01:00

ரோண்டாவில் முதலை நம்மை வரவேற்பது அல்கஸாபா கோட்டை. இதனை முதலில் பார்க்காமல் தொடர்ந்து நகரின் மையத்திற்குச் சென்று வாகனத்தை வைத்து விட்டு ஒவ்வொரு இடங்களாகப் பார்த்து வரலாம் என திட்டமிட்டோம். ரோண்டா முழுவதையும் ஒரு நாளில் பார்த்து முடிக்க முடியாது. குறைந்தது மூன்று நாட்களாவது வேண்டும்.

அதன் இயற்கை எழிலை ரசிக்க மலைகளின் ஓரத்தில் அமைக்கப்பட்டுள்ள குறுகிய பாதைகளில் நடந்து செல்ல வேண்டும்.

இதற்குக் கூட நிச்சயம் ஒரு நாள் போதாது. ஆதலால் சில முக்கிய இடங்களாக மனதைக் கவர்வனவற்றை மட்டும் பார்ப்பது என முடிவெடுத்து நடக்க ஆரம்பித்தோம்.

ரோண்டாவைப் பற்றி மேலும் அறிந்து கொள்ள இந்த வலைப்பக்கங்கள் நிச்சயம் உதவும். http://www.andalucia.com/ronda/home.htm . அதே போல http://images.google.com/images?hl=en&source=hp&q=ronda+spain&rlz=1R2ADBS_en&um=1&ie=UTF-8&ei=QcTqSp7vGsqvsAbG2vSxCw&sa=X&oi=image_result_group&ct=title&resnum=5&ved=0CCsQsAQwBA பகுதியில் உள்ள படத்தொகுப்பும் இந்த நகரின் இயற்கை எழிலைப் பற்றி அறிந்து கொள்ள உதவும். பழமை வாய்ந்த சரித்திரப் பின்னனியை அறிந்து கொள்வதும் சுவையான விஷயம் அல்லவா? அதற்கு http://www.andalucia.com/ronda/history.htm பக்கம் செல்லவும்.

Plaza el Toros el Ronda - வட்ட வடிவிலான குதிரை ஓட்ட காளை அடக்கு மைதானம். இது முதலில் 1572ல் அரச பரம்பரையினரால் கட்டப்பட்டு
குதிரைகள் ஓட்டப் பயிற்சிக்காக என பயன்படுத்தப்பட்டு வந்தாலும் 18ம் நூற்றாண்டில் காளை அடக்கு மைதானமாக பிரசித்தி பெற்று விளங்க ஆரம்பித்தது. இதுவே அண்டாலூசியாவின் முதல் காளை அடக்கு மைதானமாக குறிப்பிடப்படுகின்றது. அதுமட்டுமல்லாமல் உலகிலேயே முதன் முதலாக காளை அடக்கு போட்டிக்காக பிரத்தியேகமாக ஒரு மைதானம் அமைக்கப்பட்டு இப்போட்டி ஆரம்பிக்கப்பட்டதும் இங்கு தான் என்று இங்கு குறிப்பிடப்பட்டுள்ளது.

இன்னமும் இங்கு குதிரை ஓட்டப் பயிற்சிகள் வழங்கப்பட்டு வருகின்றன. உள்ளே நுழைந்ததுமே முகப்பை அடுத்து முதலில் வரவேற்பது குதிரை லாயம். இதனைத் தாண்டிச் சென்றால் மூடப்பட்ட விசாலமான ஒரு பகுதியில் குதிரைப் பயிற்சி நடைபெற்று கொண்டிருப்பதைக் காணலாம். இதனை அடுத்து குறுகிய பாதையின் வழியாக கடந்து சென்றால் வட்ட வடிவிலான மையப் பகுதியை அடையலாம்.

இந்த மேடையில் முதல் போட்டி 1785ல் நடைபெற்றுள்ளது.

இரண்டு கண்காட்சி மையங்கள் இந்த அரங்கின் உள்ளேயே அமைக்கப்பட்டுள்ளன.

காளை அடக்கு விளையாட்டு அருங்காட்சியகம் - இங்கே இவ்விளையாட்டினை விளக்கும் தகவல்கள், பாடம் செய்யப்பட்ட காளைகள், கொம்புகள், காளை மாடுகள் பற்றிய விவரங்கள், உலக சரித்திரத்தில் அதிலும் குறிப்பாக ரோமானிய சரித்திரத்தில் காளைகளின் தடயங்கள், சுமேரிய காலத்தில் காளைகள் அடக்கும் போட்டி, அதன் முக்கியத்துவங்கள் என பல விஷயங்கள் சொல்லப்படுகின்றன. உலகில் முதன் முதலாக சுமேரிய நாகரிகத்தில் காளை மாடு அடக்கும் போட்டி இருந்ததாகவும் இங்கு குறிப்பிடப்பட்டுள்ளது.

அடுத்ததாக உள்ள அருங்காட்சியகத்தில் குதிரை மற்றும் காளையடக்கும் போட்டிகளில் பங்கேற்கும் வீரர்கள் அணியும் உடைகள், வாள், துப்பாக்கிகள், அரச பரம்பரையினர் பயன்படுத்திய பல்வேறு அணிகலன்கள் ஒவ்வொன்றும் பெயர்கள் குறிப்பிடப்பட்டு காட்சிக்கு வைக்கப்பட்டுள்ளன.

மலாகா(ஸ்பெயின்) சுற்றுலா - செப்ட்-அக்டோபர் 2009 - 8

2009-11-12T21:41:00.000+01:00

7ம் நாள் - ரோண்டா

அண்டாலூசியாவின் இயற்கை அழகை பிரதிபலிக்கும் நகரங்களில் ரோண்டா முக்கிய இடத்தைப் பெறுகிறது. எஸ்டாபோனாவிலிருந்து ஏறக்குறைய 70 கி.மீ தூரத்தில் உள்ள நகரம். மலைகளைச் சுற்றி வளைந்து செல்ல வேண்டியுள்ளதால் ஏறக்குறைய ஒன்றேகால் மணி நேரம் பயணத்திற்கு தேவை.

வரலாற்று ஆசிரியர்கள் இந்த நகரில் 25,000 ஆண்டுகளுக்கு முன்னிருந்தே மக்கள் இங்கு வாழ்ந்துள்ளமையை இங்குள்ள குகை சித்திரங்கள் மற்றும் பல தடயங்கள் வழி நிருபிக்கின்றனர்.

ஏறக்குறைய 50 கி.மீ தூரத்திற்கு பயணம் மலைகளைச் சுற்றியே. பரந்து விரிந்த மலைகள். தற்சமயம் இங்கு மிக விரிவாக கோல்வ் விளையாட்டு மையமும் அதனைச் சார்ந்த சுற்றுப்பயனமும் அடிவாரப் பகுதிகளை ஆக்கிரமித்திருக்கின்றன. வழியில் செல்லும் போது ஆங்காங்கே கோல்வ் பந்துகளை விற்பனை செய்யும் சாலையோர வியாபாரிகளைப் பார்த்தவாரே பயணித்தோம்.

ரோண்டாவின் இயற்கை எழிலை அதிகரிப்பது மலைத்தொடரும் அதன் பாறைகளும். ஒன்றை அடுத்து மற்றொன்று என மலைகள் தொடர்ந்து பரவி மிகப் பிரமாண்டமாக காட்சியளிக்கின்றன. முதலில் கொஞ்சம் பச்சை பசேலென இந்த நிலத்துக்கே உரிய தாவர வகைகளுடன் மலைகள் காட்சியளிக்கின்றன. படிப்படியா மேலே உயர செல்லச் செல்ல பெறும் பாறைகள் வெள்ளை கற்களாய் ஜொலிக்க மிக அழகான மலத்தொடராக உயர்ந்து நிற்கின்றன.

மலாகா(ஸ்பெயின்) சுற்றுலா - செப்ட்-அக்டோபர் 2009 - 7

2009-11-11T21:40:00.000+01:00

6ம் நாள் - மலாகா

மலாகா விமான நிலையத்தில் நாங்கள் வந்திருங்கியிருந்தாலும் 6ம் நாள் வரை இந்த நகரத்திற்கு நாங்கள் வரவில்லை. மலாகா ஒரு பழம் நகரம். உலகப் புகழ்பெற்ற ஓவியர் பிக்காஸோ பிறந்த நகரம். பல நூற்றாண்டுகளாக ஸ்பெயினின் முக்கிய துறைமுகமாக விளங்கி வருகின்றது இந்த நகரம்.

நகரின் உள்ளே வந்ததுமே வாகனத்தை ஓரிடத்தில் வைத்து விட்டு நடக்கத் தொடங்கினோம். மலாகாவின் எல்லா முக்கிய இடங்களையும் சுற்றுலா பேருந்து ஏறி சுற்றி வரலாம். இதற்கு 8 யூரோ கட்டணம்.

இதில் அமர்ந்து ஒவ்வொரு இடங்களாக பார்க்க ஆரம்பித்தோம். இடையில் சில நிறுத்தங்களில் இறங்கி பார்க்க வேண்டிய இடங்களைப் பார்த்து விட்டு மீண்டும் பேருந்தில் ஏறி அடுத்த இடத்திற்குச் செல்லலாம்- ஒரே கட்டணத்தில்.

முதலில் நாங்கள் பார்க்க விரும்பிய இடம் அரேபிய கோட்டையான அல்கஸாபாவும் கிப்ரால்பாரோவும். இது 12ம் நூற்றாண்டு வாக்கில் கட்டப்பட்ட ஒரு கோட்டை.

இந்த கோட்டையைச் சுற்றி பார்த்த பின்னர் அடுத்ததாக மெட்ரோபோலிட்டன் தேவாலத்திற்குச் சென்றோம். மிக மிகப் பிரமாண்டமான தேவாலயம். இந்த தேவாலயம் ஒரு மசூதியின் மேல் அமைக்கப்பட்டுள்ளது. மசூதி இடிக்கப்படு பின்னர் இந்த தேவாலயம் கிறிஸ்துவ ஆட்சியாளர்களால் உருவாக்கப்பட்டுள்ளது. இங்கேயும் மூல விக்ரகம் அன்னா மரியா தான்.

இந்த தேவாலயம் நுண்கலைக்கு ஒரு எடுத்துக் காட்டு. மிக உயரமான மதில்கள். சுவர்களில் அலங்கார விலக்குகள்; பூஜைக்குரிய சிறப்பிடம்; அங்கு பாதிரியார்கள், தேவாலய முக்கியஸ்தர்கள் அமர்வதற்கான இடங்கள் போன்றவை ஒவ்வொன்றும் திட்டமிடப்பட்டு செதுக்கிய வடிவங்கள். எனது கேமராவில் படங்கள் எடுத்து எனக்கு அலுத்துப் போய்விடும் அளவிற்கு ஒவ்வொரு முக்கிய இடங்களாக எனது கேமாராவில் கிளிக் செய்து கொண்டேன். ஆனால் நேரில் பார்ப்பதில் இருக்கும் அனுபவத்தில் ஒரு சிறிதளவினைத்த்தான் புகைப்படங்களில் பார்க்கும் போது கிடைக்கின்றது.

இந்த தேவாலயத்தில் பூஜைகளும் நடந்து வருகின்றன; இது வெறும் சுற்றுலா மயம் மட்டுமல்ல.

இதனைப் பார்த்த பிறகு சற்று நடந்து துறைமுகம் அருகில் வந்து சேர்ந்தோம். பல சிறிய பெரிய கப்பல்கள். மலாகாவின் வியாபார பலத்தையும் ஆளுமையையும் இவை காட்டுவனவாக அமைந்திருந்தன.

பிறகு மீண்டும் பேருந்தில் ஏறி மலாகா நகர மையத்திற்குள் வந்து சேர்ந்தோம். சாலைகளின் இரு பகுதிகளிலும் கடைகள். இங்கு மிருகங்களின் தோலினால் செய்யப்பட்ட பொருட்கள் மிகப் பிரசித்தி பெற்றவை. தோல்பைகள், காலணிகள் போன்றவற்றை நல்ல விலைக்கு வாங்கி மகிழலாம்.

நடந்த களைப்பில் மதிய உணவை ஒரு உணவகத்தில் முடித்த பின்னர் மேலும் தொடர்ந்து சில இடங்களைப் பார்க்க நடந்தோம். மாலை முழுவதும் வேறு பல இடங்களையும் பார்த் பின்னர் அன்றைய திட்டம் நிறைவேறிய மகிழ்ச்சியில் எஸ்டாபோனா திரும்பினோம்.

மலாகா(ஸ்பெயின்) சுற்றுலா - செப்ட்-அக்டோபர் 2009 - 5

2009-11-10T21:39:00.000+01:00

5ம் நாள் - மரபெயா

இன்று புத்தகத்தை வாசிப்பதிலும் ஓய்வெடுப்பதிலும் சில மணி நேரங்கள் கழிந்தன. நாங்கள் வாடகைக்கு எடுத்திருந்த வாகனம் கொஞ்சம் பிரச்சனை செய்ததால் அதனை மாற்ற வேண்டியிருந்தது. மரபெயாவில் இந்த வாகன நிறுவனத்துக்குச் சொந்தமான ஒரு கிளை இருந்ததால் அங்கு செல்வது என முடிவு செய்து மதியம் பயணித்தோம்.

மரபெயா எஸ்டபோனாவிலிருந்து ஏறக்குறைய 16 கிமீ தூரத்தில் உள்ள மற்றொரு கடற்கரை நகரம். புவஞ்ஞிரோலாவை விட மிக நேர்த்தியாக இந்நகரம் உள்ளது என்றே சொல்லலாம். சுற்றுப் பயனிகளை மையமாக வைத்து வர்த்தகங்கள் இயங்குகின்றன. பொருட்களின் விலையும் இங்கு சற்று அதிகம் என்றே தோன்றுகின்றது. அதோடு இங்கு சவூதிய அராபிய ஷேக்குகள் பலர் தங்கள் விடுமுறை இல்லங்களை வைத்துள்ளனராம். அதிகமாக இந்த நகரில் பயணிக்காவிட்டாலும் மதிய உணவை முடித்து வாகனத்தையும் மாற்றிக் கொண்டு மீண்டும் எங்கள் தங்கும் விடுதிக்குத் திரும்பினோம். இரண்டு நாட்களுக்குப் பிறகு மீண்டும் மரபெயாவிற்கு மாலையில் வந்திருந்தோம். ப்ளமின்கோ எனும் நாட்டியத்தைக் கண்டு ரசிக்க.

ப்ளமின்கோ நாட்டியம் மனதைக் கொள்ளை கொள்ளும் ஒரு நாட்டியம். ஏழிலிருந்து எட்டு பேர் கொண்ட குழுவினர். அதில் நான்கு நடனக்காரர்கள்; 4 இசைக்கலைஞர்கள் இடம் பெற்றிருக்கின்றனர்.

கால் பாதங்களை இசைக்கேற்ப தரையில் தட்டி ஆடுவதே இதன் அடிப்படை. அழகிய பெண்களும் ஆண்களும். நளினமான உடல் கட்டுடன் நேர்த்தியான உடையணிந்து இந்த நடனத்தை ஆடுகின்றனர். ஒவ்வொரு முறை ஆடும் போதும் அவர்கள் தங்கள் மனதில் தோன்றிய வகையில் ஆடுகின்றனர். இசைக் கலைஞர் பாடும் இசையில் இலயித்து தங்களை மறந்து இவர்கள் ஆடுவது நன்றாகத் தெரிகின்றது.

நாங்கள் சென்ற இந்த நாட்டிய நிகழ்ச்சி ஒரு குடிசைத் தொழில் போன்ற அமைப்பில் நடத்தப்பட்டு வரும் ஒரு இடம். வருகையாளர்கள் அமர சிறிய நாற்காலி தருகின்றனர். அருந்துவதற்கு பானமும் வாங்கிக் கொள்ளலாம். 90 நிமிட நாட்டியத்தை நம்மை மறந்து பார்த்து ரசிக்கலாம். ஸ்பெயின் அதிலும் அண்டாலூசிய செல்பவர்கள் ஒரு முறை ப்ளாமின்கோ நடனத்தை பார்த்தே ஆக வேண்டும். விக்கிபீடியாவில் ப்ளமென்கோ பற்றி அறிய http://en.wikipedia.org/wiki/Flamenco.

ப்ளமென்கோ நாட்டியம் ஆடும் பெண்கள் அணியும் ஆடைகள் மிக அழகானவை. உதாரணத்திற்கு சில படங்கள். இவை புவஞ்ஜிரோலா தெரு கடைகளில் எடுக்கப்பட்ட படங்கள்.

மலாகா(ஸ்பெயின்) சுற்றுலா - செப்ட்-அக்டோபர் 2009 - 5

2009-11-06T21:36:00.001+01:00

4ம் நாள்: கஸாரஸ்

கஸாரஸ் எங்கள் தங்கும் விடுதியிலிருந்து (எஸ்டாபோனாவிலிருந்து) வடக்கு நோக்கி ஏறக்குறைய 30 நிமிட பயணத்தில் அமைந்துள்ள ஒரு சற்று மலைப்பாங்கான நகரம். இந்த நகரமும் வெள்ளை கிராமங்களுக்குப் பிரசித்தி பெற்ற ஒன்று.

இந்த வெள்ளை கிராமத்தில் வீடுகளுக்கிடையே நடப்பது மிக சுவாரசியமான ஒரு அனுபவம். வாகனத்தை ஓரிடத்தில் வைத்து விட்டு நடக்க ஆரம்பித்தோம். வீடுகளைச் சுற்றி படிகள். படிகளில் அடுத்தடுத்து இறங்கி கீழே சென்றால் சிறிய நகரம். அங்கிருந்து மேலும் படிகளில் சுற்றி வளைந்து நடந்து மேலேறினால் ஒரு பழம் கோட்டை. இந்த கோட்டை 12ம் நூற்றாண்டில் ரோமானியர்கள் ஆட்சியின்போது கட்டப்பட்டது. இப்போது கோட்டையின் சிதிலமடைந்த பகுதியே பிரமாண்டமாக தூரத்திலிருந்து பார்த்தாலும் காணும் வகையில் அமைந்துள்ளது.

இந்த கோட்டையின் அருகில் ஒரு 12ம் நூற்றாண்டு தேவாலயமும் உள்ளது. இதன் பழைய மண்டபத்தை மாற்றி புதிய தேவாலயம் இப்போது அமைக்கப்பட்டுள்ளது. இந்த கோட்டையின் தனிச் சிறப்பு என்னவென்றால் இங்கிருந்து பார்த்தால் கீழுள்ள மலைத்தொடர்கள், கிப்ரால்டா, மற்றும் ஆப்பிரக்க கண்டத்தின் உச்சி வரை ஒருவர் காணலாம். முன்னர் இது தற்காப்புக்கு மிக முக்கியமன ஒரு பகுதியாக இருந்திருக்கும் என்பதில் சிறிதும் ஐயமில்லை.

இந்த நகரில் எங்களை மிகக் கவர்ந்த மற்றொரு விஷயம் இங்கு இக்கோட்டையை ஒட்டி அமைந்திருக்கும் புதைகுழிகள். ஜெர்மனியில் இடுகாடு (cemetry) மிக அழகாக ஒரு பூந்தோட்டம் போல பராமரிக்கப்படுவதைப் பார்த்திருக்கிறேன். பல முறை அங்கு நடப்பதற்காகச் சென்றிருக்கிறோம். இங்கு மிக வித்தியாமசமாக, இந்த வெள்ளை கிராமத்து வீடுகள் போலவே அடுக்கடுக்காக வெள்ளைச் சதுரங்கள்.

ஒருவரது பூதவுடலைத் தாங்கிய பெட்டியை இந்த சதுரங்களுக்குள் வைத்து மூடி வைத்து விடுகின்றனர். ஒவ்வொரு சதுர அறைக்கும் ஒரு எண்; தங்கும் விடுதி எண் போல. அதன் முகப்பில் இறந்தவரின் பெயர் திகதி, சில குறிப்புக்கள் இப்படிப் சில செய்திகள். அதோடு பூக்களினால் அலங்கரித்து இந்த இடத்தை மிக அழகாக பராமரித்தும் வருகின்றனர்.

இது அதிசயமான ஆனால் மிக அழகான ஒரு இடம். இந்த நகரத்திற்கு வருபவர்கள் கட்டாயம் இங்கு வந்து நேரில் காண வேண்டிய ஒன்று என்றும் சொல்லலாம்.

ஆலீவ் எண்ணெயில் சமைக்கப்பட்ட பதார்த்தம், ஆலீவ் விதைகள் சாலாட்டுடன் உணவில் சேர்த்து உண்பது என்பது இங்குள்ள சமையல் கலையாக இருக்கின்றது. இத்தாலி, கிரேக்கம் போன்று ஆலீவ் எண்ணை இங்கு சமையலில் மிக முக்கிய அங்கம் வகிக்கின்றது. ஒரு வகையில் ஆலீவ் எண்ணையில் சமைத்து பழகியவர்களுக்கு வேறு மாற்று எண்ணையை சமையலில் உபயோகிப்பதில் நிச்சயமாக விருப்பம் இருக்காது. எனக்கும் இது பொருந்தும். ஆலீவ் எண்ணெய் உணவு பதார்த்தங்களோடு கலந்து சிறந்த சுவையை வழங்கக்கூடியது. இந்த நகரில் ஆங்காங்கே சாலைகளில் வீடுகளில் ஆலீவ் மரங்கள் உள்ளன. பச்சை மற்றும் பழுத்த கரும் ஆலீவ்களை மரத்தில் பார்க்க முடிகின்றது.

மலாகா(ஸ்பெயின்) சுற்றுலா - செப்ட்-அக்டோபர் 2009 - 4

2009-11-05T21:35:00.001+01:00

மிஹாஸ்

புவன்ஜிரோலாவிலிருந்து அடுத்து எங்கள் பயணம் மிஹாஸ் நோக்கியது. மிஹாஸ் நகரத்தை புவன்ஜிரோலாவிலிருந்து 20 நிமிடத்தில் சென்றடைந்தோம். சற்று மலைப்பாங்கான இடம். நகரின் உள்ளே நுழையும் போது வெள்ளை வர்ணத்திலான குடியிருப்புப் பகுதிகளைத் தூரத்திலிருந்தே பார்க்கமுடிந்தது.

அண்டாலூசியாவிற்கு அதிலும் மலாகாவிற்கு வரும் அனைவரும் இந்த சிறிய நகரத்தைப் பயன பட்டியலில் கண்டிப்பாக சேர்த்துக் கொள்ளவேண்டும். வெள்ளை நிரத்தில் வர்ணம் பூசப்பட்டு பூக்களும் செடி கொடிகளும் அலங்கரிக்க காட்சியளிக்கும் இந்த குடியிருப்புப் பகுதிகளே மிகப் பெரிய ஒரு ஈர்ப்பு. இந்த நகரில் சுற்றுலா பயணிகளைக் கவரும் பல அம்சங்கள் உள்ளன. உதாரணமாக ஆங்காங்கே காணப்படும் அழகுப் பொருட்கள் பீங்கான் (porcelain) சமையல் மற்றும் அலங்கார கைவினைப் பொருட்கள் போன்றவை இங்கு வருகையளிக்கும் சுற்றுலா பயணிகள் திரும்பிச் செல்லும் போது எடுத்துச் செல்ல நல்ல ஞாபகச் சின்னம்.

குதிரை வண்டிகளில் மட்டுமல்ல சவாரி, கழுதை டாக்ஸிகளிலும் இங்கு உண்டு. ஒவ்வொரு கழுதைக்கும் ஒரு அட்டை தலையில் கட்டப்பட்டு அதில் அந்தக் கழுதையின் பதிவு செய்யப்பட்ட டாக்சி எண் உள்ளது. 15 நிமிட சாவரியில் மிஹாஸின் வெள்ளை கிராமத்து சாலைகளைப் பார்த்தவாரே பவனி வரலாம்.

Bullring - காளைவளையம். ஸ்பெயின் காளை பந்தயத்திற்கு புகழ்பெற்ற நகரம். அண்டலூசியாவின் கலைகளில் உலகப் பிரசித்தி பெற்றது காளை அடக்கும் விளையாட்டு. இங்கு காளையை அடக்குவது மட்டுமல்ல; மாறாக அதனை அடக்க முயல்பவர் அதனை ஈட்டியினால் தாக்கி கொல்வதே வழக்கம். இங்கு காளை அடக்கும் காட்சிகள் ஞாயிற்றுக் கிழமைகளில் நடைபெறுகின்றன
.

போட்டியில் பங்கு கொள்ளும் காளைகள் அவற்றிற்கென குறிப்பிடப்பட்டுள்ள தனி அறைகளில் காத்திருக்கின்றன. போட்டிகளைக் காண ஒவ்வொரு வாரமும் மக்கள் இங்கு கூடுகின்றனர். போட்டி நடைபெறாத சம்யம் இந்த வளையத்தைச் சுற்றிப் பார்க்க 3 யூரோ வசூலிக்கப்படுகின்றது.

மலாகா வைன்(wine) உற்பத்திக்கு மிக பிரசித்தி பெற்ற நகரம். மாலையில் உணவருந்துகையில் சிவப்பு வைன் (dry / sweet) வகை வைன் உணவோடு அருந்துவது இங்குமட்டுமல்ல ஐரோப்பா முழுமைக்கும் உயரிய பண்பாடாகவும் கருதப்படுவது. பொதுவாகவே இரவு உணவின் போது வைன் இருப்பது ஐரோப்பிய கலாச்சாரம். இதில் ஸ்பெயினின் அண்டலூசியா விதிவிலக்கல்ல.

கத்தோலிக்க தேவாலயங்கள் - மிஹாஸ் சிறு நகரிலேயே மூன்று கத்தோலிக்க தேவாலயங்களைப் பார்க்க முடிந்தது. இதற்கு மேலும் கூட சில இருக்கலாம். மூன்றிலும் ஒரு ஒற்றுமையைப் பார்த்தேன். ஏசு கிறிஸ்துவின் சிலைகள் ஆங்காங்கே இருந்தாலும் மேரி அன்னையின் சிலைக்கு பிரதான இடம் கொடுக்கப்பட்டிருப்பது இங்கு ஒரு புதுமை. ஜெர்மனியில் ஏறக்குறைய எல்லா தேவாலயங்களிலும் பிரதான இடத்தில் ஏசு சிலை தான் உள்ளன. அண்டலூசியாவில் ஒரு மாற்றம். அன்னா மரியா (Anna Maria) இங்கு மூலக் கருவறையில் வீற்றிருக்கிறார். இது குறிப்பிடத்தக்க ஒரு வித்தியாசம் என்றே எண்ணத் தோன்றுகின்றது.

மலாகா(ஸ்பெயின்) சுற்றுலா - செப்ட்-அக்டோபர் 2009 - 3

2009-11-03T21:34:00.000+01:00

3ம் நாள்: புவன்ஜிரோலா, மிஹாஸ்

சரி நாவலிலிருந்து சுற்றுப் பயண விபரங்களுக்கு வருவோம். மூன்றாம் நாள் எங்கள் திட்டத்தில் புவன்ஜிரோலாவும் மிஹாசும் இருந்தன.

புவன்ஜிரோலா எஸ்டாபோனாவிலிருந்து ஏறக்குறைய 30 கிமி வடக்கே உள்ள கடற்கரை நகரம். எங்கள் தங்கும் விடுதி இருக்கும் எஸ்டாபோனாவிலிருந்து இங்கு செல்ல ஏறக்குறைய 35 நிமிடங்கள் தேவை. எஸ்டாபோனாவிலிருந்து செல்லும் போது புவன்ஜிரோலாவிலிருந்து முதலில் நம்மை வரவேற்பது சோகாயில் மாளிகை (Sohail Castle). சோகாயில் எனும் இப்பெயர் இஸ்லாமியர்கள் இந்த நகரை ஆட்சி செய்த போது இக்கோட்டைக்கு இட்ட பெயர். சோகாயில் என்பது அரபு மொழியில் ஒரு பிரகாசமான நட்சத்திரத்தைக் குறிப்பது என்ற குறிப்பும் இந்த கோட்டையின் வாசலில் உள்ள விளக்கச்சுவரொட்டியில் குறிக்கப்பட்டுள்ளது.

கடற்கரையோரத்தில் ஒரு சிறிய குன்றின் மீது இந்தக் கோட்டை கட்டப்பட்டுள்ளது. ரோமானியர்கள் மற்றும் பலர் இப்பகுதியை ஆட்சி செய்துள்ளனர். ஏறக்குறைய 12ம் நூற்றாண்டின் இறுதியில் கட்டப்பட்ட மாளிகை இது. ஒரு பாதுகாப்புச் சுவரும் இந்த மாளிகையைச் சுற்றி உள்ளது. இதுவும் 12ம் நூற்றாண்டில் கட்டப்பட்டது தான். இந்தக் கோட்டையின் ஒரு கோபுரமும் சுவர்களின் பெரும் பகுதியும் பின்னர் நெப்போலியனால் தகர்ப்பட்டுள்ளன. புவன்ஜிரோலா டவுன் ஹால் சரித்திர மாணவர்கள் இந்தக் கோட்டையைத் தற்போது புணரமைக்கும் நடவடிக்கையில் ஈடுபட்டுள்ளதோடு அவ்வப்போது கலை நிகழ்ச்சிகளையும் ஏற்படுத்தி இக்கோட்டைக்கு மக்களை அழைப்பதில் தீவிர கவனம் செலுத்தி வருகின்றனர் என்ற செய்தியை இங்குள்ள தகவல் மையத்திலிருந்து தெரிந்து கொள்ள முடிந்தது. தற்போது இந்த மண்டபத்தில் பல ஒன்று கூடல் நிகழ்வுகள், இசை நடன நிகழ்ச்சிகள் அவ்வப்போது நிகழ்கின்றன.

புவன்ஜிரோலா சுற்றுலா விடுதிகள் நிறைந்த பகுதி. ஏறக்குறை 10 கிமி தூரத்திற்கு ஒன்றை அடுத்து ஒன்றாக தங்கும் விடுதிகள், சுற்றுலா பயணிகளுக்கான விற்பனைப் பொருட்கள் அடங்கிய வியாபார ஸ்தலங்கள், உணவு விடுதிகள் என கடைகள் வலது புறத்திலும், கடற்கரை மணலில் இதமான சூழலை ரசித்துக் கொண்டிருக்கும் பயணிகளையும் பார்க்க முடிகின்றது. எண்ணிலடங்கா தங்கும் விடுதிகள். ஒன்றை அடுத்து மற்றொன்று. பெரும்பாலும் அபார்ட்மண்ட் வகையிலான தங்கும் விடுதிகள் இங்கு அதிகமாக காணப்படுகின்றன.

அடுத்து புவன்ஜிரோலா நகரின் மையப் பகுதி. சாலையின் இரு மருங்கிலும் பற்பல கடைகள். உள்ளூர் மக்களுக்குத் தேவையான பொருட்களும் சுற்றுறுலா பயணிகளைக் கவரும் கடைகளும் பல இங்குள்ளன. அழகான ஆனால் குறுகிய சாலைகள். சாலையின் இரு பகுதியிலும் குட்டையான மரங்களும் ஆங்காங்கே மக்கள் அமர்ந்து ஓய்வெடுக்க நாற்காலிகளும் பல சாலையின் இரு பக்கத்திலும் வைக்கப்பட்டு மிக ரம்மியமான காட்சி அளிக்கும் நகர்ப்பகுதி இது.

பழைய சுவடுகளைப் பிரதிபலிக்கும் கோட்டை மதில்கள் இருந்தாலும் பெரும்பாலும் இந்த நகரைச் சுற்றியிருக்கும் அடுக்குமாடி கட்டிடங்கள் சுற்றுப் பயணிகளைக் குறிவைத்து இயங்கும் வர்த்தக நிலையங்கள் இந்த நகரை ஒரு சுற்றுப் பயணிகளுக்கானப் பிரத்தியேக நகரம் என்பதையே காட்டி நிற்கின்றன.

மலாகா(ஸ்பெயின்) சுற்றுலா - செப்ட்-அக்டோபர் 2009 - 2

2009-11-02T21:33:00.000+01:00

விடுமுறையில் புத்தகங்கள் வாசிப்பதும் எனக்கு மிகப் பிடித்தமான ஒன்று. இம்முறையை விடுமுறையில் வாசிக்க இரண்டு புத்தகங்களைக் கொண்டு வந்திருந்தேன். ஒன்று Sam Bourne எழுதிய The final reckoning மற்றொன்று Dan Brownனின் புதிய நாவல் The lost Symbol. The final reckoning விமானத்திலேயே படிக்கத் தொடங்கி விட்டேன். ஆரம்பமே மிக சுவாரசியமானது. நியூ யோர்க்கில் உள்ள ஐக்கிய நாடுகள் சபைக்கு வரும் ஒரு வயதான மனிதர் பாதுகாப்புப் படைகளால் தீவிரவாதி என தவறாக நம்பப்பட்டு கொல்லப்படுகின்றார். இதனைத் தொடர்ந்து நடைபெறும் விஷயங்களை மிகச் சுவையாக விவரித்துச் செல்லும் நாவல் இது. இது உண்மை சம்பவங்களை அடிப்படையில் கொண்டு பின்னப்பட்ட நாவல். 2ம் உலகப் போருக்கு முன்னர் 1939, 1940களின் ஆரம்பத்தில் லித்துவானியா, போலந்து, ஜெர்மனி ஆகிய நாடுகளில் யூத மக்கள் எதிர்கொண்ட பிரச்சனைகளை ஆயிரக் கணக்கான யூதமக்கள் பல்வேறு தருணங்களில் ஆயிரம் ஆயிரமாக கொல்லப்பட வரலாற்று செய்தியைப் படிப்படியாக பல குடியிருப்புக்களில் (ghettoes
) வைக்கப்பட்டிருந்த யூத மக்களைக் குழுக்களாகக் கொன்று குவித்த விதத்தை இந்த நூல் விவரிக்கின்றது. அக்கால கட்டத்தில் அக்குழுக்களில் இந்தக் கொடுமைகளை அனுபவித்த சில இலைஞர்கள் Dam Israel Nokeam (DIN) என்ற ஒரு இரகசிய அமைப்பை உருவாக்கி அதன் வழி செய்திகள் பரிமாற்றம் செய்தது, மற்றும் 2ம் உலகப்போருக்குப் பின்னர் இக்குழுவினர் நாஸி பழைய உயர் அதிகாரிகளில் சிலரை மிகத் தந்திரமாகக் கொன்றது என பல உண்மைத் தகவல்களைச் சில பெயர் மாற்றங்களோடு இந்த நூல் மிக மிக சிறப்பாக விளக்கிச் செல்கின்றது.

இந்த நாவலில் வரும் DIN இயக்கத் தலைவர் உண்மையான யூத குழுவினர் தலைவரான Abba Kovne ஐ மையமாகக் கொண்டு புனையப்பட்டுள்ளது. யூத மக்களின் மனித உரிமைப் போராட்டம், நாடிழந்து மக்கள் பட்ட கஷ்டங்கள், பின்னர் படிப்படியாக இஸ்ரேல் தனி யூத நாட்டை உருவாக்க நடந்த சில முக்கியச் செய்திகளை மிகக் கொஞ்சம் கதைகளோடும் பல் உண்மைச் சம்பவங்களோடும் சேர்த்து ஆசிரியர் எழுதியிருக்கின்றார். இந்த நாவலின் முக்கிய கதாபாத்திரமான கெர்ஷோன் மாட்ஸ்கின் என்பது புனைப்பெயர் என்றாலும் இவரும் ஒரு உண்மையான ஒரு முக்கிய நபரின் சித்தரிப்பு. 2ம் உலகப் போருக்குப் பின்னர் DIN அமைப்பு ஜெர்மானிய நாஸி அதிகாரிகளில் தண்டனைகளிலிருந்து தப்பிய பலரை ஒழிக்க முயன்ற தந்திர முயற்சிகளில் திட்டமிடப்பட்ட 'plan A', 'plan B' எனக் குறிப்பிடப்படும் இரண்டும் மிக விரிவாக இந்த நாவலில் விவரிக்கப்படுகின்றன. இதில்
plan B என்பது விஷத்தை உணவில் கலந்து சிறையில் பாதுகாப்பில் வைக்கப்பட்டிருந்த ஜெர்மன் நாஸி அதிகாரிகளுக்கு வழங்கப்பட்டதும் அதனால் 2300 ஜெர்மானிய நாஸிகள் மருத்துவமனையில் தீவிர சிகிச்சைக்கு உட்படுத்தப்பட்டதும் பதிவில் உள்ள உண்மை சம்பவத்தை அடிப்படையாகக் கொண்டவை. இதில் எத்தனை ஜெர்மானிய நாஸிகள் இறந்தனர் என்ற தகவலை அரசாங்கம் சரியாக வெளியிட வில்லை என்ற போதிலும் DIN செயல்படுத்திய இந்தத் தாக்குதல் ஓரளவுக்கு பாதிப்பை அப்போது ஏற்படுத்தியிருக்கின்றது. ஆனாலும் 2ம் உலகப் போருக்குப் பின்னர் முழு கவனமும் தனி இஸ்ரேல் நாடு எனும் ஒருமித்த கருத்தை அடைப்படையாக கொண்டு இயங்கியதால் DIN தனது செயல்பாடுகளைப் படிப்படியாக முடக்கிக் கொண்டது. ஆனாலும் DIN வழி ஏறக்குறைய 50 இளைஞர்களும் இளைஞிகளும் தங்கள் வாழ்க்கையை பணயம் வைத்து இவ்வகைப் பழிதீர்க்கும் பணிகளில் ஈடுபட்டுள்ளனர் என்னும் சரித்திர உண்மையை இந்நாவலைப் படிப்பவர்களுக்ப் புரிய வைத்திருக்கின்றார் நாவலாசிரியர். இவரது முந்தைய வெளியீடான The Last Testament கூட மிக அருமையான ஒரு நாவல்.

ஐக்கிய நாடுகள் சபையில் ஒரு சில ஆண்டுகள் சமாதான அமைப்புப் பிரிவில் உயர் அதிகாரியாக பணியாற்றிய அனுபவம் பெற்ற இந்நாவலாசிரியர் தான் சந்தித்த, கேட்ட பார்த்த அனுபவித்த உண்மை சம்பவங்களை நாவலில் திறம்பட சேர்த்து விவரித்து படிப்பவர்களுக்கு நல்ல தகவல் விருந்து அளிக்கக்கூடியவர் என்பது இவரது இரண்டு நாவல்களை வாசித்தவர்களுக்கு நிச்சயம் தெரியும்.

மலாகா(ஸ்பெயின்) சுற்றுலா - செப்ட்-அக்டோபர் 2009 - 1

2009-11-01T21:25:00.001+01:00

ஸ்பெயின் ஐரோப்பிய நாடுகளில் ஒன்று; வரலாற்று நோக்கில் மிகப்பல சரித்திர நிகழ்வுகளைக் கண்ட நாடு. அதில் அண்டலூசிய எனும் பகுதி ஏறக்குறைய 17% ஸ்பெயினின் நிலப்பகுதியைக் குறிப்பது (தீவுகளைச் சேர்க்காமல்) அதில் மலாகா ஒரு துறைமுகப்பட்டிணம்.

எங்கள் பயணம் ஸ்டுட்கார்ட்டிலிருந்து மலாகா நோக்கி நேராக தெற்கு நோக்கிச் செல்லாமல் முதலில் ஹம்பெர்க் (ஜெர்மனி) சென்று பின்னர் அங்கிருந்து மலாகா (ஸ்பெயின்) செல்லும் வகையில் அமைக்கப்பட்டிருந்தது. ஸ்டுட்கார்ட்டிலிருந்து ஹம்பெர்க்கிற்கு ஏறக்குறை 800 கிமீ தூரம். அதிலும் வடக்கு நோக்கிய பயணம். பயன நிறுவனத்தின் ஏற்பாடு இது. ஹம்பெர்கிலிருந்து பின்னர் மலாகாவிற்கு பயணம். ஒரு சில பயணிகளை மற்றும் ஏற்றிச் செல்வதற்கு பதிலாக அருகிலுள்ள ஏனைய ஐரோப்பிய நாடுகளிலிருந்து மலாகா பயணிக்கும் பலர் ஹம்பெர்க்கிலிருந்து புறப்படும் வகையில் இந்தப் பயணம் ஏற்பாடு செய்யப்பட்டிருந்தது என்பதை விமானத்தில் பயணித்த பல மொழி பேசும் பயணிகளைப் பார்த்த போது புரிந்தது. இதுவும் ஒரு வியாபார உத்தி தானே.

ஏறக்குறைய 3 மணி நேர பயணம். மதியம் 2 மணிக்கு விமான நிலயத்தை அடைந்து பின்னர் அங்கேயே முன்கூட்டியே ஏற்பாடு செய்திருந்த வாடகைக் காரை எடுத்துக் கொண்டு நானும் என் கணவரும் எங்கள் தங்கும் விடுதி நோக்கி புறப்பட்டோம். இங்கு ஒரு முக்கிய விஷயத்தைக் குறிப்பிட வேண்டும். அண்டலூசியா விஸ்தாரமான மிகப் பெரிய நிலப்பரப்பில் அமைந்த பகுதி. ஒரு நகரத்திலிருந்து மற்றொரு நகரத்திற்கு பயணிக்க பேருந்து ரயில் இவற்றிற்கு பதிலாக விட ஒரு வாகனத்தை வாடகைக்கு எடுத்துக் கொள்வது சிறப்பு. எங்கள் தங்கும் விடுதி இருக்கும் இடம் எஸ்டாபோனா. இது மலாகாவிலிருந்து ஏறக்குறைய 80 கிமீ தூரம் உள்ள நகரம். இடையிலேயே புவன்ஜிரொலா, மார்பெயா போன்ற சற்றே பெரிய நகரங்களைக் கடந்து கடற்கரையோர நெடுஞ்சாலையில் மத்திய தரைக்கடலை ரசித்த வாரே பயணித்த போது காலையிலிருந்து பயணித்த அலுப்பு மறைந்து விட்டது.

எஸ்டபோன ஒரு சிறிய நகரம்; குறிப்பாக நாங்கள் தங்கியிருந்த தங்கும் விடுதி கடற்கரையை ஒட்டிய வண்ணம் அமைந்த ஒரு இடம். காலைத் தழுவ வரும் அலைகளில் நடப்பது, அதிகாலை கடற்கரையில் ஜோகிங் ஓட்டம்,, மாலை நெடுந்தூரம் அலைகளில் நடந்து செல்வது என்று பொதுவாகவே எங்கள் 14 நாள் விடுமுறையின் ஒவ்வொரு நாளின் சில மணி நேரங்கள் கடற்கரை அலைகளோடு கழிந்தன.

பீஸாவும் பீட்ஸாவும் பார்போமா - இத்தாலி பயணக் குறிப்பு -6

2007-11-01T19:09:00.000+01:00

சனிக்கிழமை காலை உணவை முடித்தபின்னர் Pisana Palace லிருந்து check-out செய்துவிட்டு ரோம் நகரத்திற்கு புறப்பட்டு விட்டேன். எனது குறிப்பில் முதலில் இருந்தது Vatican City.

1377- லிருந்து Vatican போப்களின் மடங்களாக இருந்து வருகின்றது. வாட்டிக்கனில் முக்கியமாகப் பார்க்க வேண்டியவை St.Peter's Basilica, Vatican Museums, மற்றும் Sistine Chapel ஆகியவையே. பெப்ரவரி 11, 1929- லிருந்து வேட்டிக்கன் ஒரு தனி மாகாணமாகப் பிரகடணப்படுத்தப்பட்டது. ரோமானிய சாம்ராஜ்ஜியம் இருந்த காலத்தில் St.Peter Apostle கொல்லப்பட்டார். இவரது உடல் இந்த இடத்தில் தகனம் செய்யப்பட்டது. இதற்கு ஏறக்குறைய 250 ஆண்டுகளுக்குப் பின்னர் Constantine இந்த St.Basilica எனப்படும் உலக பிரமாண்டத்தை அந்த இடத்தில் கட்டினார்.

இப்போது இருக்கும் இந்த Basilica - வை Julius II 1503 - லிருந்து காடினார். இது முழுமையடைய 176 ஆண்டுகள் பிடித்தன. வாட்டிக்கனின் ஒவ்வொரு பகுதியும் இந்த காலகட்டத்தில் முடிவடைந்தன. அதன் பின்னர் தான் Michelangelo தனது 70-வயதில் உலகின் மிகப்பெரிய dome என்று கருதப்படும் இந்த தேவாலயத்தில் dome - ஐ திட்டமிட்டு வடிவமைக்க ஆரம்பித்தார். அவர் இறந்த பின்னரும் அவரது திட்டத்தின் படியே இது முழுமைபடுத்தப்பட்டது.

வாட்டிக்கனை முழுமையாக சுற்றிப்பார்க்க 2 நாட்கள் தேவை. உலகின் பல மூலைகளிலிருந்து இங்கு சுற்றுலா பயணிகள் நிரம்பியிருந்தனர். [ உலகின் எந்த சுற்றுலா மையங்களுக்குச் சென்றாலும் ஜப்பானிய சுற்றுலா பயணிகளைப் பார்க்காமல் இருக்க முடியாது. இவர்களுக்கு எப்படித்தான் நேரம் கிடைக்கின்றதோ தெரியவில்லை..??..:-)] St.Peter's Basilica தேவாலயத்தில் உட்பகுதியில் இருக்கும் ஒவ்வொரு சிலைகளும் கண்களுக்கு விருந்து. மணிக்கணக்கில் அதன் கலை நயத்தைப் பார்த்துக் கொண்டேயிருக்கலாம்.

அன்றைக்கு மறுநாள் சிறப்பு நிகழ்ச்சிக்காக ஆப்பிரிக்க நடனக் குழு ஒன்று அங்கு வந்திருந்தனர். மறுநாள் நடைபெறவிருக்கும் நிகழ்வுக்காக இவர்களின் ஒத்திகை ஒன்றும் வாசலிலேயே நிகழ்ந்து கொண்டிருந்தது. அதனைப் பார்த்து விட்டு கோட்டையின் ஒரு மூலையில் வந்து அமர்ந்தேன். எனது பக்கத்தில் அமர்ந்திருந்த ஒருவரை நோக்கி இரண்டு இத்தாலிய காவலர்கள் நெறுங்கிக் கொண்டிருந்தனர். அதனைப் பார்த்தவுடன் தனது பையைத் தூக்கிக் கொண்டு மெதுவாக நழுவ ஆரம்பித்தான் இந்த 30 வயது மதிக்கத்தக்க இளைஞன். அவனைத் தடுத்து நிறுத்தி இத்த்தாலியில் காவலர்கள் விசாரிக்க அது புரியாததால் ஆங்கிலத்தில் விசாரிக்க ஆரம்பித்தனர். குரேஷியாவிலிருந்து போதிய பயணச்சீட்டுகளோ விசாவோ இல்லாமல் அகதியாக வந்திருக்கின்றான் இந்த இளைஞன். அவனிடம் தேவையான விஷயங்களை விசாரித்து அவனை தங்களோடே கூட்டிசென்று விட்டனர். சற்று நேரத்தில் எனக்குப் பக்கத்தில் வேறொரு இத்தாலிய வயோதிகர் வந்து அமர்ந்தார். இத்தாலியில் என்னிடம் வேட்டிக்கனின் அழகை விமர்சிக்க ஆரம்பித்தார். எனக்குப் புரியவில்லை என்று ஆங்கிலத்தில் சொன்னவுடன், சைகையிலேயே என்னிடம் மிக சுவாரசியமாக விளக்க ஆரம்பித்தார். [ சைகை மொழியை ஒரு பாடமாக எடுத்துப் படிக்காமல் போய்விட்டோமே என்று மனதுக்குள் என்னையே திட்டிக் கொண்டேன்..:-) ] அவரிடம் சற்று உரையாடிவிட்டு, அதாவது சைகையிலேயே பேசிவிட்டு ரோம் நகரின் மற்றொரு அதிசயமான கொலோசியத்தை நோக்கி நடக்க ஆரம்பித்தேன்.

இத்தாலி - Sardinia - Sept 02-09, 2007

2007-10-11T20:37:00.003+02:00

விடுமுறைக்காக நான் எங்காவது செல்லும் போது அதிலும் குறிப்பாக புதிய நாடு அல்லது புதிய இடங்களுக்குச் செல்லும் போது மறக்காமல் குறிப்புக்களைச் சேகரிப்பது வழக்கம். புகைப்படங்கள் மற்றும் ஒளிப்படங்கள் சேகரித்தலும் இதில் அடங்கும். சில நாட்களுக்குப் பிறகு மீண்டும் இந்தக் குறிப்புக்களை நோக்கும் போது விடுமுறையின் இனிய நினைவுகள் மனதில் நிழலாடுவது ஒரு தனி சுகம்.

அந்த வகையில் கடந்த வாரம் 7 நாட்கள் கிடைத்த விடுமுறையில் இத்தாலியின் தீவுகளில் ஒன்றான சார்டீனியாவிற்குச் நானும் என் கணவரும் சென்றிருந்தோம். இந்த அழகிய தீவின் சில புகைப்படங்களும் தகவல்களும் இதோ.

முதலில் இந்த தீவைப்பற்றிய சிறு குறிப்பு:
தீவின் பெயர் - சார்டீனியா
மக்கள் தொகை - 1,700,000
பயன்பாட்டு மொழி - இத்தாலி, சார்டீனியா

இது இணையத்தில் சுட்ட படம்..:-)

இயற்கையின் அழகு.

தூய்மையான கடற்கறைகள் தான் இந்த தீவிற்கு அதிகமான ஐரோப்பிய சுற்றுப் பயணிகளை கவர்கின்றன.

கால்கியரி (காலியரி என்று சொல்ல வேண்டும்) - இந்த தீவின் தலைநகரின் மையப் பகுதி.

நகரின் மத்தியில் அமைந்திருக்கும் வர்த்தக நிலையங்கள்.

எலியைத் தாங்கிக் கொண்டிருக்கும் பூனை. அதிசயம் தானே!

எலியோடு சேர்ந்து பூனையும் உணவு உண்ணும் காட்சி. (இது பயிற்சி அளிக்கப்பட்ட பூணை தான்.)

பெக்கரீனோ மற்றும் பியோரே சார்டோ சீஸ் வகைகள் இந்த தீவின் சிறப்பு.

ஆலீவ் மரங்களில் ஆலீவ் காய்கள். இந்த தீவு முழுவதும் எல்லா இடங்களிலும் ஆலீவ் மரங்கள் செழித்து வளர்வதை காணலாம்.

ஆலீவ், ஆலீவ் எண்ணெய் மற்றும் உள்நாட்டு வைன். சுற்றுலாப் பயணிகள் வாங்கிச் செல்வதற்காக.

இந்த தீவின் பழங்குடியினர் நூராகியர்கள். கி.மு.1800லிருந்து கி.மு 500 இந்த மக்களின் நாகரிகம் இந்த தீவில் செழிப்பாக இருந்துள்ளது. அதன் சில சுவடுகள் இப்போதும் இந்த தீவின் பல இடங்களில் அகழ்வாராய்ச்சியின் வழி கண்டு பிடிக்கப்பட்டு பாதுகாக்கப்பட்டு வருகின்றன. இந்தப் படம் ' சு நுராசியி' கிராமத்தைக் காட்டுவது. இங்கே ஒரு அகழ்வாராய்ச்சி நிலையமும் அங்கு கண்டு பிடிக்கப்பட்ட பல தடயங்களும் தொல் பொருள் அருங்காட்சியத்தில் வைக்கப்பட்டுள்ளன.

அகழ்வாராய்ச்சி நிலைய அதிகாரி விளக்கம் தருகின்றார். பின் புறத்தில் அகழ்வாராய்ச்சியில் கண்டெடுக்கப்பட்ட ஒரு கோட்டையின் சில பகுதிகள். இந்த அதிகாரி நான் அடிப்படையில் மலேசிய நாட்டைச் சேந்த்தவர் என்று தெரிந்தவுடன் மிகவும் ஆச்சரியப்பட்டார். குறிப்பாக இந்த அகழ்வாராய்ச்சி நிலையத்திற்கு வருகை புரியும் முதல் மலேசியர் நான் என்று கூறி மகிழ்ந்தார். எனக்கும் ஆச்சரியம் கலந்த மகிழ்ச்சி.

மேலேயுள்ள இந்த வகை சிறிய குட்டி வாகனங்கள் இங்கு பொருட்களை ஏற்றிச் செல்ல பயன்படுத்தப்படுகின்றன. இவை 3 சக்கரங்களைக் கொண்டவை. பொதுவாக பச்சை மற்றும் நீல நிறத்திலும் ஒரு சில இப்படி பல வர்ணங்களிலும் உள்ளன.

இந்த தீவில் முக்கிய உணவு பீஸாவும் கடல் உணவுகளும் தான். எல்லா சிறிய பெரிய நகரங்களிலும் pizzaria உணவு அங்காடிகள். தொடர்ந்து சில நாட்கலள் பீஸா சாப்பிட்டதில் அடுத்த ஒரு மாதத்திற்கு பீஸாவைப் பற்றி நினைக்கக் கூடாது என்றே முடிவெடுத்துவிட்டேன்.

தலைநகரின் ஒரு முக்கிய சாலையில் உள்ள உடைந்த சாலை விளக்கு. ம்ம்ம்.. இங்கேயும் இப்படிச் சில அசம்பாவிதங்கள் !

இங்கு கத்தரிக்காய்கள் நிறையவே கிடைக்கின்றன. அதிலும் பெரிய மாங்காய் அளவில் சில கத்தரிக்காய்கள்.

இந்த தீவின் சீதோஷ்ணத்திற்கு காக்டஸ் செடிகள் நன்றாக வளர்கின்றன. காக்டஸ் மரத்தில் இவ்வளவு அதிகமாக காய்கள் காய்ப்பதை நான் இதுவரை பார்த்ததில்லை. கனேரியத் தீவுகளில் பல வகையான காக்டஸ் பூக்களைப் பார்க்கலாம். ஆனால் இங்கு இந்த காய்கள் ஆச்சரியமாக மிக அதிகமாக வளர்கின்றன. இந்த காகய்களை இந்த தீவு மக்கள் சாப்பிடுகின்றார்கள். இந்த காய்களை பறிப்பதற்காக நீண்ட ஒரு கருவி இருக்கின்றது. இதனைக் கொண்டு இந்த செடியை தீண்டாமலேயே அவர்கள் பரித்துப் பழங்களை வெட்டி அதன் உள்ளிருக்கும் பகுதியை சாப்பிடுகின்றார்கள்.

இவை மிருகக்கட்சிசாலையில் உள்ள பிளாமிங்கோக்கள் அல்ல. சாலை ஓரங்களில், ஏரிக்களில் ஒற்றைக் காலில் நிற்கும் சுதந்திரப் பறவைகள்.

படங்கள்:பீட்டர் ட்ரெம்மல் & சுபா ட்ரெம்மல்

ஜெர்மனி - Muenchen (Munich) -Bayern, Germany. [ 6 - 9 Jan 2005 ] - Part V

2005-01-20T20:25:00.003+01:00

1972ம் ஆண்டில் ஒலிம்பிக் விளையாட்டு மூன்ஷன் நகரத்தில் நடைபெற்றது. அதற்காக பிரத்தியேகமாக கட்டப்பட்ட ஒலிம்பிக் விளையாட்டு மையத்தைக் காண காலையிலேயே நண்பர்கள் அனைவரும் கிளம்பி விட்டோம். இந்த ஒலிம்பிக் விளையாட்டு மையத்தின் பக்கத்தில் தான் மூன்ஷனின் தொலைகாட்சி கோபுரம் இருக்கின்றது. முதலில் கோபுரத்திற்குச் சென்று பின்னர் விளையாட்டு மையத்தை பார்வையிடுவதுதான் எங்கள் திட்டமாக இருந்தது.
தொலைகாட்சி கோபுரத்தின் மேலே செல்லுவதற்கு கட்டணம் தேவை. (மலேசியாவில் இரட்டைக் கோபுரத்தின் மேலே செல்வதற்குக் கூட காசு கேட்பதில்லை. ஆனால் இங்கு எங்கு சென்றாலும் நுழைவுக் கட்டணம் கட்டாயம்) கோபுரத்தின் உச்சியிலிருந்து பார்த்தால் ஏறக்குறைய மூன்ஷன் நகரம் முழுவதும் தெரிகிறது. BMW கார் நிறுவனத்தின் தலைமையகம் அருகாமையிலயே உள்ளது. அதன் அருகிலேயே BMW Musuem இருக்கின்றது. பிரமாண்டமாக வடிவமைக்கப்பட்ட ஒரு கட்டிடம் இது. தாலைகாட்சி கோபுரத்தின் மற்றொரு பகுதியிலிருந்து பார்த்தால் ஒலிம்பியா பார்க் காட்சியளிக்கின்றது. விளையாட்டு மைதானம், அதனைச் சேர்ந்தார் போல உள்ள ஆறு, பூங்கா ஆகியவை மனதை கொள்ளை கொள்ள வைக்கின்றன.

1972ல் நடைபெற்ற இந்த ஒலிம்பிக் விளையாட்டு நிகழ்வோடு சேர்ந்தார்போல நிகழ்ந்த வன்முறை சம்பவத்தை பலரும் ஞாபகம் வைத்திருக்கக் கூடும். ஆகஸ்டு 26ம் நாள் தொடங்கப்பட்ட விளையாட்டுக்கள் சீராக 10 நாட்கள் தொடர்ந்து கொண்டிருந்த வேளையில் செப்டம்பர் 5ம் தேதி காலையில் 8 பாலஸ்தீனிய தீவிரவாதிகள் விளையாட்டு வீரர்களுக்காக அருகிலேயே அமைக்க ப்பட்டிருந்த ஒலிம்பிக் கிராமத்திற்குள் புகுந்து 2 இஸ்ரேலிய விளையாட்டு வீரர்களை கொன்று விட்டு மேலும் 9 பேரை பிணையாக பிடித்துக் கொண்டு சென்று பின்னர் அவர்கள் கொல்லப்பட்டனர். இதனால் ஒலிம்பிக் விளையாட்டு உடனே நிறுத்தப்பட்டது. ஒலிம்பிக் விளையாட்டு வரலாற்றில் இது பெரும் பரபரப்பை ஏற்படுத்திய நிகழ்வு.

இந்த ஒலிம்பிக் விளையாட்டு மைதானப் பகுதி தற்போது உலகளாவிய அளவில் பல நிகழ்வுகள் நடத்துவதற்காகப் பயன்படுகின்றது. ஓய்வு நேர கேளிக்கை விளையாட்டுக்களில் ஈடுபாடு உடையவர்கள் பலர் இங்குள்ள வசதிகளைப் பயன்படுத்திக் கொள்ள முடியும்.
ஜெர்மனியைப் பொறுத்தவரை மூன்ஷன் நகரம் இருக்கின்ற பாயர்ன் மாநிலம், ஜெர்மனியின் ஏனைய மாநிலங்களை விட பணக்கார மாநிலமாக கருதப்படுகின்றது. இங்கு வெளிநாட்டவர்களும் அதிகம். இதற்கு முக்கியக் காரணம் இது ஒரு வர்த்தக மையமாக இருப்பதுதான். இங்கு பொதுமக்கள் பரவலாக சுயமாக வாகனங்கள் வைத்துக் கொள்ள விரும்புவதில்லை. இரயில், அதிவேக இரயில் பஸ் போன்ற பொது போக்குவரத்து சாதனங்கள் மிகச் சிறப்பாக இயங்கி வருவதாலும், கார் வைப்பதற்கான இடவசதி என்பது மிகப் பெரிய பிரச்சனை என்பதாலும் மக்கள் பொது போக்குவரத்து சாதனங்களை விரும்புகின்றார்கள். வர்த்தக மையமாக இருப்பதால் மற்ற ஓய்வு நேர நடவடிக்கைகள் மற்றும் கேளிக்கை நடவடிக்கைகளுக்கு இங்கு பஞ்சமாக இருக்குமோ என்றல் நிச்சயமாக இல்லை என்று தான் சொல்ல வேண்டும். அழகழகான பூங்காக்கள், பிரமிக்க வைக்கும் வர்த்தக மையங்கள், பழமை வாய்ந்த கட்டிடங்கள், தொல்பொருள் காட்சி நிலையங்கள், விளையாட்டு மைதானங்கள், சினிமா, வகை வகையான உணவகங்கள் என்று பல வகையில் திருப்தியளிக்கக்கூடிய அனுபவத்தை வழங்குகின்ற ஒரு நகரம் தான் இது.
மாலை மூன்ஷன் நகரிலிருந்து ஸ்டுட்கார் திரும்பும் போது இந்த நகரை சுற்றிப் பார்க்க நிச்சயமாக 4 நாட்கள் போதாது என்பதை உணர்ந்தோம். இந்த பயணம் இனிமையான நினைவலைகளை எனக்குள் ஏற்படுத்தி என்னை மகிழவைத்தது.

ஜெர்மனி - Muenchen (Munich) -Bayern, Germany. [ 6 - 9 Jan 2005 ] - Part IV

2005-01-19T20:19:00.000+01:00

சனிக்கிழமை காலையிலேயே ப்ரெட்ஸல் சகிதமாக காலை உணவை முடித்து நாங்கள் மூன்ஷன் நகரின் புறநகர் பகுதியான அம்மர்சீ (Ammersee) ஏரிப் பகுதிக்கு புறப்பட்டோ ம். மூன்ஷன் மையப்பகுதியிலிருந்து விரைவு இரயிலில் இந்த இடத்தை 45 நிமிடத்தில்
அடைந்து விடமுடியும்.

அம்மர்சீ அதன் இயற்கை அழகுக்கு மாத்திரம் புகழ் பெற்ற ஒன்றில்லை. sailing பயிற்சி பள்ளிகள் பல இங்கு இருக்கின்றன. இங்குதான் ஜெர்மனியில் மிகப் பழமையான sailing பள்ளி இருக்கின்றது. இந்த ஏரியை சாதாரணமாக எடை போட்டு விட முடியாது. கடலைப் பார்ப்பது போல நீண்டு பரவி இருக்கின்றது அம்மர்சீ.

அம்மர்சீக்கு அருகாமையில் மலையுச்சியில் மிகப்பழமை வாய்ந்த பாரோக் வடிவமைப்பிலான ஒரு தேவாலயம் இருக்கின்றது. ஜெர்மனியில் இருக்கின்ற திருத்தல யாத்திரைப் பகுதிகளில் இதுவும் ஒன்றாகக் கருதப்படுகின்றது. (ஹிந்து சமயத்தில் உள்ளது போன்றே ஜெர்மனியிலும் தீர்த்த யாத்திரை செய்யும் பழக்கம் வழக்கத்தில் இருக்கின்றது. இதனை பற்றி மற்றொரு பதிவில் குறிப்பிட முயற்சிக்கிறேன்) இந்த தேவாலயத்தை அடைவதற்கு மலையை நோக்கி ஏறக்குறைய 1மணி நேரமாவது நடக்க ஧வண்டும். வழியில் பற்பல முக்கிய இடங்களும் இருக்கின்றன. அதில் குறிப்பிட்டு சொல்வதென்றால் நடுவழியில் இருக்கின்ற தேவாலய குருமார்களின் மடத்தைக் குறிப்பிட்டுச் சொல்லலாம். பழமை வாய்ந்த கட்டிடம்; மிக நேர்த்தியாக கட்டப்பட்டிருக்கின்றது. முன்பெல்லாம் குருமார்கள் மற்றும் சமய ஆர்வலர்களை மட்டுமே கவர்ந்து வந்த இந்த மலைப் பிரதேசம் இப்போது ஹைக்கிங்
செய்பவர்களுக்குப் பிடித்த பகுதியாக விளங்குகின்றது. ஏரிக்கரையில் நீந்திக் கொண்டும் சத்தமிட்டுக் கொண்டும் இருந்த வாத்துக்களை பார்த்துக் கொண்டே மலையுச்சியை நோக்கி நடக்க ஆரம்பித்தோம்.

மலைப்பிரதேசத்தில் இந்த குளிர் காலத்தில் நடப்பது சுலபமான ஒரு விஷயமல்ல என்பதை நடக்க நடக்க தெரிந்து கொண்஧டன். காய்ந்த சருகுகள் தரையெல்லாம் கொட்டிக் கிடப்பதாலும் சில நாட்களுக்கு முன் பெய்த பணி இன்னும் கொஞ்சம் மிஞ்சி இருந்ததாலும் பாதை சில நேரங்களில் வழுக்கிக் கொண்டேயிருந்தது. கொஞ்சம் கவனம் குறைந்தாலும் கீழே விழுந்து விடுவே஡ம். இந்த பயம் இருந்தாலும் மலையின் இயற்கை அழகு மனதை கொள்ளை கொள்வதாகவே இருந்தது. இப்படியே நடந்து குருமார்களின் மடத்தைக் கடந்து ஒரு வழியாக மலையுச்சியில் இருக்கும் தேவாலயத்தை அடைந்தோம்.

அளவில் கொஞ்சம் சிறியதாக இருந்தாலும், தேவாலயத்தின் உட்புறம் மிகப் பிரமாண்டமாக வடிவமைக்கப்பட்டிருந்தது. உள்ளே பார்வையாளர்கள் இருந்தாலும் நிசப்தமாக தியான சிந்தையை தூண்டும் வகையில் அமைதியாக இருந்தது. தேவாலயம் தூய்நமயாக பாதுகாக்கப்படுகின்றது. இதனைப் பார்க்கும் போது தமிழகத்தில் இருக்கும் நமது பழமை வாய்ந்த ஆலயங்களும் இப்படி தூய்மையாக, அமைதி நிலவும் வகையில் பாதுக்காக்கப்பட்டு வந்தால் எவ்வளவு நன்றாக இருக்கும் என நினைத்துக் கொண்஧
டன்.

ஜெர்மனி - Muenchen (Munich) -Bayern, Germany. [ 6 - 9 Jan 2005 ] - Part III

2005-01-18T20:12:00.001+01:00

ஜெர்மனியில் செல்லுமிடமெல்லாம் சைவ உணவு வகைகளுக்கு கொஞ்சமும் பிரச்சனையேயில்லை. அதற்காக தோசை இட்லி சாம்பாரெல்லாம் தேடிக் கொண்டிருக்க முடியாது. அதற்கு மாற்றாக உருளைக் கிழங்கிலும் பச்சை காய்கறிகளிலும் தங்கள் கை வரிசையைக் காட்டுபவர்கள் ஜெர்மானியர்கள். நான் இருக்கின்ற போப்லிங்கன் நகரம் பாடன் உர்ட்டெம்பெர்க் எனும் மாநிலத்தைச் சார்ந்தது. எப்படி இந்தியாவில் தமிழகத்திற்கு கேரளாவிற்கு ஆந்திராவிற்கு என்று தனித்தனியாக சிறந்த உணவு வகைகள் இருக்கின்றதோ அதேபோல ஜெர்மனியிலும் ஒவ்வொரு மாநிலத்திற்கும் தனி ஷ்பெஷல் உணவு வகை உண்டு. உணவு வகைகளில் சிறந்ததாக இந்த பாடன் உர்ட்டெம்பெர்க் மற்றும் முன்ஷன் நகரம் இருக்கும் பாயர்ன்(Bavaria) மாநிலமும் கருதப்படுகின்றன. இதில் என்ன வித்தியாசம் என்றால், பாடன் உர்ட்டெம்பெர்க் மாநிலத்தில் இத்தாலிய சைவ உணவுகளோடு இந்த மாநிலத்திற்கு உரியதான பல சைவ உணவு வகைகளையும் எல்லா உணவு விடுதிகளிலும் பெற்று விட முடியும். ஆனால் பாயர்ன் மாநிலம் அசைவப் பிரியர்களுக்கு அதிகமான வகைகளை வழங்குவதில் சிறந்து விளங்குகின்றது.

பொரித்த பன்றி இறைச்சி, கொஞ்சம் பச்சை காய்கறிகள், மற்றும் உள்நாட்டு பியர் இங்கு மிகப் பரவலாக எல்லா உணவகங்களிலும் கிடைக்கக்கூடிய ஒன்று. அதோடு சால்மன் மீன், வைன், இவற்றோடு காய்கறிகள் கொண்ட ஒரு வகை உணவும் உண்டு. பன்றி மாடு, கோழி, வான்கோழி இறைச்சி வகைகளில் பல வகையான உணவுகளை இங்குள்ள உணவகங்கள் வழங்குகின்றன. மீன் வகைகள் கொஞ்சம் ஷ்பெஷல் என்று தான் கூற வேண்டும்.
பாயர்ன் மாநிலத்தின் புகழ் கூறும் மற்றொரு உணவு வகை ப்ரெட்ஸல் என அழைக்கப்படும் ஒரு வகை ரொட்டி.

இது இந்த மாநிலத்தில் தான் முதன் முதலில் அறிமுகப்படுத்தப்பட்டதாக ஜெர்மானியர்கள் கூறுகின்றார்கள். (ப்ரேட்ஸலைப் பற்றி சற்று அறிந்து கொள்ள http://en.wikipedia.org/wiki/Brezel) ஜெர்மனியின் எல்லா இடங்களிலும் இந்த வகை ரொட்டி கிடைத்தாலும், இதன் மிகச் சுவையான இந்த ரொட்டியை பாயர்னிலும் பாடன் உர்ட்டெம்பெர்க் மாநிலத்திலும் தான் பெற முடியும். முதன் முதலில் இந்த ரொட்டியைச் சாப்பிடுபர்களுக்கு ஒரு வித்தியாசமான சுவையைக் காட்டுவதால் இது பிடிக்காமல் போய்விடக் கூடும். ஆனால் பழகி விட்டால் ப்ரெட்ஸல் இல்லாமல் காலை உணவே இல்லை என சொல்லும் அளவிற்கு பழகி விடுவோம். இந்த ரொட்டியில் உள்ள சிறப்பு அதன் மேலே பூசப்படும் ஒரு விதமான பொருள் தான். இதன் சுவை கொஞ்சம் துவர்ப்பாகவும் இருக்கும். ரொட்டியின் மேல் உப்புத் துகள்கள் சேர்க்கப்பட்டிருக்கும். பட்டர் சேர்த்து சாப்பிடும் போது இதன் சுவையே தனிதான்.

சாதரணமாக சிறிய அளவில் ஜெர்மனி முழுதும் கிடைக்கக்கூடிய இந்த ப்ரெட்ஸல், அக்டோபர் மாதம் மட்டும் மூன்ஷன் நகரில் ஒரு பெரிய பீஸா அளவிற்கு கடைகளில் கிடைக்கும். இந்த பெரிய ப்ரெட்ஸலை ஒருவரால் நிச்சயமாக சாப்பிட்டு முடிக்க முடியாது.
மூன்ஷன் வந்திருப்பதால் இந்த நகரத்தின் ஸ்பெஷல் தான் சாப்பிட வேண்டும் என்று முடிவெடுத்து மெனு அட்டையில் எனக்குப் பிடித்த உணவைத் தேடினேன். ஒரு சைவ உணவு அகப்பட்டது. அடுத்த பதினைந்து நிமிடத்தில் எனது உணவு வந்து சேர்ந்தது. பெரிய அளவிலான ஒரு உருளைக் கிழங்கு இரண்டாக பிரிக்கப்பட்டு வேகவைத்து வருக்கப்பட்டு அதோடு காய்கறிகளை சோயா சோஸ் சேர்ந்து மெலிதாக வருத்து வைத்திருந்தார்கள். உணவை சுவைக்க ஆரம்பித்தோம். சுவை பிரமாதம்.

ஜெர்மனி - Muenchen (Munich) -Bayern, Germany. [ 6 - 9 Jan 2005 ] - Part II

2005-01-14T20:05:00.001+01:00

மூன்ஷன் நகர மத்தியிலேயே அமைந்திருக்கும் பெரிய பூங்கா இந்த இங்லீஷ் கார்டன். சுமார் 900 ஏக்கர் நிலப்பரப்பில் பச்சை பசேலென்று அமைந்திருக்கும் இந்த பூங்கா அதன் தனித்துவத்தால் வருவோரைக் கவரும் வகையில் அமைந்திருக்கின்றது. இங்குள்ள சீனக் கோபுரம், ஏரி, அதில் அழகாக மிதந்து வரும் அன்னப்பறவைகள், விதம் விதம஡ன வாத்துக்கள் போன்றவை இந்த பூங்காவின் அழகை மேலும் ரசிக்க வைக்கின்றன. கோடை காலத்தில் இந்த பூங்காவிற்கு மேலும் ஒரு சிறப்பு அம்சம் ஒன்றும் இருக்கின்றது. இந்தப் பூங்காவின் ஒரு பகுதியில் கோடையில் நிர்வாண சூரியக் குளியல் செய்வதற்காக மக்கள் கூடுவதும் வழக்கம். நகரின் மையப் பகுதியான ஓடன்ப்லாட்ஸ் பகுதியிலிருந்து மூன்ஷன் நகர தெற்கு எல்லை வரை இந்த பூங்கா நீண்டு அமைந்திருக்கின்றது. செல்ல செல்ல இந்த பூங்கா விரிவாகிக் கொண்டே வருகின்றது; மாலைப் பொழுதை இயற்கையோடு கலந்து அனுபவிப்பதற்கு சிறந்த இடம் இந்தப் பூங்கா. ஐரோப்பாவில் உள்ள மிகப் பெரிய பூங்காவாக இந்த இங்லீஷ் கார்டன் அமைந்துள்ளது.

ஐரோப்பிய நகரான இந்த மூன்ஷனில் அமைந்துள்ள இந்த பூங்காவில் ஆசியாவின் கலை நுனுக்கத்தை எடுத்துக் காட்டும் குறிப்பிடத்தக்க ஒரு இடமும் இருக்கின்றது. "Haus der Kunst" என்றழைக்கப்படும் கலைக்கூடத்தின் பக்கத்தில் அழகான ஒரு ஜப்பானிய உணவகம் அமைந்துள்ளது. Mitsuo Normura என்ற ஜப்பானியர் ஒருவர் தான் இந்த உணவகத்தை ஒலிம்பிக் விளையாட்டு இந்த நகரில் 1972ல் நடந்த பொழுது கட்டினாராம்.

இந்த உணவகத்தின் சிறப்பு அம்சம் என்னவென்றால் ஒவ்வொரு மாதத்தின் 2ம் மற்றும் 4ம் வார இறுதி நாட்களில் மதியம் 3லிருந்து 5 வரை தேநீர் அருந்தும் வைபவம் இங்கு நடைபெறுமாம். இந்த சிறப்பு நிகழ்ச்சிக்கு ஆதாரமாக இருப்பது என்ன விஷயம் என்பது தெரியவில்லை. இந்த உணவகத்திற்குப் பக்கத்திலேயே அமைந்திருக்கின்றது கண்ணைக் கவரும் வகையில் கட்டப்பட்டுள்ள சீன கோபுரம். மூன்ஷன் நகரத்திலேயே பிரபலமாக wildest beer garden in Munich என அழைக்கப்படும் பகுதி இது. கோடை காலத்தில் மக்கள் கூட்டத்தால் நிரம்பி வழியும் இந்த இடம் நாங்கள் சென்றிருந்த அந்த மாலை வேளையில் விண்டர் குளிர் காரணத்தால் ஆட்கள் யாருமின்றி அமைதியாக காட்சியளித்துக் கொண்டிருந்தது.

கோடைகாலத்தில் பெரும்பாலும் சூரிய வெளிச்சம் இரவு 10 மணி வரை இருக்கும்; அப்போது இந்த திறந்த மண்டபமான இந்த சீன கோபுரத்தில் மட்டும் 7000 பேர் அமரக்கூடிய வகையில் நாற்காலிகளை அமைத்திருப்பார்களாம்.

இதனைத் தாண்டி வரும் வழியில் பழங்கால அரசவை மண்டபங்களை நினைவு படுத்தும் வகையில் அமைந்திருக்கும் மானோபெறோஸ் மண்டபம் அமைந்திருக்கின்றது. இதன் மேலே சென்று பார்த்தால் மூன்ஷன் நகரத்தின் பெரும்பாலான முக்கிய நினைவுச் சின்னங்களையெல்லாம் பார்த்து விட முடிகின்றது. இந்த மண்டபம் இசை பிரியர்களுக்கு உகந்த இடம் போலத் தெரிகின்றது. பல இனத்தைச் சார்த்த மக்களும் அவர்களுக்குத் தெரிந்த இசைக் கருவிகளை இசைத்துக் கொண்டு (தரையில் சிறிய பெட்டி அல்லது தொப்பியை வைத்து விடுகிறார்கள், காசுக்காகத்தான்) வருவோரை இசையால் மகிழ்விக்கின்றனர். இந்திய உருவச் சாயலுடன் ஒருவர் ஹார்மோனியம் போன்ற ஒரு இசைக் கருவியை கையில் ஏந்தியவாறு வாசித்துக் கொண்டிருந்தார். நாங்கள் அங்கிருந்த சமயத்தில், மண்டபத்தின் நுழைவாயிலுக்குச் சற்று தள்ளி ஜெர்மானியர் ஒருவர் புல்லாங்குழல் போன்ற ஒரு இசைக்கருவியை வாசித்துக் கொண்டிருந்தார்.

இதனை பார்த்த திருப்தியுடனும், நடந்த களைப்பினாலும் அங்கிருந்த ஒரு ஜெர்மானிய பாரம்பரிய உணவு விடுதியில் இரவு/மாலை உணவுக்காக நுழைந்தோம்.

ஜெர்மனி - Muenchen (Munich) -Bayern, Germany. [ 6 - 9 Jan 2005 ] - 1

2005-01-13T19:54:00.000+01:00

வலைப்பக்கத்தில் எனது பயணக் கட்டுரைகளை எழுதி நெடுநாட்களாகி விட்டன. இந்த ஆண்டு தொடக்கத்திலேயே எதிர் பாராத விதமாக உள்நாட்டிலேயே சிறிய பயணம் மேற்கொள்ளும் வாய்ப்பு அமைந்தது. அன்றாட அலுவலக வேலைகள், அலைச்சல்கள், இவைகளுக்கு மத்தியில் 4 நாட்கள் ஓய்வு எடுத்துக் கொண்டு ஜெர்மனியின் தெற்கு மாநிலம஡ன பாயர்னில்(Bayern) உள்ள மூன்ஷன் (Muenchen) நகரத்திற்கு கடந்த வாரம் சென்று வந்திருந்தேன். பொதுவாகவே விண்டர் குளிரில் நான் அதிகமாக ஜெர்மனியில் விடுமுறை எடுத்துக் கொண்டு பயணிப்பது அரிது. பெரும்பாலும் அலுவலக வேலைகளில் கவனம் செலுத்துவதே வழக்கமாகிவிட்ட சூழ்நிலையில் இந்த முறை இந்த சிறிய திடீர் பயணம் சற்று வித்தியாசமாகவே அமைந்திருந்தது.

ஸ்டுட்கார்ட்(Stuttgart) நகரத்திலிருந்து மூன்ஷன் நகரை காரில் சென்று அடைவதற்கு இரண்டரை மணி நேரம் போதும். கார் மட்டுமின்றி இரயில் வழியாகவும் மற்றும் விமானம் வழியாகவும் இந்த நகரை அடைய முடியும். பவேரியன் நகரம஡ன இந்த நகரம் தெற்கு ஜெர்மனியின் மத்தியில் அமைந்துள்ளது. இந்த நகரின் சிறப்பு அம்சங்கள் இங்கு தயாரிக்கப்படும் பியர்களும், பழமையையும் நாகரிக வளர்ச்சியையும் காட்டும் பிரமாண்டமான கட்டிடங்களும், இயற்கை அழகும஡கும். இந்த நகரின் சிறப்பைக் கூறும் பிரமாண்டமான சில தொல்பொருள் ஆய்வு கூடங்களும் இங்கு அமைந்திருக்கின்றன. இதற்கும் மேலாக பவேரியா ஆல்ப்ஸ் (Baverian Alps) மலைத்தொடரின் வாயிலாக அமைந்திருப்பதால், குளிர்கால விளையாட்டுக்களுக்கு பிரசித்தி பெற்ற இடமாகவும் இந்த நகரம் விளங்குகின்றது.
மூன்ஷன் நகரம் 1158ம் ஆண்டில் ஐசார் நதிக்கரையில்(River Isar) உருவாக்கப்பட்டது. மூன்ஷன் என்னும் பெயர் துறவிகளின் இல்லம் என்பதைக் குறிப்பது. துறவிகள் தான் இங்கு பியர் தயாரிக்கும் துறையை வளார்த்ததாக இந்தகரைப் பற்றி விளக்கும் கையேடுகள் கூறுகின்றன.

இப்படி பல நூறு ஆண்டுகளுக்கு முன்னர் துறவிகள் தொடக்கி வைத்த இந்த தொழில் இன்று இந்த நகரின் புகழை உலகம் முழுவதும் பரவியிருக்கச் செய்துள்ளது. 1810ம் ஆண்டில் தான் இப்போது ஒவ்வொரு ஆண்டும் இந்த நகரில் நடைபெறும் அக்டோ பர் திருவிழா(October Fest) ஆரம்பிக்கப்பட்டது. ஒவ்வொரு ஆண்டும் நடைபெறும் இந்த திருவிழாவைக் காண உலகெங்கிலுமிருந்து 6 மில்லியன் மக்கள் இங்கு வருகின்றனர். இரண்டு வாரங்களுக்கு நடைபெறும் இந்த திருவிழாவின் போது ஏறக்குறைய ஐந்தரை மில்லியன் லிட்டர் பியர்கள் பயன்படுத்தப்படுவதாக (விற்று முடிவதாக) மூன்ஷன் வலைப்பக்கம் தெரிவிக்கின்றது.
இந்த நகருக்கு நான் இரண்டு முறை ஏற்கனவே அலுவலக விஷயமாக வந்திருந்தாலும், இம்முறை விடுமுறை என்பதால் சுதந்திரமாக சில இடங்களை சுற்றி வர முடிந்தது. குளிர் காலம் என்றாலும் இங்கிருந்த நான்கு நாட்களுமே ஏறக்குறைய 6லிருந்து 11 டிகிரி வரை சீதோஷ்ணம் இருந்ததால் வெளியில் சுற்றிப்பார்க்கச் செல்வதற்கு சிரமமாக இல்லை. மேக மூட்டமின்றி சூரிய வெளிச்சம் நிறைந்திருந்ததால், சந்தோஷமாக நகர் வலம் வரமுடிந்தது.
மூன்ஷனில் பல முக்கிய இடங்கள் இருந்தாலும், முதலில் எங்கள் பட்டியலில் இருந்தது இங்குள்ள அழகிய பூங்காவான இங்லீஸ்ஷ் கார்டந் தான். அதனை பார்த்து ரசிக்க மதியம் கிளம்பினோம்.